撒母耳记下 14章1节 到 14章24节   背景资料  上一笔  下一笔
Chit章teh描述大卫tī经过三年悲伤ê沉淀了后,开始想起押沙龙。原因是大卫ê第二kiáⁿ基利押chit时已经无tī。M̄-koh大卫身边大将约押koh khah是真会察言观色ê幕僚,伊深知大卫ê软弱,因为án-ne,当押沙龙出走三年了后,伊认为大卫一定tio̍h处理王位继承ê问题,却一直无动静,就án-ne伊想出一个办法hō͘大卫kah押沙龙chit对父子ē-tàng「和好」。

Chit段是记载约押决定提醒大卫一定tio̍h思考王位继承ê问题。Á chit段经文mā讲出约押tī大卫幕僚团中特殊ê地位,伊m̄-nā是一个常胜将军,而且一个手段残酷ê军人(参考列王记上十一:16—17)。Mā因为伊对大卫ê厝事kah私事了解真chē,大卫tī晚年往生chìn前,特别交带继承王位ê所罗门一定bē-tàng hō͘约押「善终」(参考列王记上二:6)。M̄-koh即使是án-ne,大卫犯罪ê事,iáu是hō͘一一记录落来,并无因为约押替伊掩盖(khàm)了罪行,而hō͘大卫ê恶行被遮盖起来。因为上帝鉴察人tī暗中所做ê一切。

Kā chit段经文比较第十二章有关先知拿单讲ê譬喻故事,就会发见譬喻方式真类似。先知拿单是宫廷先知,而约押则以色列siōng具影响力ê军队统帅。伊kah大卫ê亲近关系,tùi chit件事thang看出。

第1到3节,chia特别提起「洗璐雅ê kiáⁿ约押」,chit种用词有一个用意,beh表明chit时约押扮演ê角色,就是大卫ê「外甥」,beh向大卫进言ê是「家事」,却m̄是国王kah将军之间ê国事。约押知影tī无人敢向大卫提起王位继承ê问题,伊决定想办法hō͘大卫采取行动。大卫tī国家大事ê决断上真有魄力,m̄-koh对家务事却往往显得非常懦弱。Ná亲像伊对暗嫩所犯ê罪行,只是「非常受气」,却无惩罚伊ê行动。就án-ne约押去chhōe一个「提哥亚」聪明ê妇人去见大卫王,chia所讲ê「聪明」,意思是真会「讲故事」、「讲譬喻」,ná亲像先知拿单仝款。约押ài chit-ê妇女用穿丧服、不梳头chit种特殊ê打扮来引起大卫ê注意。Chit种方式所beh表达ê意义,是chit-ê寡妇一直无亲人来娶伊入门,照顾伊(参考申命记二十五:5—10)。约押并且交带这妇人讲「Kā我kā你讲ê话对王讲」,伊所讲ê话记载tī第5到7节。

第4到8节,因为chit-ê提哥亚ê妇人是穿插守寡衫裤,而且无梳头毛,这表示伊一直生活tī困苦中间。Chit-ê妇人请求大卫帮助伊ê时,大卫无拒绝伊。Tùi第5到7节ê记载thang清楚约押kā chit位妇女讲tio̍h对大卫讲ê话ê内容。主要有下列几点:(a)伊是一个「sàn-chhiah寡妇」,丈夫已经死去,m̄-koh kiáⁿ却无种作能力。(b)「其中一个刣死了另外一个」,明显是刣人者会hōng判处死刑(参考出埃及记廿一:12)。Á chit-ê cha-bó͘人ê话真具隐喻,teh暗示大卫ê两个kiáⁿ,其中一个被刣死,而刣人ê押沙龙一定tio̍h判处死刑。(c)这妇人表示,若是照摩西律法ê规定,伊kā失去继承产业ê最后希望。伊讲出非常重要ê一点,就是如果全lóng照律法规定去行,并无一定公道,mā有可能因为án-ne而成做近亲继承伊丈夫留落来ê产业(参考民数记廿七:11)。即使是án-ne,mā kā造成近亲之间彼此争夺财产ê结果。大卫听完了后,决定beh替这妇人处理chit件家务事。其实约押ài这妇人编造chit段故事,主要是teh暗示大卫,伊若koh再m̄ hō͘押沙龙tńg来宫,真可能造成王室内乱,大卫ê众kiáⁿ会为tio̍h争夺王位来彼此残杀得koh khah严重。Á后来mā证明约押ê顾虑是事实,因为大卫ê众细kiáⁿ就是为tio̍h争夺王位,而彼此残杀。

