列王纪下 4章9节 到 4章37节   背景资料  上一笔  下一笔
Chit段经文thang对照第十七章8到24节,有关先知以利亚hō͘撒勒法ê寡妇ê独生kiáⁿkoh活ê记事。当时先知以利亚是伏tī已经死去ê gín-á ê身上,结果hō͘ gín-á koh活起来。chit-má以利沙mā是用仝款ê方法,结果这书念妇人ê gín-á mā koh活起来。

只是chit件神迹kah先知以利亚行神迹ê对象有别;这书念ê妇女是一个有钱人,而且m̄是寡妇。先知以利亚tī撒勒法tú-tio̍h ê chit-ê寡妇,是kā kiáⁿ ê死怪罪到先知以利亚身上,认为是因为以利亚到伊ê厝,chiah hō͘上帝「记起」伊ê罪,致使伊ê kiáⁿ死去(参考列王记上十七:18)。Chia则说明chit位有钱ê书念妇女是一个真聪明ê人,伊知影上帝ê奴仆先知以利沙必定会帮助伊ê kiáⁿ tùi死里koh活起来,因为伊原本bē有gín-á,是先知以利沙为tio̍h beh酬谢伊好款待伊,而祈求上帝赏赐hō͘伊ê。因为án-ne,chit-ê cha-bó͘人想ê是:原本是无可能ê事,既然tī先知以利沙ê身上显现出神迹奇事,chit-mágín-á死去,只要去chhōe先知以利沙就对à。果然,真正亲像chit位书念妇女所期待ê,伊ê gín-á有复活起来。

第8到10节,chia提起一个有钱ê书念妇人,伊因为邀请以利沙食饭后,而且以利沙每pái去书念lóng会去chhōe伊,结果hō͘这书念ê妇人发见,以利沙是「圣ê神ê人」,chit-ê意思是teh指以利沙是一个分别为圣ê人,á是讲伊是一个和平常ê人无仝款ê人。因为án-ne,伊建议丈夫tī楼顶加起一间小厝,hō͘以利沙以后来到伊家拜访ê时,thang有一个thang tòa ê所在。

第11到13节,以利沙为tio̍h beh感谢chit位妇人对伊ê好款待。因为án-ne,伊问chit-ê妇人ē-tàng为伊做甚么事,thang做回报。M̄-koh chit-ê妇人ê回应是「甚么lóng m̄欠缺」。

第14到17节,以利沙ê奴仆基哈西提意见,hō͘以利沙知影chit-ê妇人虽然富有,m̄-koh丈夫已经年老,ē-sái讲是in都无kiáⁿ。以利沙听了后,随时ài基哈西请chit-ê妇人来见以利沙,以利沙hō͘ chit-ê妇人知影,一年后ê chit时,伊「会抱一个kiáⁿ」,chit种应允对chit-ê妇人来讲,根本是无可能实现ê事。因为án-ne,当伊听tio̍h以利沙án-ne讲ê时,第一个反应是认为以利沙欺骗伊,m̄-koh以利沙无加讲甚么。结果一年后ná亲像以利沙所预言ê,chit-ê妇人真正生落来了一个kiáⁿ。

第18到27节,chit段经文描述经过几年后,chit-ê妇人ê gín-á忽然感觉剧烈头壳痛,无jōa久就往生。Chit-ê妇人kā chit-ê kiáⁿ抱入去起hō͘以利沙tòa ê房间,然后ài丈夫替伊准备好势驴á hō͘伊赶去chhōe以利沙。虽然丈夫bat提醒伊可能会chhōe bē-tio̍h先知,m̄-koh伊坚持beh去chhōe以利沙,而且吩咐奴仆,加快脚步,除非伊讲,若无,途中绝对m̄-thang慢落来。以利沙远远就看见chit-ê妇人,并且派伊ê奴仆基哈西去询问伊是m̄是一切安好。当伊来到以利沙面前,就赶紧抱tio̍h以利沙ê脚。

Tī第23节chia,妇人ê丈夫提醒讲「今á日既m̄是安息日,mā m̄是初一」,意思是teh指这两工以色列人民lóng一定tio̍h停止工作,好专心敬拜上帝(请参考出埃及记十六:23;二十:9—10,民数记廿八:11—15,尤其是每年七月初一tio̍h koh khah特别,利未记廿三:23—25,民数记廿九:1—6)。因为án-ne若是,tī chit两个时间里到圣殿á是聚会ê场合,比较容易chhōe-tio̍h先知。若m̄是顶面所讲时间想beh chhōe-tio̍h先知是真困难ê。Ē-sái讲是chit位书念ê妇女则真有信心一定会chhōe-tio̍h以利沙。因为伊知影以利沙是神ê人,必定知影伊所tú-tio̍h ê困境。

第28到31节,以利沙一听chit-ê妇人kā伊讲,伊无向伊求过kiáⁿ,á是对生育怀有过任何希望,意思真清楚,是以利沙主动为伊向上帝求而得tio̍h kiáⁿ,m̄-koh taⁿ这希望koh破灭à。以利沙随时吩咐伊ê奴仆基哈西先去the̍h伊手上ê拐á khǹg tī gín-á面上,然后伊kah chit-ê妇人mā出发去书念ê厝。M̄-koh基哈西回报以利沙讲,gín-á并无koh活起来。Tī第30节chit-ê妇人讲「绝对bē离开」以利沙,chit种坚持,ná亲像福音书中hit位叙利亚ê腓尼基ê cha-bó͘-gín-á为伊ê cha-bó͘-kiáⁿ求耶稣基督ê医仝款(参考马可福音七:24—27)。结果伊得tio̍h了所beh ê,伊ê gín-á koh活起来。

第32到37节,ná亲像以利亚帮助撒勒法hit位寡妇ê kiáⁿkoh活起来仝款,chia以利沙mā用仝款ê动作「伏tī gín-á身上」,就án-ne,chit-ê gín-á「连phah了七个喷嚏,目睭就thí开来à」,然后kā gín-á交hō͘ chit-ê妇人,hō͘ chit-ê妇人非常感激地跪tī以利沙脚前,面伏地,然后带koh活ê gín-á离开。

重新查询 专卷研经 列王纪下系列
错误回报,请联系comm[@]fhl.net