列王纪下 12章9节 到 12章21节   背景资料  上一笔  下一笔
Chit段经文描述整修圣殿ê工作,以及叙利亚王哈薛出兵beh来攻打犹大耶路撒冷ê情形,以及约阿施ê回应方式。

第9到12节,chit段经文说明大祭司耶何耶大怎样带领众祭司kā犹大以色列人民奉献ê钱,收存起来,并清楚点交hō͘王室整修圣殿ê负责人,然后主管整修圣殿ê人,kā chiah-ê钱用来支付hō͘所有整修工程ê人ê工资。

第13到14节,chit两节真清楚讲出犹大以色列人民奉献ê钱,除了支付工资kah买整修用ê材料外,并无用来购置新ê器具,包括碗、银杯、号筒,á是其他金银器皿。

第15到16节,chia讲kā奉献hō͘圣殿ê钱,kah hō͘祭司ê钱分别清楚,而且所有工程人员lóng非常诚实、可靠,因为án-ne hō͘ chit项整修工程进行得非常顺利。

第17到19节ê背景,如果对照历代志下第廿四章17到22节,就会明白为甚么比犹大国势khah弱ê叙利亚敢来侵略,原因是因为tī祭司耶何耶大往生后,无人敢监督国王约阿施,致使伊身边多了真chē引诱伊去敬拜巴力偶像神明ê人,虽然上帝派先知去警告伊kah chiah-ê幕僚,m̄-koh显然地,约阿施kah伊身边ê人lóng m̄听从。上帝ê灵就支配大祭司耶何耶大ê kiáⁿ撒迦利亚去公开警告。结果约阿施tùi敬拜上帝、听从上帝奴仆ê话ê君王,反tńg变成杀害上帝奴仆撒迦利亚ê君王,伊就tī圣殿ê庭园里用石头kā撒迦利亚活活phah死。因为án-ne,上帝无koh赐福伊,m̄ kah伊同在。列王记作者tī chia讲叙利亚王哈薛率兵攻打非利士人ê城市迦特了后,随时转兵来攻打犹大,结果犹大phah败仗,只好kā圣殿宝库里所有ê金子当做「礼物送hō͘哈薛王」,chiah hō͘哈薛带兵撤离耶路撒冷tńg去。

第20到21节,chia讲约阿施ê手下阴谋反叛。Kā伊刣死。照历代志下第廿四章23到27节ê记载来看,in两人杀害约阿施了后,犹大人民并无kā约阿施葬tī王室坟墓内,却是葬tī耶路撒冷城里,而且反叛ê军官,一位是亚扪妇人ê kiáⁿ撒拔,另外一位是摩押妇人ê kiáⁿ约萨拔。列王记作者是讲约阿施是tī伊带军队kah叙利亚军队交战失败撤退ê时,hō͘伊手下ê两名军官刣死,这两名密谋反叛ê军官,一位名叫约撒甲,另外一位名叫约萨拔。为tio̍h是beh报复伊谋害撒迦利亚ê事件。伊死后,伊ê kiáⁿ亚玛谢继承伊ê王位。

重新查询 专卷研经 列王纪下系列
错误回报,请联系comm[@]fhl.net