撒母耳记下 12章1节 到 12章25节   背景资料  上一笔  下一笔
对kui个以色列民族来讲,先知角色ê重要性是khah赢过君王ê。原因是先知是上帝直接拣选ê奴仆,传达tio̍h上帝ê信息,亲像摩西、约书亚等lóng是由上帝直接拣选出来带领以色列人民。甚至早期先知是领受上帝ê命令去膏立君王,ná亲像先知撒母耳仝款。因为án-ne,先知ê权威性tī以色列人民中间,有非常重要ê地位。

先知拿单是既勇敢koh忠实tī上帝ê先知,上帝beh伊去向大卫传话,伊听上帝ê话就去向大卫王传讲上帝受气ê信息。这tī当时是一件非常危险ê举动,原因是大卫拥有极大ê权柄,是以色列全国人民歌颂、o-ló ê君王,ná亲像tī主前第八世纪ê先知米该雅,冒tio̍h性命危险去向北国以色列ê君王亚哈讲出上帝ê信息仝款,结果米该雅被亚哈王下令关tī监狱里(参考列王记上廿二:26—27)。chit-má先知拿单受命tio̍h kā上帝ê话语传达hō͘大卫王,mā是仝款tio̍h冒性命ê危险。

Chit段经文是先知拿单领受上帝ê命令,beh去对大卫王传达上帝愤怒ê信息。先知拿单ē-sái讲是一位非常真gâu讲譬喻(故事)ê专家,当伊讲完譬喻了后,大卫王iáu m̄知先知拿单ê譬喻中间,所指ê就是伊,iáu tio̍h等到先知拿单直接指出「你就是hit-ê人」了后,大卫chiah猛然醒悟过来。

第1到4节,chit段经文记载先知所讲ê譬喻内容。Tī第十一章27节真清楚记载上帝对tī大卫所犯ê刣人、奸淫罪,「十分不悦」,就án-ne差遣先知「拿单」去对大卫讲话。当然,上帝已经有hō͘先知拿单知影ài伊去传讲ê是甚么,因为án-ne伊到à大卫hia开始对伊讲上帝beh带hō͘伊ê信息。先知拿单所用ê是鲜明对比之譬喻方式,说明富有ê人拥有牛羊真chē,而sàn-chhiah ê厝边只有一只小羊,因为拥有真chē牛羊ê富者,竟然是欺负只靠tio̍h一只羊过生活ê贫者。

第5到6节,这hō͘大卫听了后非常火大,认为该富者做残忍ê事,应该tio̍h处死,而且tio̍h赔偿贫者损失ê羊四倍。

第7到12节,大卫显然无听出先知拿单用chit-ê譬喻是teh指责伊就是chit-ê比喻中ê富者,因为án-ne chiah会讲出「做chit项事ê人该死」、「做出án-ne残忍ê事」,以及做出应赔偿穷厝边「四倍」ê判决。就án-ne先知拿单就直接指出做chit种「该死」、「残忍」ê事ê人,就是大卫家己。

先知拿单举出上帝非常愤怒ê原因,包括有:上帝赏赐hō͘大卫ê实在siuⁿ chē,而伊却是贪婪到丧失良知。大卫iáu借tio̍h亚扪人手上ê刀刣死乌利亚,然后抢去乌利亚ê bó͘。上帝就án-ne做出判决:大卫ê厝会永远逃离不了刀剑,而且厝里ê人会起来作乱攻击大卫,伊抢夺乌利亚ê bó͘,伊ê kiáⁿ会抢夺伊ê妃嫔,而大卫tī暗中所做ê chit件事,会tī日光下暴露出来(参考路加福音十二:2)。上帝án-ne对大卫kah伊ê厝ê惩罚,ē-sái讲是非常严重ê,原因是大卫是上帝拣选出来ê奴仆。上帝拣选ê奴仆故意犯chit种杀害无辜ê罪,上帝绝对bē轻轻放过。先知拿单Tī chit段经文中所讲ê,后来tī大卫ê身上lóng一一应验ā。

第13到15节a句,当先知拿单清楚指出大卫ê严重错误后,大卫终其尾承认家己所犯ê过错,是「得罪上主」,原因是犯上帝ê诫命、规律。值得注意ê是,伊m̄是讲得罪「乌利亚」á是伊ê全家,却是讲「得罪上主」,原因是伊知影会犯chit种罪,就是因为无尊崇上帝为大,却是kā上帝ê教导lóng bē记得,甚至心内中根本就是m̄是认上帝,这是傲慢者藐视上帝ê态度(第14节)。chit-má伊知影上帝是为无辜ê乌利亚被杀害ê事惩罚伊。因为án-ne,当伊讲「得罪上主」chit句话ê时,意思是teh向上帝表示忏悔,祈求上帝ê赦免、怜悯。M̄-koh tio̍h注意,上帝虽然「赦免」伊,m̄-koh这并无表示上帝不惩罚伊,上帝iáu是有惩罚,beh hō͘伊kah拔示芭所生落来ê gín-á往生。

