撒母耳记下 11章1节 到 11章17节   背景资料  上一笔  下一笔
第十一到十二chit两章是记载有关大卫王犯奸淫、刣死无辜ê之罪行,以及先知拿单受上帝差遣对大卫王讲出严厉谴责ê记事。M̄-koh chit件事并无出现tī官方文献ê历代志中,真有可能chit-ê资料是记载tī先知拿单所记载之史料里(参考历代志上廿九:29),m̄-koh并无被官方史料所接受。Chit两章ê背景,是第十章所记载以色列军队正teh对抗亚扪军队,大卫并无亲自带兵出征,却是派大元帅约押带兵出去攻打亚扪,伊留tī宫中,结果因为看见家己爱将 ê bó͘拔示芭而做出无应该做ê罪恶之行为。

Chit段经文是记载大卫无tòe军出征,家己留tī耶路撒冷王宫内,m̄-koh却因为án-ne而看tio̍h附近房舍中,当teh沐浴ê乌利亚bó͘拔示芭。Tī大卫王看起来,拔示芭ê美,有ná仙女般ê艳丽,因为án-ne,随时想出所有ê办法beh夺tio̍h拔示芭入室做bó͘。其实,本来大卫并无想beh娶拔示芭入宫ê念头á是计划,却是只想beh kah拔示芭同床而已。M̄-koh却因为拔示芭有娠,而且乌利亚koh拒绝tī交战期间kah bó͘同房,hō͘大卫原本计画kā有娠归入tī乌利亚身上ê事失败。M̄-koh大卫惊此奸淫ê丑事暴露出来,就án-ne chiah想出所有ê办法beh害死拔示芭ê丈夫乌利亚。Chit段经文就是teh描述大卫想beh尽一切办法,beh利诱乌利亚tńg去厝里kah bó͘拔示芭同房ê计划,m̄-koh都无成功ê经过。

第1节,chia一开始讲「第二年春天」,tī第十章14节记载以色列军队kah亚扪、叙利亚等联军第一回合交战,以色列军队phah赢了后,随时班师tńg来营,无趁胜追击,原因就在tī寒天季节已经来临,tī补给kah军伍调动上并m̄是真方便。Chia讲是tī「第二年春天」chit-ê时间真可能就是春季收割了后ê时间,mā是气温tńg来升ê时刻,是适合军事行动ê时chūn。「大卫派约押率领部队」出征,伊家己留tī耶路撒冷,而值得注意ê是chit pái mā kā「约柜」扛出tòe军队去征(第11节),为甚么大卫会án-ne做?咱无清楚。Chit pái ê战役,mā是以色列军队phah赢。

第2到5节,大卫因为看见拔示芭teh洗身躯而起了淫乱ê心念,派人kā拔示芭带来同房,致使拔示芭有娠。拔示芭是迦南地原住民「赫人」乌利亚ê bó͘,而伊mā是属tī外族人「以连ê cha-bó͘-kiáⁿ」。Tī大卫ê军队中,有「赫人」加入伊ê行列中(参考撒母耳记上廿六:6)。乌利亚mā是大卫军营中ê kā官,并且是大卫军队中被列为「三十勇士」ê成员之一(参考廿三:39)。Á「以连」mā是大卫身边ê「三十勇士」之一,是基罗人亚希多弗ê kiáⁿ(参考廿三:34)。Tùi chia可见乌利亚kah以连之间ê关系是非常密切ê,in lóng是大卫手下siōng忠实ê部下。Tī第4节ê「拔示芭ê月经tú洁净」chit句话非常重要,表示拔示芭有身孕,是kah大卫同房ê关系,而chit对拔示芭来讲,是一件非常严重ê事,因为这表示伊犯淫乱罪。Tùi伊写phoe而且托人带去hō͘大卫王,thang看出问题ê严重性已经到à牵涉生kah死ê性命大事。

