Chit段经文讲述亚哈谢ê心真刚硬，认为只要kā先知以利亚关tī监狱中，伊所讲ê预言就bē实现。

第9到10节，亚哈谢王决定派人去缉拿先知以利亚。真可能认为若是kā先知以利亚掠起来，就ē-tàng强迫伊改变所讲ê预言。亚哈谢chit种举动，ná亲像伊ê老父亚哈王，认为kā上帝忠实奴仆米该雅关tī监狱里，伊所预言pháiⁿ ê结果就会失去效力仝款。M̄-koh伊无想tio̍h，chit pái派去掠先知以利亚ê军官kah五十个随从，lóng被先知以利亚祈求上帝tùi天顶降落大火烧死，就ná亲像伊kah亚哈ê假先知tī迦密山顶对决仝款，先知以利亚祈求上帝tùi天顶降落大火烧掉tī祭坛上ê牲祭仝款。

第11到12节，亚哈谢并无因为chiah-ê去掠先知以利亚ê官兵被天顶降落ê大火烧死有改变，伊m̄相信上帝。因为án-ne，决定koh一pái差派另外一个军官mā仝款是带领五十个随从去掠先知以利亚。这表示亚哈谢ê心中根本就m̄相信上帝有chiah-ni̍h大ê能力。

第13到14节，这是亚哈谢第三pái仝款派出一个军官带领五十个随从去掠the̍h先知以利亚。M̄-koh chit pái受派ê军官真清楚知影，绝对bē-tàng轻视上帝忠实ê奴仆先知以利亚。因伊所代表ê就是上帝。前两pái受亚哈谢差派去掠先知以利亚ê军官kah士兵，lóng是用极端无礼ê态度「命令」先知以利亚。结果in lóng遇tio̍h被火烧死ê厄运。因为án-ne，chit位军官用恳切地ê语句请求先知以利亚「怜悯」伊kah伊ê部下，救in ê性命。M̄-thang像过去两pái hit种，祈求上帝天顶降落大火烧死in。

第15到16节，tī上帝命令先知以利亚跟tòe chit-ê军官tńg来王宫去ê时，先知以利亚chiah跟tòe去王宫。M̄-koh先知以利亚并无因为án-ne有任何惊惶，伊照样当tio̍h以色列王亚哈谢ê面，讲出上帝ê受气，「一定」会hō͘伊死去。因为伊m̄信上帝，而且带领人民弃sak上帝。

第17到18节，ná亲像先知以利亚所预言ê，亚哈谢果然死去。亚哈谢无kiáⁿthang继承王位，改由伊ê小弟约何兰继承王位。这大约是tī主前852年左右。