撒母耳记下 13章1节 到 13章22节   背景资料  上一笔  下一笔
Chit章就记载大卫ê kiáⁿ暗嫩犯强暴家己小妹她玛ê奸淫罪,然后押沙龙为tio̍h小妹她玛被强暴ê事,设计「鸿门宴」杀害暗嫩,替小妹她玛报仇。M̄-koh却tùi án-ne hō͘伊一定tio̍h逃走到老母ê故乡基述去外公家避难。因为án-ne,第十三章thang讲记载大卫犯罪了后,家庭成员回应出伊犯罪ê第一件事。另外一方面,主要是为tio̍h beh说明为甚么后来押沙龙无法度继承大卫ê王位ê原因,就是伊怀恨真深,设计暗刣死家己ê兄弟。Koh讲第十二章10节,先知拿单已经对大卫犯奸淫罪ê事,传出上帝ê惩罚是:「你án-ne违背我,抢去乌利亚ê bó͘,你ê家将永远逃bē过刀剑。」因为án-ne,大卫ê gín-á彼此残杀,包括了暗嫩ê事件(参考十三:28—29),押沙龙ê事件(参考十八:14),以及亚多尼雅ê事件(参考列王记上二:25),chiah-ê lóng说明是大卫犯罪了后所带来一个严重ê惩罚。上帝拣选ê奴仆,上帝赐福多。M̄-koh若是背叛上帝去犯罪,所带来ê惩罚mā是严厉。

Chit段经文记载大卫ê大kiáⁿ暗嫩为tio̍h beh亲近家己ê同父异母ê小妹她玛,想出所有ê办法接近伊,后来tī表兄弟约拿达ê献策下,性侵了伊,了后koh kā伊遗弃ê kui个过程。

第1到4节,chia讲押沙龙有一个小妹名叫「她玛」,这表示伊mā是大卫kah基述王达买ê cha-bó͘-kiáⁿ玛迦所生。Án-ne,伊kah押沙龙便是同父母ê亲兄妹。作者讲「她玛」是生做「真súi」。可惜,伊ê súi并无为伊带来幸福,反tńg是为伊带来灾祸。Á暗嫩是大卫ê大kiáⁿ,ē-sái讲是继承王位ê第一顺位者。因为án-ne,若伊真正是疼上她玛,其实,只要向老父大卫提出要求,á是thèng候大卫往生后,就ē-tàng真顺利ê娶她玛过门做bó͘(参考第13节b句)。因为án-ne,chia讲暗嫩想「亲近」她玛,只不过是一种生理上欲望ê需求而已。「相思成疾」,表示暗嫩已经因为án-ne出现「变态」ê状态。这mā是为甚么后来伊tī性侵成功了后,看tio̍h她玛反tńg「非常讨厌」伊,而且赢过爱伊ê程度(参考第15节)。Chia讲「约拿达」是「示米亚」ê kiáⁿ,而「示米亚是大卫ê兄哥」,án-ne,「约拿达」就是暗嫩ê堂兄弟。作者形容伊是一个「奸巧」ê人。Chia ê「奸巧」是teh指聪明、伶俐,m̄-koh却无伦理、道德规矩ê观念。Ná亲像伊甸园里ê蛇仝款(参考创世记三:1)。伊来关心暗嫩消瘦ê原因,暗嫩坦白相告,讲伊爱上了「同父异母」ê小妹她玛。Chit种Tī圣经早期时代是普遍ê事(参考创世记二十:12),尤其是tī东方社会mā真普遍。后来,比较晚期了后,律法上就有明文规定禁止chit款tāi-chì(参考利未记十八:9)。

第5到6节,就án-ne约拿达想一个计谋,伊ài暗嫩先假做破病,好引诱小妹她玛接近身边而kā它性侵。Koh khah惨ê,就是chit-ê诡计iáu giú大卫tī不知情之下mā有参与。

