Chit章主要teh说明摩押人想beh脱离以色列统治ê一场重要战争。编撰者tī chit章所描述ê以利沙，真亲像先知米该雅仝款，对国家beh战争ê事提出上帝ê信息。

Chit段经文讲述因为摩押beh脱离以色列ê统治，而引发以色列王约何兰决定出兵镇压。伊邀请犹大王约沙法联合出兵。M̄-koh当in出兵遇tio̍h困境ê时，约沙法王建议询问上帝ê先知，想beh知影上帝ê旨意。这kah列王记上第廿二章记载约沙法tī出兵chìn前，就先询问上帝ê旨意，真无相仝。

第1到3节，这是列王记编撰者真典型ê句型，先说明chit位统治ê君王在位统治jōa-chē年，了后，就是讲chit-ê君王「做上帝看做邪恶ê事」，用chit种句话来形容一个悖逆上帝旨意ê君王。不过，chia讲约何兰王比起伊ê「父亲和母亲耶洗碧」，伊是真chēà。因为mā kā老父亚哈为tio̍h拜巴力所建造ê神柱除掉，可惜，伊并无带领以色列人民tńg来归到上帝面前，敬拜上帝。

第4到8节，chia thang参考第一章1节，有提起亚哈王往生后，摩押国背叛以色列。Á chit-má是以色列王约何兰决定beh出兵镇压摩押。伊邀请南国犹大王约沙法mā同时派兵同齐去攻打。约沙法ê回答ná亲像伊当年回答亚哈准备出兵去攻打叙利亚仝款。因为攻打ê路线beh经过以东，而当时ê以东mā是tī以色列ê统治之下，因为án-ne，mā等于是kā以东mā拉入仝一个战线中。

第9到10节，这三国盟军因为补给品不足，尤其是缺水严重，chit对出征ê军队来讲，是真大ê困境，如过继续落去，必定会hō͘摩押phah败。

第11到13节，chit时chūn，犹大王约沙法认为应该tio̍h询问上帝ê先知，thang知影上帝ê旨意为何。这kah顶pái伊建议亚哈王tī出兵chìn前，先问先知，chit pái显然慢了真chē。以色列王约何兰有一个臣仆提醒in，有一个先知以利亚ê助手以利沙，是上帝ê奴仆先知。约沙法相信只要是上帝ê先知，一定有上帝ê信息thang听。就án-ne chit三个王就联合去chhōe以利沙。Á以利沙真清楚ê回应in，拒绝hō͘ in信息。伊特别对以色列王约何兰讲，ài伊tńg去问伊ê父亲和母亲ê先知，意思是讲王宫中尚且有真chē宫廷养ê先知，thang去问in。Chit句话ê意思是以利沙teh表示，伊kah in无任何关系，拒绝回答ê意思。约何兰听了后，真谦卑向以利沙表示，伊宁可听从上帝ê奴仆先知ê信息。

第14到19节，以利沙听了后，就kí上帝ê名表示，伊会回应，并m̄是因为约何兰王ê缘故，却是因为约沙法ê关系。因为伊是忠实tī上帝ê君王。伊就tī一位琴师ê奏乐声中开始讲出上帝hō͘ in ê信息，chit-ê信息包括：一是in siōng需要水，上帝会补足hō͘ in，kui个山谷kā充满够额ê水，hō͘ in ê军队kah牛羊cheng-seⁿ lim。二是上帝会帮助in phah败摩押人。三是ài in kā摩押人ê田园lóng hō͘ in彻底损pháiⁿ。