问题是:gín-á是无辜ê,为甚么beh hō͘大卫ê罪,由伊tú出世ê gín-á来承担死ê惩罚?mā允准以án-ne了解:chit-ê gín-á一出世落来,就死去,可能kah某种病症有关,m̄-koh圣经作者认为是kah大卫kah拔示芭之间ê犯罪行为有密切关系,是上帝惩罚ê结果。Koh讲,chit-ê gín-á若是留落来,会一直成做大卫khiap-sì ê记号,因为这是iáu未结婚前,而且犯奸淫罪所生ê gín-á。若是chit-ê gín-á继续活着,会成做大卫犯罪ê证据,hō͘伊tī以色列人民中间有一个错误 ê样版,甚至被模仿致使pháiⁿ了以色列人民ê社会规范,hō͘伊无法度继续统治以色列帝国。拿单kā上帝ê信息传达完成后,就随时离开王宫。这表示先知拿单并m̄是王宫所「御养」ê先知。伊是真正先知,mā m̄是用靠国王供奉生活(参考阿摩司书七:14)。

Chit段经文记载当大卫kah拔示芭犯奸淫罪了后,in所生落来ê gín-á生重病ê时,大卫是真努力地想beh抢救gín-á,m̄-koh tī抢救失败了后,大卫ê反应完全无仝ê经过。

第15节b句到17节,大卫kah拔示芭所生ê gín-á害重病,这真清楚是出tī上帝ê旨意。大卫为gín-á生重病「禁食」,这是以色列人民表示哀伤、忏悔,以及tī信仰上表明决志ê方式(参考撒母耳记上七:6、三十一:13,撒母耳记下一:12,历代志下二十:3,以斯拉记八:21—23,以斯帖记四:15—16,诗篇三十五:13、六十九:10,但以理书九:3,约拿书三:5,使徒行传十三:3、十四:23)。大卫希望用chit种方式来平息上帝ê愤怒。Koh讲除了「禁食」之外,伊mā用「整夜躺tī土脚」这方式,来表明家己ê卑微。即使是宫廷里ê「老侍从」,mā lóng无法度劝动大卫进食、tī床铺上困。

第18到21节,过了「一礼拜」久,chit-ê gín-á死去,宫中ê chiah-ê老臣反tńg m̄敢去kā大卫讲,深恐伊会因为过度忧伤而自戕。M̄-koh大卫发觉宫廷内ê侍卫举止有异,就án-ne察问了一下,就明白gín-á已经死去。就án-ne伊开始洁身沐浴,mā无koh禁食,然后koh到「上主ê殿宇敬拜」。这表示伊koh开始kah恢复以前仝款,看起来,大卫kah-ná已经得tio̍h上帝ê接纳,原谅伊过去所犯ê罪。M̄-koh伊chit种做法反tńg hō͘大家lóng感觉非常ê gông-gia̍h,因为án-ne,chiah-ê老臣就问大卫原因。

第22到23节,chit两节是大卫回答老臣所提ê问题。伊原本想beh用chit种方式换来上帝怜悯。M̄-koh显然地,并无成功。这mā说明上帝beh审判一个人ê时,并m̄是人用各种「哀伤」、「鞭phah己身」ê方式thang改变。上帝自有他一套法码当做惩罚ê标准。大卫chit-má明白,这既然是上帝已经决定beh执行ê审判,因为án-ne,gín-á已经死去,就表示任何人ê能力mā无法度改变上帝ê旨意。「有一工我beh到伊hia去」,这是大卫ê期待。伊知影,家己有一工mā会死,因为án-ne,伊期待ē-tàng因为án-ne而见tio̍h chit-ê gín-á,mā tùi chia thang看出伊对chit-ê gín-á用情之深。

第24到25节,大卫转而去安慰拔示芭,伊希望用继续同房ê方式,hō͘拔示芭再生下gín-á,以减去因第一个gín-á往生ê忧伤。「所罗门」因为án-ne出世,chit-ê名kah希伯来文ê「shalom」仝款,是teh指「和平」、「平安」ê意思(参考历代志上廿二:9)。Chit时chūn,先知拿单奉上帝ê命令,去探望大卫,并且去为大卫所生ê chit-ê gín-á所罗门号名叫「耶底底亚」,表示「上帝喜爱」所罗门。Chit-ê意思真清楚,表示上帝前对大卫ê应允,是继续有效ê,并无会因为大卫犯罪就消失à。Mā就是大卫ê后代kā永远保有王朝(参考撒母耳记下七:13—16),chit对大卫来讲,ē-sái讲是siōng大ê应允。

重新查询 专卷研经 撒母耳记下系列
错误回报,请联系comm[@]fhl.net