撒母耳记下 11章18节 到 11章27节   背景资料  上一笔  下一笔
Chit段经文描述约押完成了大卫所交带害死乌利亚后,随时派人向大卫报告chit-ê消息,当大卫tī知影乌利亚战死前线ê消息了后,就kā kah伊通奸而有娠ê拔示芭娶入宫。当计谋害死人ê人认为都无人知影ê时,其实,圣经作者beh kā咱讲,上帝非常清楚人tī暗中所做ê一切事(参考路加福音十二:2),上帝一定会算帐。

第18到21节,当「约押kā战事ê经过呈报大卫」,因为这是一项害死前线kā官ê谋刣案,因为án-ne,约押真清楚大卫可能会「假做发怒」。为免通报者mā被无故遇tio̍h惩罚,约押就事先提醒通报战况ê使者知影chit-ê tāi-chì。伊ài通报者带tńg去战报,而且hō͘通报者知影大卫可能会以当年「基甸ê kiáⁿ亚比米勒」往生ê经验(参考士师记九:50—57)反问通报者,kah-ná大卫会谴责前线指挥官约押明明是就是亲像一个笨蛋、愚戆到极点,约押ài chit位通报官hō͘大卫知影,如果大卫讲基甸chit-ê故事,就回应一句「王ê军官乌利亚mā死去」chit种话就有够。因为chit句话已经teh暗示约押会án-ne做,就是为tio̍h beh完成大卫ê密令。因为án-ne,chit句「王ê军官乌利亚mā死去」,就成做一句大卫kah约押之间ê暗语,mā同时teh表示大卫beh负起chit pái以色列军队被亚扪军刣死真chē ê责任。即使án-ne,m̄-koh共谋设计杀害无辜ê约押,绝对无法度逃离上帝公义ê审判。

第22到24节,chit位前线战况通报官当然beh照指挥官ê指示报告大卫。Chit位通报官tùi「敌军比咱khah强」到「阮kā敌军赶tńg去城门口」,chit中间主要就是beh hō͘乌利亚战死。所以「敌军比咱khah强」,真相是故意后退,诱惑敌军出城。就tī chit时,以色列军队紧急撤退,hō͘乌利亚身陷前方敌阵中,tī孤独、无奥援之下被刣。Chit时,约押chiah koh再挥军进攻,逼亚扪军队tńg来防。其实,「赫人乌利亚mā死去」,án-ne chiah是kui个报告中ê重点。

第25到27节,拔示芭听tio̍h丈夫乌利亚战死战场ê消息了后,照以色列人民办理丧事ê风俗,需要举哀长到七工ê时间(参考撒母耳记上三十一:13)。M̄-koh即使是án-ne照风俗去行举哀ê动作,mā是为tio̍h掩盖(khàm)伊所犯ê罪而已,并m̄是真实ê。人心ê险恶就是án-ne,m̄-koh lóng无法逃过上帝对人心内ê鉴察。Tī丧事过了ê时间,大卫就正式地娶拔示芭入王宫。大卫若无án-ni做,拔示芭有娠ê事真紧to̍h会曝光。M̄-koh chit件隐藏得非常细腻ê刣人案件,上帝是非常清楚,因为án-ne,上帝「对大卫所做chit件事十分不悦」,chit句mā ē-sái讲是chit章经文siōng中心ê一句话。Kui章经文真清楚teh说明,人认为tī暗中所做ê事无人看tio̍h,mā bē有人知影。其实,chit种想法、看法lóng是错误 ê。

重新查询 专卷研经 撒母耳记下系列
错误回报,请联系comm[@]fhl.net