约翰二书 1章1节 到 1章13节   背景资料
Ná亲像tī约翰一书中所提起过ê,tī早期教会有人渗透进入教会内,专门teh破坏信徒ê信仰,约翰一书作者称呼chiah-ê人是「假先知」,in ê特色,就是自称是有「圣神」充满ê人,作者希望众信徒tio̍h小心谨慎,并且强调讲:一个人是m̄是真正有tùi上帝来圣神同在,就看chit-ê人是m̄是愿意公开tī众人面前信仰告白讲伊愿意「承认耶稣基督降世为人」(参考约翰一书四:1—3),作者认为这是一个非常重要ê标准。

当时ê教会内部流传tio̍h一种讲法,认为耶稣基督是神圣上帝ê kiáⁿ,无可能是真实活tī这世间ê人。因为án-ne,in主张只要是有关耶稣基督人性ê记载lóng tio̍h删除,包括伊厌倦tuh-ku、腹肚饿、受气、哭、藉tio̍h人来出世,以及被钉死tī十字架上ê苦难等等。如果是án-ne,耶稣基督就bē有受苦难tī十字架ê事件,若耶稣无经历被钉十字架ê苦难,就无koh活ê信息传扬出来。M̄-koh耶稣基督ê koh活乃是基督教信仰siōng中心ê信息,失去chit-ê信息,基督教ê存在就会失去意义。

	每一个时代lóng有信仰ê争议,这mā是基督教信仰不时teh反省、更新ê主要原因,因为不时对信仰提出反省,chiah会有更新ê气力,mā chiah会hō͘基督徒tī信仰kah社会生活中chhōe-tio̍h连结ê中心点而bē致使脱节,mā bē致使因为有人乱传讲圣经ê信息致使毁坏了本来建构起来ê信仰根基á是hō͘信仰变质,chit点认bat是非常重要ê。

第1节,作者tī信件ê起头就讲家己是「长老」,原本ê意思是teh指「年纪比较大」ê人。M̄-koh tī早期教会中,长老mā是教会团契里tī信仰上lóng受尊敬ê人,in负责料理教会事务kah决策(参考使徒行传十一:30、二十:17,提摩太前书五:17),而初代教会ê使徒mā会自称是长老(参考彼得前书五:1)。

「蒙拣选ê夫人」,这「夫人」到底是teh指甚么人?有两种可能ê意思,其一是某一个位无愿意出名ê女性信徒,而chit位女性信徒ê年纪是已经中年以上ê年纪,án-ne chiah会kah续落来ê chit句「你ê kiáⁿ」相符。Mā因为án-ne,有人认为chit封书信是封私人信件。其二,chia所指ê「夫人」mā可能是teh指教会讲ê,这thang tùi彼得前书第五章13节所提起ê「蒙拣选」仝款,lóng是teh指tio̍h教会讲ê。因为án-ne,主张指教会ê讲法比较容易被接受,而这教会是chit位写phoe ê长老所熟悉ê教会。Án-ne,续落来chit句「mā hō͘你ê kiáⁿ」,就ē-tàng了解是teh指该教会内ê男女信徒。

「认bat真理」,thang参考约翰一书第五章6节提起ê「圣神就是真理」chit句话,表示「真理」是上帝拯救ê信息,而chit-ê信息就是teh指耶稣基督讲ê。因为耶稣基督降生到世界上,就是为tio̍h beh见证上帝拯救ê疼。
第2节,tī chia作者用「真理」来表达上帝ê疼,有上帝ê疼,chiah ē-tàng hō͘人ê性命kah耶稣基督连结做伙,永远bē分离。

第3节,这是当时写phoe ê一种方式,起头ê时chūn先有自我绍介,koh来就是请安kah祝福。Chit种书信模式tī使徒保罗ê书信中mā一再出现(参考罗马书一:1—7,哥林多前书一:1—3,加拉太书一:1—3)。

Tī chia作者真特别地kā耶稣基督kah上帝同时并列做伙,作者强调耶稣基督是「上帝ê kiáⁿ」,chit句话真重要。因为chit种用语已经teh表示耶稣基督确实是一个人,bat真实ê生活tī咱中间。

「恩典」,通常圣经提起上帝ê恩典ê时,是teh指人原本不配得tio̍h ê,m̄-koh上帝为tio̍h表明他ê疼而白白赏赐hō͘人「怜悯」,圣经提起上帝ê怜悯ê时,指ê是上帝对他子民特别ê疼。「怜悯」一词m̄-nā是有含「疼惜」ê意思,mā是teh指上帝ê公义kah上帝ê疼。

	「平安」,这原本用来表示战争已经停息,tùi án-ne性命无koh有受tio̍h威胁。用tī chia是teh指会hō͘人死亡ê气力已经消失à。因为耶稣基督已经超越死亡ê关隘,因为伊ê救恩hō͘人有koh活ê希望,这就是平安。
第4节,chit-má作者讲信徒ê教会中,有kóa人是确实遵守了「真理」ê教示做tāi-chì、过生活;相对ê,这mā暗示tī in中间有人并无遵守「真理」。因为án-ne,chia ê写法ē-tàng看出受信ê教会内部可能因为án-ne发生纷争。因为,tī仝一个教会中,若是无同心、真实ê疼,就真oh彼此接纳而同齐同声o-ló上帝。