第7到11节,就án-ne,大卫打发人去kā cha-bó͘-kiáⁿ她玛讲,ài伊去暗嫩hia做kóa食物hō͘伊食。暗嫩利用chit-ê机会叫宫中服侍者闪开,然后ài她玛亲自喂伊,就tī hit时,伊要求她玛kah伊困。

第12到14节,她玛对暗嫩chit种突如其来ê粗暴举动,感觉非常惊kah gāng去,伊一再要求暗嫩bē-tàng做chit款tāi-chì,伊mā提醒暗嫩,若是chit款tāi-chì被传扬出去,会hō͘伊「tī以色列人面前丢尽面子」,而伊mā会tī人面前「扛不起头来」。伊劝暗嫩去向老父大卫王祈求,伊相信老父一定会应允in结婚。M̄-koh已经是病态ê暗嫩听bē落去小妹chit种劝言,就án-ne性侵了家己同父异母ê小妹她玛。Án-ne,暗嫩若是真正beh圆满处理chit件事,只有一条路thang行,就是去kā老父大卫讲,请求允准kah她玛结婚,若无,她玛就无法度koh再嫁hō͘别人。因为若是她玛嫁hō͘别人ê时,无告知对方家己已经无koh是处女,hit-ê娶她ê人就ē-tàng控告女方欺骗,并且thang kā她离掉。若án-ne,她玛可能tio̍h面临被判死刑ê恶果(参考申命记廿二:20—21)。

第15到19节,tùi暗嫩ê反应就ē-tàng看出伊并m̄是真正爱她玛,只不过是想beh满足家己ê欲望而已,á是beh显示伊ê权位。当伊满足了欲望了后,随时beh kā她玛赶出伊ê宫殿,而她玛清楚提醒暗嫩伊án-ne赶伊行所犯ê 错误,kā比强暴伊koh khah严重。因为这等于是beh hō͘她玛终身无法度koh再嫁别人,除非有大卫王kā伊配婚hō͘平民。因为伊已经m̄是处女。可惜ê是「暗嫩m̄听」,chit句话表示暗嫩并无清楚结果ê严重性,伊叫奴仆kā她玛赶出去,她玛因为án-ne悲伤到极点,因为她玛mā是大卫ê cha-bó͘-kiáⁿ,而且老母mā是基述王ê cha-bó͘-kiáⁿ玛迦。换句话讲,她玛tī所有大卫ê kiáⁿ中,算是贵族背景出身。却被暗嫩厝里ê奴仆「赶出去」,这又koh是另外一种重大侮辱,而且造成极大ê伤害。其实,chiah-ê奴仆是连摸到伊ê衫裤lóng m̄配ê人。因为伊原本是去听老父大卫ê指示,去服事可能kā继承王位ê大兄暗嫩ê,所以,伊穿插真正式ê衫裤—未婚公主常穿ê「长袖棉袍」,这是一种贵族chiah穿ê衫裤,是彩色ê,ná亲像雅各送hō͘约瑟ê彩衣(参考创世记三十七:3)。Thang了解她玛伤心到极点,伊用几个方式来表达:一是「掖灰tī头壳顶」,chit种方式表示家己真「贱」,无价值。二是「双手蒙tio̍h面」,chit种方式是teh表明见笑,无面见人ê意思(参考耶利米书二:37)。三是「拆裂衣袍」,tī chia mā用来表示伊ê愤怒,因为伊ê「处女身」已经被侵犯、破坏。四是「一面行一面哭」,这是非常哀伤,mā说明性命中siōng大ê无奈,m̄-koh mā teh表示求助。

第20到22节,她玛ê兄哥押沙龙知影chit件事了后,安慰她玛,并且收留伊。有人去kā大卫讲,伊mā「非常受气」,而押沙龙则对暗嫩「怀恨极深,无koh kah伊讲话」。

重新查询 专卷研经 撒母耳记下系列
错误回报,请联系comm[@]fhl.net