Chit段经文叙述耶户怎样进行叛变ê军事行动。伊hō͘以色列王约何兰lóng无防备之下，杀害约何兰，并且夺取伊ê王位。

第14到16节，chit段经文真清楚讲出耶户确定进行叛乱ê工作，而且ài拥护伊ê部下绝对bē-tàng tùi基列ê拉末离开去耶斯列通风报信。Á hit时，ná亲像第八章28到29节所提起ê，约何兰因为kah叙利亚相战受伤，当teh耶斯列疗伤，而犹大王亚哈谢因为kah以色列ê约何兰联盟出兵，因为án-ne，伊tú好mā去探望。

第17到20节，当耶户亲自率领军队前往耶斯列城ê时chūn，守望台顶ê守卫看tio̍h，就赶紧提出警告。Á约何兰听tio̍h了后，随时派出骑兵去了解。结果chit-ê骑兵并无tńg来，因为被耶户收留了起来。Mā就是耶户m̄ hō͘ chit-ê出来了解实况ê骑兵tńg去通风报信。就án-ne守卫感觉奇怪，koh再警告。约何兰koh一pái派出第二个骑兵出城去了解实况，chit-ê去ê人也kah第一个仝款。Chit-ê守卫者koh一pái警告。因为这表示若m̄是死tī敌方ê手里，就是hō͘俘虏，若无，就是加入敌方ê行列。Chit-ê守卫非常尽责地提出koh khah清楚ê警告，讲：「hit队人ê首领kah-ná痟ê赶车，真亲像耶户。」

第21到22节，约何兰一听chit-ê消息，随时表示家己亲自去了解到底耶户—伊ê部下，án怎会án-ne。而且亚哈谢mā tòe乘tio̍h家己ê马车陪同前往。当in遇tio̍h了耶户ê时，问耶户是m̄是带来平安？耶户真清楚表示国家乱象一大堆，人民都无平安ê生活。

第23到26节，chit时chūn，约何兰chiah清楚原来耶户叛变à。因为án-ne，伊一面逃，一面向亚哈谢喊叫，讲「反了」，表示这是叛变，ài亚哈谢赶紧逃离。M̄-koh当约何兰teh逃离ê时，耶户用尽所有ê气力，射出弓箭，就án-ne射中伊ê背部，穿过心脏。就án-ne约何兰死tī伊ê马车上。耶户下命令ài部下kā约何兰ê尸体tàn tī拿伯ê田里，这tú好应验ā先知以利亚当年对亚哈所讲ê话（参考列王记上廿一：19）。