历代志下 29章18节 到 29章36节   背景资料  上一笔  下一笔
当chiah-ê宗教领袖向国王希西家报告圣殿洁净完成了后,伊就随时带领人民进行献祭ê工作。犹大人民因为经历phah败仗、bó͘-kiáⁿ受掠伊去ê苦难,taⁿ已经清楚in过去弃sak上帝,chiah换来taⁿ惨痛ê结果。因为án-ne,当希西家推动宗教改革ê时,in lóng愿意配合。希西家是亲自带领人民领袖去敬拜,而且为王室「赎罪」,因为伊知影是家己ê老父亚哈斯背叛了上帝,chiah致使人民受难、国家接近沦亡ê边缘。

第18到19节,chiah-ê宗教领袖来向国王希西家报告,已经完成圣殿ê洁净工作。

第20到24节,希西家召集耶路撒冷城内ê领袖,伊beh特别为王室ê罪,以及犹大人民ê罪等向上帝献上赎罪祭。所有chiah-ê赎罪礼仪lóng是根据摩西律法ê规定进行(参考利未记十六:3—10)。

第25到30节,teh献祭敬拜ê时,所有程序lóng照大卫王时代所定落来ê礼仪进行,m̄-nā kā圣殿歌手lóng chhōe tńg来,希西家mā亲自带领人民谦卑「跪落来敬拜上帝」。伊án-ne亲自表率ê礼拜方式,深获犹大民众ê心,大家lóng「欢欢喜喜」地跟tòe伊跪落来敬拜上帝。

第31到36节,人民是欢喜希西家带领in重新tńg来到敬拜上帝ê信仰,因为án-ne,大家lóng主动地chhōa in ê cheng-seⁿ来献祭,表明in是真心诚意地敬拜上帝。注意第31节讲「其中有kóa人自愿带来cheng-seⁿ,宰了做烧化祭」,chit句话表示即使tī亚哈斯时代弃sak上帝,iáu是有人保持对耶和华上帝ê忠实,只是因为政治环境kah社会情况hō͘ in无法度进入圣殿献祭罢à。

第34节是真值得注意ê一节;kā chit节对照第5节、第15到16节、第31节等等经文来看,就thang明白一件非常重要ê事,tī国政以及社会动乱不安ê世代,连祭司、利未人mā lóng无法度「保持洁净」。因为án-ne,希西家为tio̍h beh洁净圣殿,带领人民重新tńg来到耶和华上帝ê面前ê时,第一件事就是beh chiah-ê宗教人员先洁净家己。如果宗教人员无án-ne tāi先做起,就无法度带领人民以敬虔ê心灵敬拜上帝。

重新查询 专卷研经 历代志下系列
错误回报,请联系comm[@]fhl.net