列王纪下 25章1节 到 25章7节   背景资料  上一笔  下一笔
Chit章经文记载有关耶路撒冷城终其尾tī主前586年被巴比伦帝国军队攻破,犹大ê以色列人民koh一pái hông掠去做奴隶,圣殿被焚毁。Á巴比伦皇帝尼布甲尼撒任命ê总督基大利却遇tio̍h暗刣。Chiah-ê记事mā同时记载tī历代志下第三十六章13到21节,m̄-koh简略了真chē。反tńg tī有关耶路撒冷圣殿被焚毁、犹大ê以色列人民hông掠去做奴隶ê记事顶面,耶利米书第五十二章12到33节有详细ê记载,而且有关总督基大利被暗刣ê事件上,耶利米书第四十章7节到第四十一章有真详细ê记载。历代志下第三十六章22到23节,则记载一段真重要ê资料,是关系波斯皇帝塞鲁士皇帝登基,随时下令tio̍h tháu放受掠tī巴比伦做奴隶ê以色列人民。

Chit段经文是记载巴比伦帝国皇帝尼布甲尼撒率军来攻打耶路撒冷圣殿,tùi西底家在位ê第九年十月十日,mā就是主前588年,围城长到一年六个月,一直到隔两年,mā就是主前586年ê四月九日,因为城里饥荒非常严重,人民无粮食,其实就是城不攻自破,就án-ne,犹大亡国。

第1到2节,chia一起头就讲「西底家背叛巴比伦王尼布甲尼撒」,为甚么伊beh背叛巴比伦?这真可能是kah当时埃及ê态度有关。主前596年当西底家登基做王ê时,伊bat宣誓beh效忠巴比伦,而巴比伦为tio̍h确保西底家真正效忠于伊,iáu俘虏了「一kóa显要作人质」(参考以西结书十七:13),而这siōng重要ê人质中,就是约雅斤王,而且kah伊同时被掠到巴比伦去ê iáu有伊ê母亲、妻细姨、一大堆王室ê重臣、善战ê勇士,以及犹大拥有才华ê匠人等八千人(参考列王记下廿四:15—16)。西底家原本是约雅斤ê叔父,名叫玛探雅,被尼布甲尼撒设立为王ê时,改伊ê名叫西底家。伊tī登基ê时iáu bat差派了沙番ê kiáⁿ以利亚萨kah希勒家ê kiáⁿ基玛利当特使,前往巴比伦晋见尼布甲尼撒王(参考耶利米书廿九:3),表示绝对忠诚顺服。

西底家ê态度会改变,并m̄是chit-má chiah开始,早tī伊执政第四年,mā就是主前593年,伊就bat暗中邀请以东、摩押、亚扪、泰尔,kah西顿等外交使节tī耶路撒冷开会,密谋反叛巴比伦ê联盟大事。M̄-koh五年了后,伊利用埃及发动反抗巴比伦ê时刻,趁机会反叛巴比伦,西底家真正认为埃及是可靠ê。根据耶利米书第三十七章5节、11节ê记载,当巴比伦军队围困耶路撒冷ê时,埃及确实bat出兵来救援,巴比伦王一听tio̍h,就马上撤军tńg去。Chit种经验hō͘西底家听从身边幕僚ê建言,ài伊赶紧趁此机会脱离巴比伦,m̄听从先知耶利米ê苦劝,ài伊投降。因为án-ne,当主前588年十月十日,巴比伦军队koh一pái围攻耶路撒冷ê时,而且一直围困到主前586年四月九日,前后一年六个月ê时间,埃及m̄-nā无出兵来相救;á是bat出兵,m̄-koh被巴比伦军队tī途中拦截(参考第6节ê巴比伦王尼布甲尼撒亲自守tiâu利比拉据点),而且bat表示beh联合起来同时反叛巴比伦ê以东等国,并无如约所讲ê,同时出兵。Á以东iáu趁巴比伦帝国军队攻破耶路撒冷城ê时,城内ê人民逃离出来,in iáu趁火抢劫,而且掠tiâu逃亡者交hō͘巴比伦军队(参考诗篇一三七:7,俄巴底亚书第12到14节)。就án-ne,耶路撒冷城终其尾被攻破。

第3节,chit节真清楚讲出城门会phah开ê原因是粮食严重缺乏,甚至传出人民交换gín-á煮来食(参考耶利米哀歌四:3—10)。可见粮荒ê严重已经非笔墨所ē-tàng形容。

第4到5节,tī chiah-ni̍h严重ê饥荒威胁下,守军就会弃城逃走。西底家mā带家眷跟tòe逃走。M̄-koh tī逃到耶利哥附近ê平原ê时被巴比伦军队追上掠,kah伊同齐逃亡ê军人lóng离开伊,各自散à。

第6到7节,为tio̍h beh彻底消除犹大以色列人民一再谋划反叛ê事,巴比伦皇帝ê做法真彻底,就是kā耶路撒冷—chit座以色列人民看做政治、经济、宗教等中心城市hō͘摧毁殆尽,同时kā以色列人民数百年来看做siōng重要ê信仰中心—耶路撒冷圣殿—mā hō͘完全摧毁烧pháiⁿ。同时当tio̍h西底家ê面前kā伊ê kiáⁿ刣死,而伊家己则被挖出目睭,然后被掠到巴比伦去。

Chit-ê巴比伦军队围城ê「十月十日」,后来成做以色列人民列为每年禁食ê记念日之一(参考撒迦利亚书八:19)。

重新查询 专卷研经 列王纪下系列
错误回报,请联系comm[@]fhl.net