Chit段经文叙述上帝奇妙ê作为，就是hō͘包围撒马利亚城ê叙利亚军队，听tio̍h类似大批军队进攻ê声音而产生惊惶，丢下所有一切军备逃离军营，kan-taⁿ一夜ê时间，全部军营连一个叙利亚士兵mā无。M̄-nā解除了撒马利亚城内缺粮ê危机，mā应验ā以利沙所预言ê，会有真sio̍k ê粮食thang买卖，而chit-ê消息ê 回报，却是tùi四个准备向叙利亚军营投降ê癞ko病人，因发见实况带tńg来hō͘以色列王ê。

第3到8节，癞ko病人因为是hō͘隔离出来，生活ê需要一定tio̍h óa靠亲友ê接济chiah有办法。M̄-koh因为撒马利亚城内已经被敌军叙利亚包围，无亲友供应in ê需要。因为án-ne，in准备去叙利亚军营投降。In心内想，有可能án-ne可能得tio̍h食物thang充饥。M̄-koh无想tio̍h，当in来到叙利亚军营ê时，竟然发见营中无任何一个人，m̄-koh却充满tio̍h真chē物件。原来是上帝用一件特殊ê神迹，kah第六章17节上帝差遣天兵神将（火焰车kah火马）来干涉搅扰叙利亚军队仝款，hō͘叙利亚军队听tio̍h有「大队兵马kah战车前进ê声音」，赶紧hiat-ka̍k所有ê装备逃生，hō͘以色列军队根本无用一兵一卒，就白白得tio̍h一场胜利，而且得tio̍h叙利亚军队所有ê战利品。

第8到10节，chit四个癞ko病人进入空荡荡ê叙利亚军营，大肆搜刮一切财物，m̄-koh却想tio̍h án-ne真可能为家己带来严重惩罚，就án-ne赶紧tńg来撒马利亚城内去通报chit段消息。

第11到13节，当守卫城墙ê兵丁kā chit四个癞ko病人ê通报hō͘以色列王知影后，伊kah臣仆iáu是担心he是叙利亚军队ê诡计，想用chit种空城计活掠以色列军队kah人民，占领撒马利亚城。M̄-koh有国王幕僚认为横直已经缺粮到必死ê情况，掠准án-ne，不如派人出城去探望实况。Chia讲「chhun落来ê五匹马」，mā thang讲城内因为闹饥荒，连战马lóng刣来充饥，taⁿ只chhun五匹马而已，可见缺粮非常严重。