第6到10节,大卫听tio̍h了拔示芭有娠ê事,开始紧张起来。照摩西律法ê规定,tio̍h处死刑(参考利未记二十:10)。大卫随时ài约押kā chit位饶勇善战ê军官乌利亚tùi前线kā伊chhōa tńg来。大卫假做关心前线战况,其实chit种问话,只不过是一种藉口而已。伊真正用意是命令乌利亚「tńg去厝里歇困一下」,并且iáu派人带「礼物」跟tòe去,这是企图盯tio̍h乌利亚是m̄是真正有tńg去厝里。若是有,就ē-tàng掩盖bó͘有娠是kah大卫有关系。M̄-koh tī以色列军队有一个传统,就是tī战争期间,战士bē-tàng kah bó͘同房。因为án-ne,如果乌利亚tńg去厝里,即使无kah bó͘同房,m̄-koh只要tī厝里过瞑,就thang被以战ê时kah bó͘同房ê罪名被起诉判处死刑。因为根据摩西律法ê规定,以色列军队「tī战地扎营ê时chūn」,tio̍h「远避」任何会hō͘军人tī「礼仪上无清气ê事」,甚至包括cha-po͘人暗时困有「梦泄而无清气」ê事,lóng需要离开军营,而且tio̍h先洁身了后chiah thang tńg来营区(参考申命记廿三:9—11)。Á tī战争期间若tńg去厝里bó͘同房,就会hō͘人看做是无清气ê行为(参考撒母耳记上廿一:5)。因为án-ne,以色列军队绝对m̄准战争期间发生tńg去厝里kah bó͘同房ê事。因为in会kā相刣看做是一件神圣ê事,何况chit pái ê战役有约柜参与出征(参考十一:11)。

「m̄-koh乌利亚并无tńg去厝里」,chit句话讲出kui个故事ê重点。伊坚持遵守以色列军队ê传统军纪,而且,为tio̍h beh表示确实清白,伊m̄-nā无tńg去厝里,iáu kah「王ê守卫困tī宫殿门口」,án-ne,王ê守卫mā thang当伊ê证人,证实伊确实无tńg去厝里kah bó͘同房。Á大卫问乌利亚「为甚么不tńg去厝里」ê话,并m̄是teh表示伊关心,却是伊koh khah担心乌利亚听tio̍h了bó͘有不轨ê风声。其实,这mā看出了君王家己不守规律,而部下却坚守规矩,tùi chia看出二者之间ê差别,mā是引起上帝愤怒ê原因。

第11到13节,chit段经文是乌利亚回应大卫询问为甚么不tńg去厝里困ê理由。伊提起军队lóng tī前线,约柜有tī hit-pêng,部队tī野外扎营(表示生活lóng真精省),伊绝对bē-tàng家己tńg去厝里kah bó͘同床。M̄-koh大卫却一再ài乌利亚tńg去厝里困,m̄-koh乌利亚无当面抗拒,iáu是仝款坚持不tńg去厝里。Á大卫却故意hō͘伊lim醉酒,想用chit种方式hō͘乌利亚陷落in设计ê陷阱中。M̄-koh乌利亚照常坚持守tiâu前线战争期间,不tńg去厝里kah bó͘同床ê规律。

第14到17节,chit段经文描述大卫第三pái计谋陷害乌利亚,伊为tio̍h beh杀害乌利亚已经是到à无所m̄免其极ê恶质手段。前两pái ê失败,chit pái伊决定kā乌利亚刣死。伊写phoe hō͘元帅约押,信ê内容真清楚,就是beh hō͘乌利亚tī前线siōng危险ê地带,陷入孤单一个人,lóng无奥援而「战死」战场。大卫chit种做法真清楚是teh无辜ê人,这mā是上帝siōng无法度原谅ê行为(参考出埃及记廿三:7,列王记下廿一:16、廿四:4,箴言六:16,耶利米书七:6、廿二:3)。Á约押是参与chit件害死乌利亚ê共犯。大卫认为伊这杀害无辜ê密令无人知影,m̄-koh约押是执行这命令者,至少伊知影大卫做chit件无应该做ê事loh。Tùi第17节ê「敌军tùi城里出来,突击约押ê部队」tùi chit句话,thang看tio̍h两点:一是以色列军队原是kā亚扪人ê「拉巴城」包围teh(参考撒母耳记上十一:1),taⁿ围城ê以色列军队被亚扪人看tio̍h有个缺口,chiah hō͘ in想beh突破重围,走chhōe外援,á是用突破被围城ê困境,展开内外夹攻ê策略。二是这真可能是约押故意弄出来ê破口,为tio̍h beh完成大卫计划陷害乌利亚ê命令,m̄-koh却因为án-ne hō͘ koh khah chē ê军官有kóa战死,thang看出大卫为tio̍h beh杀害乌利亚,却mā因为án-ne而害死其他军官,代价ē-sái讲是非常大。伊完成了「赫人乌利亚mā阵亡」chit-ê任务。M̄-koh伊bē记得上帝痛恨这一切。

重新查询 专卷研经 撒母耳记下系列
错误回报,请联系comm[@]fhl.net