撒母耳记下 13章23节 到 13章39节   背景资料  上一笔  下一笔
Chit段经文记载她玛ê兄哥押沙龙终其尾替小妹报仇,杀害暗嫩,m̄-koh却因为án-ne惊惶老父大卫惩罚而逃离王宫,走tńg来老母ê娘家基述去避难。

第23到24节,chia一开始就讲「两年后」,表示chit件事大卫都无适当ê处置。Á这「两年后」,mā teh表示chit件事已经tī宫廷内渐渐被bē记得。M̄-koh押沙龙会记得非常清楚,伊是一再teh计划chhōe机会beh报仇。伊利用游牧民族是重大ê「剪羊毛过节」活动,「邀请所有王子」,这表示押沙龙是策划好beh为小妹被奸污ê报仇之机会来à。同时,伊mā邀请伊ê老父大卫kah臣仆参加,m̄-koh大卫坚持无参加。

第25到27节,押沙龙是一个思虑真深ê人;伊故意讲邀请「王kah所有ê臣仆光临」chit pái ê节期活动,这等于是举办了一pái宫廷盛宴仝款,伊有意用chit种动作,显示家己ê能力。M̄-koh khah重要ê,伊是beh用chit种方式,避免大卫出席,m̄-koh却thang得tio̍h大卫答应hō͘ in某种程度ê面子。大卫bē出席是有原因ê,因为伊若答应押沙龙chit pái ê请求,以后伊ê tó一个gín-á仝款请求,伊一定lóng tio̍h答应,而且劳动kui个宫廷百官,除非chit-ê gín-á是准备ài继承王位者。Á hit时王位ê「准」继承者,是暗嫩。因为án-ne,大卫一定tio̍h考虑tio̍h暗嫩ê角色。押沙龙应该知影chit种情形,伊会有chit种动作,其实,lóng是beh hō͘暗嫩注意tio̍h chit种问题。押沙龙利用老父大卫ê实力,邀伊「至少请hō͘我兄哥暗嫩kah我去」,chit句话已经露出押沙龙ê动机kah用意。大卫似有警觉tio̍h,因为án-ne伊回应讲「何必要伊去neh」chit种话。因为tī第22节已经有说明押沙龙对暗嫩性侵伊小妹她玛ê事耿耿tī怀,而且无koh kah暗嫩「讲话」,chit件事大卫必定知影,因为伊ê众kiáⁿ lóng是宫廷要员,tī国王面前随时lóng会有宫廷「会报」。因为án-ne,大卫对押沙龙坚持beh暗嫩出席,感觉事有蹊跷。因为án-ne,表示无chit种需要。M̄-koh因为押沙龙「koh再三恳求」,大卫终其尾答应,m̄-koh这是「hō͘暗嫩kah王其他ê kiáⁿ」同齐参加押沙龙ê邀宴。大卫后来同意暗嫩参加,可能是想藉这而ē-tàng消弭兄弟两人间ê嫌隙,有可能mā是一件美事。M̄-koh为tio̍h beh预防意外,伊hō͘所有ê兄弟lóng同齐出席chit pái ê盛宴。Á押沙龙准备ê宴席,有ná国王teh宴请国宾一般ê丰盛,表明ê是押沙龙án-ne大手笔ê排设宴席,确实隐含beh杀害暗嫩ê讯息。

第28到29节,chia讲出押沙龙排设此宴席真正目的,就是一场「鸿门宴」,准备ài杀害暗嫩,表面上是替小妹她玛报仇,真正目的是排除伊继承王位ê绊脚石。果然,伊下令随从利用暗嫩lim醉ê时chūn,下手kā暗嫩杀害这mā是回应了大卫杀害乌利亚了后,先知拿单chìn前传达上帝ê信息hō͘大卫ê时所讲ê::「Taⁿ 刀剑会永远无离开你ê 家,因为你看轻我,娶赫人乌利亚 ê bó͘ 做你 ê bó͘ 。(全民版)」(十二:10)大卫其余ê kiáⁿ看tio̍h lóng骑tio̍h「骡子逃走」。暗嫩强奸家己ê小妹固然是错误而且bē-tàng原谅,m̄-koh,押沙龙谋刣家己ê兄哥koh khah是无法度原谅。
第30到33节,chit件惨案发生后,随时有人传报消息hō͘大卫,讲押沙龙刣死大卫「所有ê kiáⁿ,一个mā无留落来」,这是混乱中ê 错误讯息,m̄-koh却是thang理解。因为大卫ê众kiáⁿ尚且teh逃命中,并m̄知押沙龙是m̄是会派出杀手继续tī途中追杀其他ê人。Ná亲像大卫kah拔示芭所生落来ê第一个kiáⁿ重病ê时仝款,大卫除了拆裂衫裤表示极大哀伤外,mā用「躺tī土脚」,表示家己甚么lóng m̄是。国王ê chit-ê尊荣已经无意义。Á传报正确ê消息hō͘大卫知影是「约拿达」chit-ê人,伊就是两年前替暗嫩献计ê恶棍(参考十三:3—5),暗嫩就是因听从伊ê计谋,chiah会致使今á日ê结果。虽然伊所报告ê情景是明确,m̄-koh伊并无讲出实情,反tńg是强化押沙龙tī大卫心中ê恶质形像。伊是hit种专门提供pháiⁿ计谋ê人,是心地奸巧、心术不正ê人,chit种人虽然知影可能会发生tāi-chì ê结果,m̄-koh并无会对所做错误 ê事感觉见笑。

第34到36节,chit件谋害家己兄哥ê事件引起大卫ê愤怒kah伤痛,因为án-ne押沙龙一定tio̍h逃走避难,因为in老父大卫必定会采取惩罚行动。M̄-koh这mā暗示了宫廷内部必定有真chē暗争权位ê浪潮。大卫其他ê kiáⁿ mā陆续tùi「何罗念」山坡顶tńg来,in是一面行一面大哭,大卫kah所有宫廷内ê臣仆mā tòe啼哭,对大卫ê众kiáⁿ来讲,in tú经历一场怵目惊心ê兄弟残杀之现况,心内iáu有余悸。

第37到39节,押沙龙是逃tńg来伊外公「达买」(参考三:3)ê厝去bih起来,时间长到「三年」。这ē-sái讲是一段不短ê时间,mā表示伊已经丧失王位继承权ê机会。Á相对ê是Tī chit段时间中,大卫一直teh为暗嫩被刣ê事「哀伤」。M̄-koh tī悲伤过了后,伊koh想起了押沙龙。这mā说明过去大卫为暗嫩哀伤ê事,已经得tio̍h安慰。

重新查询 专卷研经 撒母耳记下系列
错误回报,请联系comm[@]fhl.net