历代志下 30章13节 到 30章27节   背景资料  上一笔  下一笔
Chit段经文描述希西家怎样带领犹大人民举行Pôaⁿ过节ê经过。Tī所有chiah-ê礼仪过程lóng是照摩西当年颁布hō͘以色列人民祖先ê规定进行。换句话讲,in重新tńg来到古老ê礼仪,用真严肃ê态度进行Pôaⁿ过节应该有ê祭祀敬拜方式。

第13到16节,原本Pôaⁿ过节是tī正月14举行,m̄-koh因为有kóa祭司准备无够洁净,因为án-ne,决定延迟一个月时间(第1到2节),tī二月14日举行Pôaⁿ过节礼仪。Mā tùi第15节thang看出原来是in中间有kóa祭司并m̄是真认真tī洁净ê规定上,想beh蒙混过去。Koh再对照第廿九章34节「原来利未人比祭司koh khah切实遵守洁净ê规定」chit句话,就thang明白有kóa宗教领导者并m̄是真真心,m̄-koh taⁿ看tio̍h国王希西家是hit种认真beh恢复过去对上帝忠实敬拜ê礼仪,因为án-ne,就感觉家己真见笑,mā赶紧洁净家己,带赎罪祭来奉献。

第16到17节,tùi chit两节thang看出宗教领袖确实真严厉地检查每一个祭司是m̄是有真实地洁净家己,若是无,就不准in担任祭祀礼仪ê工作。Á chiah-ê礼仪lóng是ná亲像第廿九章34节所讲ê,利未人比祭司iáu认真切实遵守一切规定。因为án-ne,若有发见祭司不切实地洁净家己,就不准in进行献祭ê工作,tùi利未人来代理。这mā讲出chiah-ê众祭司确实是怠忽了in应该有ê职责siuⁿ久à。Á是in心中存疑是m̄是国王希西家是真正ài beh进行chit项宗教改革,想beh koh再观望一段时间。

第18到22节a句,chit段经文thang看出虽然顶pái派出信差送去邀请北部以法莲、玛拿西、以萨迦、西布伦等支族ê同胞来参加,bat因为án-ne受tio̍h侮辱。M̄-koh iáu是有人愿意来加入。M̄-koh因为siuⁿ久á是根本就无经验过守Pôaⁿ过节ê规律,因为án-ne,发见chiah-ê来自北部ê同胞并无遵守应该有ê守节期chìn前tio̍h准备ê洁净礼仪。希西家真发挥了伊ê疼心,替chiah-ê北部同胞祈求上帝ê怜悯。第20节真重要,chia讲上帝垂听希西家ê祈祷。就án-ne,一连七工,民众lóng欢欢喜喜庆祝除酵节。Á利未人尽心地带领人民敬拜上帝ê事,mā得tio̍h希西家ê o-ló。

第22节b句到27节,chit段经文thang看tio̍h in kā原本只有七工ê除酵节延长一倍,一连举行了十四工。除了Pôaⁿ过节庆典之外,mā同时献上平安祭。希西家家己带头奉献,民众领袖mā tòe学习心甘情愿地奉献。Tùi第25节thang看出chiah-ê来自北国以色列人民iáu是有人欢喜遵守摩西律法ê规定,过圣洁ê生活,即使tī困境ê亡国环境下,in并无因为án-ne失落对耶和华上帝ê信。第26节讲出希西家án-ne认真地推动宗教信仰改革,是tùi所罗门了后,不bat有过ê现象。上帝mā垂听犹大人民祈祷ê声音,这表示上帝会赐福hō͘犹大人民,已经北国hiah-ê欢喜敬拜他ê子民。

重新查询 专卷研经 历代志下系列
错误回报,请联系comm[@]fhl.net