Chit章主要lóng是记载北国以色列王约哈斯统治以色列ê时代，伊án怎带领以色列人民归向上帝。M̄-koh以色列人民都无完全弃sak拜偶像ê行为，以及约哈斯死后，伊kiáⁿ约华施继承王位后ê情景。另外有一部分，是记载以利沙活teh ê末期讲出预言以色列王约华施会面对ê国政大事。

Chit段经文描写北国以色列君王约哈斯统治下ê情形。因为伊做上帝看做邪恶ê事，因为án-ne，失去上帝ê赐福。后来伊有改变认罪，祈求上帝带领，而hō͘以色列人民thang得tio̍h上帝赦免而享受太平ê日子。

第1到2节，chia koh一pái出现列王记作者不时用ê句话，讲一个无好ê君王就是「做上主看做邪恶ê事」，mā就是带领人民「犯罪」，无弃sak拜偶像ê行为（第2、6节）。作者用chit种句话teh描述国王无好好á带领人民敬拜上帝，反tńg是带领人民去敬拜偶像神明，hō͘人ê心灵堕落，弃sak了上帝。这就是犯罪ê记号。

第3到6节，列王记作者ê观点，就是国家会tú-tio̍h灾难，就是kah君王带领人民弃sak上帝，去拜偶像神明ê事有关，当然这是tùi宗教信仰ê基础切入看国家、社会ê事务，m̄是tùi政治、军事ê角度看。因为án-ne，chia会讲上帝对以色列人民发出「大受气」当做惩罚ê方式，就是hō͘叙利亚王哈薛，以及伊ê kiáⁿ便・哈达前后率兵来攻打北国以色列，并且用「残暴ê手段压迫以色列人」。Chit时chūn，约哈斯chiah想tio̍h beh tńg来走chhōe上帝，上帝mā垂听伊ê祈祷，「上主赐hō͘以色列一个解救者」，却无说明chit位「解救者」是甚么人，真可能有三个人选；一是亚述ê国王亚大得尼拉利三世，伊tī主前806 kah 804年攻打大马士革，致使叙利亚腹背受敌，赶紧tùi以色列撤兵。二是以色列王约哈斯ê kiáⁿ约华施（第25节）。三是耶罗波安二世，伊是一位非常有成就ê以色列王。因为ē-tàng phah败叙利亚军队ê侵犯，chiah致使北国以色列人民会得thang像以前仝款，安享太平。Ē-sái讲是chit种安享太平ê日子并m̄是真长，原因是以色列人民已经习惯崇拜偶像神明。因为án-ne，tī首都撒马利亚iáu-koh保存「亚舍拉女神ê像」。

第7到9节，chia讲叙利亚王消灭了约哈斯ê军队，hō͘伊只chhun「五十个骑兵，十辆马车，一万步兵」，chit-ê数目比起伊ê祖先亚哈时代有过两千辆战车，以及tī一日之内就消灭了叙利亚军队十万步兵（参考列王记上二十：29）ê实力相比，真是无法度比并。chit-má ê北国以色列ē-sái讲是只有简单ê王室护卫能力，无所讲ê「国防」thang讲。约哈斯统治北国以色列十七年ê时间。伊死后伊ê kiáⁿ约华施继任伊ê王位。

第10到13节，仝款ê，约华施统治北国以色列长到十六年时间，m̄-koh伊仝款，mā是「做上主看做邪恶ê事」，chit种君王lóng是上帝所讨厌ê对象。第12节是值得注意ê一节，chia讲：「伊tī战场上对抗犹大王亚玛谢ê英勇事迹，一一记载tī以色列王史上。」可惜列王记都无留落来清楚资料，说明为甚么约华施治国时代，为甚么会发生kah南国犹大亚玛谢执政ê时ê冲突。M̄-koh thang看出南北两国有冲突，这并m̄是甚么新鲜事。