第9到11节,这妇人koh对大卫表示,这是伊厝里ê事,无希望因为án-ne hō͘国王受tio̍h无妄之灾。大卫表示伊ē-tàng hō͘妇人m̄免因为chit件事而操心,伊ài chit-ê妇人安心离开。并且表示beh庇护chit-ê妇人免受亲人、厝边ê搅扰。Chit-ê妇人koh进一步讲,希望大卫「向上主」祈祷,意思是beh大卫以上帝ê名chiù-chōa,「免得报血仇ê人继续杀戮」,这真清楚说明tī大卫无裁决chìn前,chit件「报血仇」ê行动iáu是会继续存在。因为án-ne,伊担心连伊「kan-taⁿ存ê kiáⁿ mā刣死」,这会hō͘伊陷入性命ê梦魇。大卫chiâⁿ实用上帝ê名chiù-chōa。

第12到17节,大卫显然iáu听m̄-bat这妇人想beh讲述ê意义。因为án-ne,这妇人chiah会要求继续说明。Á大卫真正mā听m̄-bat,所以同意这妇人ê请求。Chit-ê妇人就进一步说明她beh讲ê譬喻,是直接对大卫讲ê,chit种态度显然真唐突。因为一个妇女beh见国王,已经m̄是一件容易ê tāi-chì,taⁿ却teh讲述譬喻了后,直接道出国王ê问题,这一定需要冒tio̍h性命危险。伊直接指出大卫应该ē-tàng hō͘押沙龙tńg来,伊ê意思是:只要大卫王首肯,押沙龙就ē-tàng被接纳,重头tńg来王宫。这妇人主要teh说明:若是国王无特赦押沙龙,就算伊tńg来到耶路撒冷,mā会面临被掠而判处死刑ê结果。因为án-ne,伊要求大卫mài hō͘押沙龙面临被刣ê结局。伊o-ló「王亲像上帝ê天使仝款」,chit句话mā说明当时ê人看待国王ê角色,就是上帝所拣选ê使者(参考但以理书四:17,罗马书十三:1—2)。伊所代表ê,是上帝ê使者,为tio̍h是beh带领人民敬拜上帝。因为án-ne,chiah-ê使者必定真有智慧chiah-tio̍h。M̄-koh大卫一听,就清楚chit位妇人是受tio̍h别人指hō͘ chiah来讲这故事。

第18到20节,大卫m̄是戆子,伊一听这妇人所讲ê话,第一个感觉就是伊所讲ê话,并m̄是家己想出来ê。Koh讲,mā m̄是发生tī这妇人家己ê身上,却是直指大卫讲ê。因为án-ne,伊要求这妇人一定tio̍h真诚实回答是m̄是奉约押之托来ê,而这妇人真坦白地回答讲「无m̄-tio̍h」。Chit位妇人mā强调约押之所以ài伊án-ne做,to̍h是teh表示约押关心大卫ê家庭,想beh替大卫「挽回」家庭ê悲剧。伊并无希望大卫因为án-ne而误会、受气。

第21到24节,大卫就án-ne对约押讲,同意伊ê意见,thang kā「押沙龙带tńg来」耶路撒冷。Á约押真欢喜大卫听伊ê意见。其实,大卫应该是beh问先知拿单chiah-tio̍h,却m̄是问不时相刣ê将军约押。因为约押所建议ê事:hō͘押沙龙tńg来,而这必定kah国家王位ê继承者有密切关系。大卫kah-ná bē记得家己就是hō͘先知撒母耳所膏立ê,伊无kā国家大事先请教先知,tú好teh说明,伊并m̄是kā国家大事khǹg tī上帝ê旨意中。约押照大卫ê命令去行,到基述去kā押沙龙带tńg来耶路撒冷。不过,大卫拒绝hō͘押沙龙tòa tī王宫,却是tòa tī家己ê厝,这表示大卫并无随时恢复押沙龙过去所担任ê重要官职。这有可能是大卫想beh观察一阵子,看宫廷中有甚么反应。Mā因为án-ne,押沙龙chiah「无见王ê面」之机会。M̄-koh mā有另外一种可能,就是这teh暗示王宫中已经有一股看bē-tio̍h ê暗潮,就是大卫ê众kiáⁿ对押沙龙tńg来王宫任职ê事,有非常无仝款ê意见,chiah hō͘大卫对接见押沙龙ê事有所保留。

重新查询 专卷研经 撒母耳记下系列
错误回报,请联系comm[@]fhl.net