Chit章继续记载有关约雅敬kah约雅斤前后两个王执政ê情景。Chit时ê犹大国并无因为臣服tī埃及而得tio̍h安宁，因为当teh壮大ê巴比伦看犹大，ná亲像看待埃及仝款，lóng是伊beh讨伐ê对象，结果换做巴比伦帝国入侵犹大。巴比伦王尼布甲尼撒王ê策略，就是先tùi弱小ê国家着手，伊先选择叙利亚、摩押、亚扪，然后就是透过巴比伦联合chiah-ê小国组成联军进攻犹大。

尼布甲尼撒皇帝ē-sái讲是巴比伦帝国siōng强猛ê一位君王。伊是tī主前605到562年在位。主前605年，伊率军phah败埃及ê军队，致使本来ê中东政治局势大大改观。Ē-sái讲是，tī主前601年，当伊koh一pái出兵征讨埃及ê时，却tú-tio̍h挫败，原因是伊接tio̍h老父往生ê消息，而tī中东地区ê真chē小国，包括犹大在内，看见尼布甲尼撒王急忙tńg来国内，认为伊战败，就纷纷表态独立，反抗巴比伦帝国。Chiah-ê小国包括犹大在内，约雅敬kah约雅斤等王lóng m̄听从先知耶利米ê警告（参考耶利米书廿七：9—11节），反抗巴比伦帝国，结果反tńg带来亡国ê灾难。

Chit段经文是描写约雅敬执政下ê犹大国。

第1到4节，果然，巴比伦王尼布甲尼撒率兵攻打犹大，伊只有ē-tàng降服。因为埃及tī主前605年ê迦基米施之役，被巴比伦军队phah败。这真清楚，埃及无法度继续成做犹大ê庇护国。主前604年，mā是尼布甲尼撒执政ê第二年，巴比伦军队先扫荡了非利士，chit时约雅敬表示顺服，tùi埃及附庸国变成巴比伦ê附庸国。

Tio̍h注意ê是chia提起约雅敬臣服巴比伦三年了后，就背叛了巴比伦。这可能是因为主前601年，因为埃及背叛巴比伦，巴比伦即时调兵tńg去phah埃及。Chit时，约雅敬宣布背叛，巴比伦军队无法度调tńg来制裁，m̄-koh却指hō͘叙利亚、摩押，kah亚扪ê军队联合来攻打犹大。结果约雅敬被俘掳à。

历代志下第三十六章6到7节án-ne记载讲：「巴比伦王尼布甲尼撒就来kā 伊攻击，用铜链kā伊缚起来，beh kā 伊带来巴比伦。尼布甲尼撒koh kā 上主殿内ê 器具带到巴比伦，hē tī 巴比伦伊ê 庙内。(全民版)」chit种记事tú好就是列王记tī chia第2节所讲ê「消灭犹大」。因为国王已经被俘掳à。

	第5到7节，约雅敬受掠了后，巴比伦王尼布甲尼撒就立伊ê kiáⁿ约雅斤继位。列王记作者tī chia讲，埃及已经无力thang帮助伊过去所统辖ê国家、部落、族群。换句话讲，已经无可能koh来帮助犹大à。