Chit章主要是讲亚述帝国消灭了北国以色列，并且kā北国以色列人民俘掠到各地去，而且tùi附近各国引进他国、伊族人民进入北国以色列境内khiā起，而这就是后来以色列人民kah外族通婚ê一个主要背景。Á in生落来ê后代，mā因为án-ne被南国犹大人民鄙视（siùⁿ）而kā它称做「撒马利亚人」由来ê一个背景。列王记下mā是tī chit章结束loh北国以色列ê历史。Chit时是主前721年。

本来亚述帝国只是phah败以色列，hō͘伊每年一定tio̍h向亚述帝国进贡。M̄-koh，以色列ê王何细亚显然m̄甘心接受chit种局面，伊想beh结合埃及帝国ê气力，反抗亚述ê控制权，结果反被亚述帝国知情而kā它消灭à。Chit种情形mā是后来南国犹大发生ê情景，上帝忠实奴仆先知耶利米一再苦劝南国人民tio̍h投降顺从巴比伦帝国ê统治，m̄-koh in m̄听从先知耶利米ê话，甚至kā先知耶利米下tī监狱中，继续抵抗巴比伦帝国，结果后来被巴比伦帝国hō͘消灭了，全国人民差不多lóng被掠到巴比伦去做奴隶。

Chit段经文细述上帝无koh庇护北国以色列人民，原因是in弃sak上帝好远、好远。In m̄-nā接受迦南人ê神明，iáu接受in ê生活风俗，而chiah-ê风俗中有真chē lóng是kah迦南人ê宗教礼仪有密切关系。换句话讲，in已经无koh相信上帝，而且欢喜迦南人ê宗教信仰，甚至kā家己ê kiáⁿ当做祭品烧献hō͘异教神明，tī生活上mā去询问算命、卜卦等，chiah-ê lóng是惹起上帝愤怒ê原因。

第1到4节，chia讲「犹大王亚哈斯在位第十二年」，这应该是主前732年。Chit一年「以拉ê kiáⁿ何细亚作以色列ê王」。其实，伊mā是用刺杀比加王篡夺tio̍h王位，ná亲像历代ê先王仝款，lóng是跟tòe去「做上帝看做邪恶ê事」。M̄-koh伊接落ê chit-ê北国以色列，当时是属tī亚述帝国ê殖民国家。可能是看见亚述帝国替换皇帝，伊想趁机会脱离亚述ê统治，结果新任ê亚述皇帝撒缦以色（主前727到722年）派兵来攻打以色列，结果北国以色列投降，只好每年lóng tio̍h向亚述帝国「进贡」。M̄-koh何细亚显然并m̄是真心顺服，伊暗中派人去走chhōe埃及ê资助，并且公然背叛亚述。因为án-ne，亚述皇帝撒缦以色kā伊掠关入监牢。

第5到6节，主前724年，亚述koh一pái大举派兵进攻以色列首都撒马利亚，会「围困」长到「三年」之久，是因为chit座城是建造tī山phiāⁿ上，koh tī亚哈王时代，对hit-ê城做真好ê防御建构，chiah有án-ne坚固ê防御设施。亚述帝国为tio̍h攻取撒马利亚城，竟然围困长到三年之久，不过iáu是攻落撒马利亚城，这是主前721年。亚述帝国攻落了后，就kā「以色列人掠到亚述去」，而且kā chiah-ê受掠ê以色列人民分散tī其他ê城市。其实，mā就是送到各地ê奴隶市场去拍卖，人数chē kah二万七千二百九十名。Tī第24节讲亚述帝国koh再tùi其它附近地区移入伊族人进入补充chiah-ê以色列人民受掠了后空出来ê城镇，这就是以色列cha-bó͘人kah异族通婚ê原因。

第7到12节，chit段经文是作者teh说明为甚么以色列国会hō͘亚述灭亡ê原因，有下列几点：
一是in bē记得bat拯救in祖先脱离埃及奴隶之地ê上帝。去拜偶像神明。

二是in学习迦南地人ê风俗，kā chiah-ê民间崇拜偶像神明ê风俗带入敬拜上帝ê礼仪中。

三是tī各地大城镇、小村、小巷、山丘、树林等地，雕刻偶像神明。

Chiah-ê lóng是上帝不准in做ê事，m̄-koh in lóng屡劝m̄听地去做。

第13到18节，chit段经文是继续前段所叙述ê以色列人民之过犯，就是上帝bat tiāⁿ-tiāⁿ差派先知去警告in，chiah-ê先知包括大家所熟悉ê以利亚、以利沙、阿摩司、何西阿、弥迦，以及siōng早期ê先知以赛亚等。M̄-koh in以色列人民lóng m̄听。而且m̄是只有北国以色列人民拒绝听从，连南国犹大人民mā是仝款。其实，chit种话已经有含严重警告南国犹大人民ê韵味à。
因为拜偶像神明ê风气真兴盛，而chiah-ê虚假ê神明带hō͘以色列人民就是虚妄。Koh khah严重ê，就是「Kā家己ê子女烧献hō͘异教神明，koh向通灵ê kah算命ê问卜」，这是上帝非常受气而oh得原谅ê事。因为án-ne，决定hō͘亚述帝国kā北国以色列消灭，hō͘以色列民族chhun落来犹大国。
第19到20节，前段lóng是细讲北国以色列灭亡ê原因，chit-má chit两节则连带提起南国犹大人民ê问题，mā是kah北国以色列人民ê情形仝款。作者tī chia提起上帝「弃绝所有ê以色列人，惩罚in，kā in交tī残忍ê仇敌手中」，chit句话已经真清楚讲tio̍h以后一百多年，mā就是主前586年巴比伦攻破耶路撒冷ê惨剧。

第21到23节，chit段经文讲述主前930年，mā就是所罗门往生后，以色列民族分裂做做为南北两国，北国以色列就是由以法莲族出身ê耶罗波安带领。M̄-koh伊一开始为tio̍h阻止以色列人民忘不了tńg去耶路撒冷敬拜上帝，竟然tī「但」kah「伯特利」chit两所在建造圣殿，却mā同时雕刻金牛hō͘以色列人民去拜（参考列王记上十二：25—31），这就是北国以色列人民犯罪ê第一步。然后历代国王lóng是án-ne续接落去，ná亲像第22节所讲ê，in是「不断重复伊所犯ê罪」。结果上帝严厉ê惩罚ná亲像第23节所讲ê，被俘虏到亚述帝国去ê以色列人民，是「一直tòa tī hia」，mā就是tùi主前721年，直到主前538年波斯帝国兴起代替了巴比伦帝国了后，以色列人民因波斯皇帝ê允准chiah有机会回乡。Án-ne，in tī亚述帝国khiā起超过了二百年之久。其实，Tī chit段将近两百年时间，北国以色列人民差不多已经chhōe bē-tio̍h完整ê支族宗族à。