撒母耳记下 2章1节 到 2章11节   背景资料  上一笔  下一笔
Tùi第二章开始,一直到第五章3节,是记载大卫tùi洗革拉移转到希伯仑称王ê经过。大卫tùi原本只有tī犹大南部管理一个洗革拉城,变成tī希伯仑当全以色列民族ê王。

Chit段经文描述大卫王想tio̍h离开非利士人ê城市洗革拉。原因是chit pái ê战役是非利士人大胜。即使大卫继续留tī洗革拉城,mā bē受tio̍h尊重。颠倒,伊随时可能会成做非利士人ê眼中钉,mā可能对伊hō͘取hō͘求,hō͘伊夹tī非利士人kah以色列人民中间oh得生存。

Koh讲,大卫mā看tio̍h家己ê同胞会失去领导者,而过去伊一再phah赢非利士人,连非利士人嘴中mā讲出「扫罗刣死千千;大卫刣死万万」chit句歌颂ê诗歌(参考撒母耳记上廿一:11、廿九:5)。因为án-ne,对伊来讲,久长khiā起tī非利士人城市中,并m̄是上上之策。伊认为家己应该离开洗革拉城,tńg来到家己同胞ê城市去chiah是正确。就án-ne伊求问上帝,并且得tio̍h肯定ê答覆。作者透过chit种方式teh说明:大卫一切做tāi-chì,lóng是遵行上帝ê旨意。

第1到4节a句,tī料理扫罗kah约拿单往生ê事了后,大卫求问上帝kám bē-tàng上犹大ê一个城镇,却m̄是指明beh上tó一个城镇。这表示伊是完全听从上帝ê指引,并m̄是家己决定了后,chiah问是m̄是thang。当上帝回答讲thang了后,伊chiah koh继续问去tó位?得tio̍h ê回应是去「希伯仑」,是犹大南部siōng重要ê城市,mā是一个古老ê以色列人城镇(参考创世记十三:18、廿三:2),是犹大支派所分配到ê土地(参考约书亚记十五:13)。Á大卫mā是属tī犹大支族ê人,因为án-ne,到希伯仑等于是tńg来归家己ê宗族。Án-ne,大卫随时就带家眷离开洗革拉城,进入犹大ê中心城邑希伯仑地区。因为大卫m̄-nā是带家己ê家眷,mā带家己ê部下去,这表示大卫目前已经有真chē兵力,chiah-ê兵力bat phah败过强猛ê亚玛力人。虽然大卫并无进驻希伯仑城内,m̄-koh伊kah部下、家眷lóng已经来到希伯仑ê附近城镇tòa落来。这mā表示此后希伯仑chit-ê犹大ê重要城镇,m̄免koh再担心有外族人来进攻、掠夺。当大卫搬到希伯仑,犹大人马上就「膏立大卫作犹大ê王」,m̄-koh tio̍h注意ê是:chit时膏立大卫为「犹大ê王」,并m̄是全以色列十二支派共同ê动作,却是只有犹大支派,极加有附近西缅支派ê参与(参考士师记一:3)。其它ê支派lóng是继续拥护扫罗ê kiáⁿ他施波设。因为他施波设有大将军押尼珥拥护tio̍h,表示伊握有军事权柄。M̄-koh这mā已经teh暗示:犹大支派kah来自便雅悯传承ê扫罗家族,以及北方以色列伊支派之间,已经出现某种程度上ê嫌隙。

第4节b句到7节,chit段经文thang看出大卫ê聪明,伊知影怎样笼络犹大以外其他支派。这tùi伊teh处理扫罗kah约拿单ê后事thang看出来。伊beh hō͘其他支派ê人知影,伊对扫罗确实是尊崇、礼遇有加。当伊听tio̍h「基列ê雅比人埋葬了扫罗」,就派使者去kah雅比人讲鼓励、肯定ê话,同时mā hō͘ in知影大卫已经成做扫罗王位ê继承者。大卫祈愿信实ê上帝永远爱护tio̍h雅比人。伊mā应允会好款待in,希望用chit种方式得tio̍h雅比城人ê信赖,会转而支持伊继承扫罗ê王位。若是ē-tàng得tio̍h雅比城人ê支持,对大卫来讲,会加添真chē力量。特别是chit-ê城ê人,比起基伊拉城ê人是koh khah有义气。

第8到11节,tùi chit段经文thang看tio̍h扫罗军队ê元帅押尼珥,带扫罗ê kiáⁿ他施波设tī战况危急ê时chūn逃过约旦河到「玛哈念」去避难。Kā chit段经文koh再比较第三章7到11节,就thang看出他施波设是一个软弱ê领袖,而押尼珥chiah是真正有实力ê军事将领。统治ê范围包括有:「亚册」、「耶斯列」、「以法莲」,「便雅悯」等地带,chia讲「事实上是全以色列」,chit句话真清楚说明,大家继续承认扫罗ê kiáⁿ他施波设ê合法性。虽然是有元帅押尼珥tī背后操控tio̍h,m̄-koh外表上则属tī「正统」。Á他施波设当以色列ê王ê时chūn,年纪是「四十岁」,m̄-koh却伊统治ê时期只有短短「两年」时间而已。Chia ê「两年」,真可能是对照大卫tī希伯仑当犹大王ê最后两年chiah-tio̍h。

重新查询 专卷研经 撒母耳记下系列
错误回报,请联系comm[@]fhl.net