Chit段记事tī历史上真oh chhōe出明确资料，因为Tī chit段经文中，lóng只有提起叙利亚王kah以色列王，却都无提起这国王ê名，mā无讲出两国准备交战ê地点。M̄-koh chit段经文主要teh说明：上帝忠实ê奴仆以利沙，有能力thang知影人tī暗中所讲ê话。Á圣经kā咱讲，只有上帝chiah有chit种能力。因为án-ne，这mā teh表示，上帝赏赐hō͘以利沙有特别ê能力，hō͘伊ē-tàng知影叙利亚王暗中进行ê谋略，án-ne，以利沙kā chit件事hō͘以色列国王知影，tùi án-ne躲过一劫。

第8到10节，chia讲出以利沙有特别ê能力，thang知影叙利亚王kah伊ê臣仆商议怎样出兵攻打以色列ê城池。就án-ne伊派人送信hō͘以色列王，ài伊m̄-thang中了计谋。以色列王果然听从以利沙ê话，而且是「仝款ê事发生kúi-nā-pái」，这表示叙利亚王试图攻击以色列真chē pái，m̄-koh都无成功，因为有以利沙ê协助。

第11到17节，叙利亚王感觉奇怪，每pái beh出兵á是偷袭，lóng hō͘以色列王知影，伊怀疑有内奸。M̄-koh臣仆kā伊讲是以利沙先知知影人tī「困房内私下讲ê话」，这是非常特别ê神能之力。因为án-ne，叙利亚王就下令tio̍h掠以利沙。

「多坍」，chit-ê城离北国首都撒马利亚城只有十八公里远，而叙利亚ê军队ē-tàng phah到chia，tú好表示当时叙利亚ê军力甚强，大大超过以色列ê国防力量。当伊ê学生看见叙利亚军队来包围「多坍」想beh掠伊ê时，伊向上帝祈祷hō͘伊ê学生thang看见上帝差派来保护伊ê大军，结果上帝垂听以利沙ê祈祷，伊ê学生看见「山边布满火焰车kah火马，kā以利沙围teh。这表示上帝kah以利沙之间有非常亲密ê关系，上帝用chit种方式teh庇护以利沙。

第18到23节，当叙利亚出兵攻打多坍ê时chūn，以利沙koh向上帝祈祷，hō͘ chiah-ê军队「目睭失明」，果然chiah-ê叙利亚军队lóng失明，就án-ne，以利沙出来kā in讲行m̄-tio̍h去路，伊带chiah-ê目睭lóng chheⁿ-mê叙利亚军人行入撒马利亚城。然后以利沙koh祈祷上帝，开chiah-ê叙利亚军人ê目睭，上帝koh垂听伊ê祈祷。当chiah-ê军人开了目睭了后，chiah发见in已经进入撒马利亚城内，成做以色列ê俘虏。以色列王问以利沙，是m̄是ài kā chiah-ê敌人lóng总刣死？以利沙讲bē-tàng，而且tio̍h hō͘ chiah-ê叙利亚军人有「食物kah水，hō͘ in lim食；放in tńg来in ê王hia去」。以利沙用chit种方式，hō͘叙利亚tùi án-ne了后，m̄敢koh再侵犯以色列。原因是只要有以利沙tī teh，任何攻击lóng会白做无功。Koh讲，chit两节经文mā作了真好ê启示：好款待仇敌，是化解对敌、和平相处ê良药。