第5节,chit节thang参考约翰一书第二章7节。
「彼此相疼」是早期教会tùi耶稣基督领受ê命令,tī约翰福音第十三章34到35节有提起过,tī约翰一书mā有提起,chit-má koh提起,因为án-ne,作者讲这「并m̄是一条新ê命令」,却是「tùi起初就领受了ê」教导。会koh一pái án-ne强调,表示教会内可能有信徒并未照chit种教示去遵行,这mā是引起作者写chit封书信ê原因之一。

第6节,作者特别强调教会团契生活中siōng重要ê,就是彼此相疼,这是团契生活中绝对tio̍h坚持ê。摩西律法tī利未记第十九章18节就提起「tio̍h疼家己ê厝边,亲像疼家己仝款」,chit种律法tī耶稣基督时代ê犹太宗教领袖之教导中,是hō͘人看做kah疼上帝相连结、无法度分开ê教示(参考路加福音十:27)。作者强调tī信仰团契中,就是beh「以这命令为生活ê中心」。
这「命令」一词tùi第4到6节就连续出现四pái,这表示chit-ê命令比任何规律lóng重要,疏忽bē-tàng。

第7节,tùi chit节开始,作者用真严肃ê语句针对hiah-ê tī信仰上有严重偏差,同时koh tī教会内部造成困扰ê人提出谴责,并且严厉警告「生活tī真理中ê人」mài kah chiah-ê信仰观念偏差而且影响tio̍h教会信仰秩序ê人来往,chit种态度ē-sái讲是真严格。

「真chē Pián仙á已经在世界上四界活动」,chia所讲ê「Pián仙á」,就是teh指hiah-ê表面上看起来kah-ná真虔诚,而且相信上帝ê救恩,m̄-koh却拒绝接受耶稣基督确确实实降生在世界上,以人ê形体出现,用人ê样式「道成肉身」tī人类世界中间,chit种人siōng容易迷惑人。作者讲,若是一个人公开否认耶稣基督降生tī chiah-ê世界上,chit-ê人就是「对敌基督者」。

第8节,这是作者对信徒提出ê警语。「Lín tio̍h小心」,chit句kah马可福音第十三章23节,耶稣基督对当时门徒提出「Lín ài细腻」ê警语仝款。作者强调对信仰有正确认知,而且会知影持守到最后lóng bē改变ê人,必定会有来自天顶ê「奖赏」teh thèng候。Chia所提起ê「全部ê奖赏」之「全部」一词,指ê是kui个性命ê koh活,mā就是「永恒ê性命」ê意思,chit点mā是约翰书信siōng重要ê中心思想。

第9节,chit句「不持守基督ê教示」,意思是teh指kā人ê教导看做比耶稣基督ê教导koh khah重要。Chit种问题早tī耶稣基督ê时代就已经发生,因为犹太人领袖,特别是hiah-ê经学教师kah法利赛人,in lóng kā圣经ê教导有曲解,而且故意用人ê教示来取代上帝ê教导,因为án-ne,耶稣基督真无客气地指责当时chiah-ê宗教领袖讲:「Án-ne, lín 是放sak 上帝ê 诫命来遵守人ê 传统。」耶稣koh 讲:「Lín 用奇巧ê 方法弃sak 上帝ê 诫命,来beh 遵守lín ê 传统。(全民版)」(马可福音七:8—9)相对ê,就是「持守基督ê教示」ê,这是非常明确以耶稣基督做中心ê人,in会得tio̍h「圣父kah圣Kiáⁿ」,并且明白耶稣基督确实是有降生到世间,是上帝ê kiáⁿ,被差遣到世界起来ê救主。

第10到11节,作者tī chit两节koh进一步要求众信徒bē-tàng接近chiah-ê否认耶稣基督降生到世界起来ê人,连向chit种人「请安」lóng bē-tàng,这表示 kah chit种人断绝关系,kā in驱逐离开教会,mā m̄-thang接待in到「厝里」,因为chit种人是迷惑人心ê邪恶者。因为接待chit种人,「等于tī pháiⁿ事顶面成做伊ê伙伴」,原因是会hō͘人掠做是in mā受tio̍h教会kah信徒ê欢迎。

为甚么讲连接待in到厝里去mā bē-tàng?原因真简单,当时ê教会大多数是用家庭聚会为主要模式,因为án-ne,若是接待chit种家庭去,就会hō͘ chit种人有机会中传错误ê信息,而混淆信徒ê认知,致使信徒tī信仰上偏离了正确ê道路。Chit款tāi-chì就bat发生tī加拉太教会(参考加拉太书一:6)。伊甚至进一步讲传「另外一种福音」ê人,应该「受诅咒」(参考加拉太书一:8、9)。

第12到13节,chit两节是本书信ê结尾用语。作者讲「iáu有真chē话」tio̍h讲,m̄-koh伊「无想beh藉tio̍h笔墨传达」,原因可能有两种,其一,纸已经写满,若是beh koh再写,就beh koh再chhōe另外一张纸,而当时chit种纸并m̄是亲像chit-má án-ne容易得tio̍h。其二,信仰ê事,有时并m̄是用笔墨ē-tàng解释清楚,因为tùi文字中不时会引伸出真chē需要进一步讨论ê问题来。因为án-ne,作者讲真想亲自去探望in,kah in「当面倾谈」,伊讲án-ne大家心内lóng会「喜乐满溢」。 

重新查询 专卷研经 约翰二书系列
错误回报,请联系comm[@]fhl.net