历代志下 36章1节 到 36章12节   背景资料  上一笔  下一笔
Chit章记载犹大末期几位君王治国ê情况。晚期ê犹大已经oh得有甚么作为,chiah-ê君王lóng是附庸tī埃及、巴比伦等帝国ê辖制下,oh得有甚么改革作为,只有ē-tàng被逼kah一定tio̍h tī强国之下勉强活落去,到最后soah被巴比伦所灭亡。不过,历代志作者tī chit本经册ê结尾,是用塞鲁士ê兴起之记事,hō͘ chit本历代志ê史册kah以斯拉记连接了起来。

Chit段经文共计记载四个王,包括有约哈斯、约雅敬、约雅斤,kah末代君王西底家等四位。

第1到4节,chit段经文记载约西亚ê kiáⁿ约哈斯继承王位。当时伊二十三岁。M̄-koh统治ê时间非常短,kan-taⁿ有三个月时间(主前609年)而已,ē-sái讲是犹大国历代以来做王siōng短ê一位。Koh khah可怜ê是,伊iáu被埃及王尼哥俘虏,并且用伊来要胁犹大一定tio̍h向埃及进贡chē kah「三千四百公斤」ê银á,kah「三十四公斤」ê金子。M̄-nā án-ne,伊iáu被废了王位,改由伊兄哥以利亚敬继承王位。伊mā被尼哥改名成做约雅敬。埃及国王ē-tàng kā犹大王ê名改过来,已经真清楚teh表示埃及对犹大有绝对宗主国ê权柄。

第5到8节,chit段经文是记载被改名ê约雅敬执政ê记事。伊治国ê年代是tùi主前609到598年。

基本上,约雅敬并无带领犹大人民继续敬拜上帝,却是去拜偶像神明。先知耶利米bat写诗歌挞伐伊,讲伊tī国家hit种困境之下,iáu大兴土木建造堂皇ê宫殿享受(参考耶利米书廿二:13—19),真是悲哀ê一件事。

Ná亲像头前所讲ê,巴比伦ê兴起,甚至连埃及lóng无法度保护家己ê附庸国犹大。列王记作者讲「埃及王kah伊ê军队无koh出兵到埃及境外ê所在,因为巴比伦王chit-má控制所有以前属tī埃及ê土地,tùi幼发拉底河直到埃及北部边界」(参考列王记下廿四:7)。约雅敬就tī巴比伦帝国侵犯耶路撒冷ê时被俘虏à。列王记下第廿四章记载伊之所以被俘虏,是因为伊bat想试图脱离巴比伦宗主国ê掌控,m̄-koh失败了,而且严重ê失败。

第9到10节,这是有关约雅斤继承王位ê记事。伊是tī主前598到597年之间。伊执政时间比约哈斯加出十工,是三个月koh十工。Tī伊ê年代仝款,只有ē-tàng被巴比伦帝国hō͘取hō͘求,lóng无抵抗ê能力。后来,伊mā被巴比伦俘掳,然后由伊ê a叔西底家继承伊ê王位。照列王记作者ê描述,讲伊tī巴比伦做人质ê时代,后来受tio̍h礼遇(参考列王记下廿五:27—30)。

第11到12节,续接约雅斤为王ê是西底家,伊治理ê时间是tī主前597到586年。伊是犹大国最后ê一位君王。虽然tī伊执政时代bat试图脱离巴比伦统治,ē-sái讲是m̄-nā无成功,颠倒,iáu受tio̍h残酷ê惩罚。巴比伦王尼布甲尼撒tī攻落耶路撒冷城了后,tī利比拉审判伊,并且tī伊目睭前刣死伊ê kiáⁿ,然后kā伊ê两只目睭挖出来,iáu用铜链锁tiâu伊,然后kā伊带到巴比伦(参考列王记下廿五:6—7)。历代志ê作者讲这是因为伊无听从上帝ê话,而且带领人民去敬拜偶像、污秽圣殿,不听从先知耶利米ê警告,拒绝悔改,因为án-ne chiah会带来án-ne大ê灾难。

重新查询 专卷研经 历代志下系列
错误回报,请联系comm[@]fhl.net