列王纪下 14章1节 到 14章22节   背景资料  上一笔  下一笔
Chit章记载两件事,一是有关犹大王亚玛谢执政ê情景,仝款ê chit段记事,mā thang参考历代志下第廿五章。二是有关北国以色列王耶罗波安二世治理长到四十一年ê政情。

Chit段经文是记载有关南国犹大王亚玛谢执政后ê事迹。伊ê结局kah伊ê老父约阿施ê遭遇仝款,lóng是hō͘暗刣死去。这mā显示了政情bē稳。特别是当伊决定带兵出击北国以色列ê时,m̄-nā无phah赢,颠倒,是hō͘北国以色列王约华施phah败,而且耶路撒冷城墙被拆一大道,圣殿kah王宫中ê财宝lóng被劫洗一空,而且有人受掠,包括王亚玛谢在内,这thang讲真是悲惨ê结局。

第1到4节,亚玛谢tī「二十五岁ê时chūn」继承老父约阿施ê王位,共计统治耶路撒冷长到「二十九年」时间,án-ne,伊死ê时是五十四岁。作者tī chia讲伊「做上主认为对ê事」,m̄-koh却「无亲像伊ê祖先大卫王」,因为大卫王tī敬畏上帝ê事顶面忠心耿耿。即使家己ê kiáⁿ叛变伊,而且想杀害伊,m̄-koh,伊无因为灾难来临,就会失去对上帝ê信心。亚玛谢是学习老父约阿施,对宗教信仰并无坚持,因为án-ne,hō͘人民继续拜偶像。

第5到6节,chit两节讲亚玛谢巩固了政权了后,就决定处决hiah-ê「刣伊父王ê臣仆」(参考十二:20—21)。M̄-koh伊遵行摩西律法ê规定,无kā父母所犯ê罪责,追究、牵连到in ê kiáⁿ身上(参考申命记廿四:16),却是甚么人犯罪,甚么人承担被惩罚ê责任。

第7节,chit节讲出亚玛谢治理之下南国犹大ê军事实力,ē-tàng kā以东人制服tī统治之下。Tī伊治国之期,m̄-nā重整军队有三十万名精兵,而且koh开了「三千四百公斤银á tùi以色列雇来十万军队」(参考历代志下廿五:6)。M̄-koh后来上帝差遣先知去对亚玛谢讲,不ài伊雇用chiah-ê十万名以色列士兵,因为只要有上帝同在就有够。伊chiâⁿ实听从先知ê话。Mā真如先知ê预言,伊ê军队phah败以东,收复了祖先约兰执政时代所遗失ê以东(参考列王记下八:20—22)。

第8到10节,chit三节记载亚玛谢准备出兵攻打北国以色列,到底是甚么原因,m̄-koh tī历代志下第廿五章14到16节有一段真重要ê记事,说明亚玛谢phah败以东人了后,却kā以东人所拜ê偶像神明带tńg来烧香叩拜。为tio̍h chit件事,上帝ê先知去警告伊,m̄-koh伊却无听从先知ê话,反tńg恐吓讲beh刣死hit-ê先知,结果hit-ê先知讲上帝决定beh消灭伊。Chit段经文讲当亚玛谢决定beh出兵以色列ê时,以色列ê王约华施会讲寓言,伊所讲ê寓言故事有ná teh说明「草猴捕蝉,黄雀在后」ê道理,意思是别认为ē-tàng phah赢以东就骄傲起来,iáu m̄知tio̍h满足,认为家己真了不起。若chit-ê定会失败。

第11到14节,亚玛谢果然心高气傲,m̄听苦劝。Chiâⁿ实出并去phah以色列,结果兵败如山倒hit种严重。以色列军队m̄-nā俘虏了伊,mā俘虏了真chē人做人质带tńg来以色列,甚至以色列军队进攻到耶路撒冷,koh kā以法莲门ê城墙拆毁一大段,koh侵入圣殿、王宫搜刮了真chē金子、银á,kah用具。

第15到16节,chit两节记载北国以色列王约华施往生,伊ê kiáⁿ耶罗波安二世继位。

第17到18节,自从败hō͘北国以色列约华施了后,亚玛谢治理之下ê南国犹大就成做北国以色列ê附庸国。Chit段期间伊koh活了十五年后死去。

第19到22节,ná亲像头前提起过ê,亚玛谢ê晚年境遇kah in父亲约阿施仝款,lóng是遇tio̍h谋刣死去。Tī第19节并无说明甚么人谋刣亚玛谢,不过可能kah圣殿ê祭司有关,若无,就是保守派ê人。虽然伊bat逃到「拉吉城」去避难,m̄-koh凶手iáu是仝款tui-jiok过去kā伊刣死。伊ê kiáⁿ乌西雅继承伊ê王位。伊ê能力bē-bái,收复了所罗门时代用来扩充海外贸易ê港口以拉伊(所罗门时代kā它称做「以禄」,参考列王记上九:26)。

重新查询 专卷研经 列王纪下系列
错误回报,请联系comm[@]fhl.net