历代志下 25章1节 到 25章16节   背景资料  上一笔  下一笔
Chit章是记载有关约阿施ê kiáⁿ亚玛谢继承王位了后所做ê事迹。伊在位期间是主前796到767年,前后共计29年。

Chit段经文记载约阿施ê kiáⁿ亚玛谢继承王位了后,整顿军队ê事。伊知影求问上帝ê奴仆,m̄-koh却mā犯信仰上严重错误,就是拜偶像。伊是一面敬拜上帝,一面拜偶像,这thang看出当时以色列人tī信仰上ê混乱。

第1到4节,chit段经文先简介亚玛谢作犹大ê王。真可惜ê是伊做「上主认为对ê事,m̄-koh m̄是全心」,这表示伊tī信仰上对上帝并m̄是真忠实,chit点tī伊后来带领以色列人民tī战赢以东了后,却kā以东人ê神明the̍h来当做神明敬拜chit件事看会出来(第14节)。伊无bē记得hiah-ê杀害in老父ê臣仆。因为án-ne,当伊巩固了王位了后,就开始替老父报仇,不过伊知影遵守摩西律法ê规定,无kā仇恨扩大到下一代(参考申命记廿四:16)。

第5到6节,亚玛谢mā注重整顿国防军备,总共精选三十万人成做精兵,同时iáu用三千四百公斤银á雇用以色列ê十万名军队。Án-ne,共计有常备军共计四十万人,这是真大ê军容队伍。

第7到10节,当伊雇用以色列军人ê时,有上帝ê奴仆去见伊,kā伊讲m̄-thang雇用以色列军队。伊提醒亚玛谢,真正帮助phah赢ê,是上帝。亚玛谢听tio̍h了后,表示钱已经付出à。M̄-koh上帝ê奴仆建议伊m̄免索取tńg来,上帝会补偿伊ê损失。伊听从上帝奴仆ê建议,就kā以色列ê军队打发tńg去,结果chiah-ê军队非常受气。后来mā采取报复行动(第13节)。

第11到13节,tī第廿一章记载犹大王约兰mā就是a祖时代,以东背叛犹大独立伊去。了后,犹大国一直积弱不振。因为án-ne,亚玛谢kah-ná有意思beh重建犹大国,希望ē-tàng恢复去过去大卫王朝时代辉煌ê光景。因为án-ne,伊整军三十万。然后出兵攻打以东,确实kā以东phah得落花流水,而且手段mā非常残暴,kā生擒ê一万以东人活活tùi坑khàm上推落去死亡。M̄-koh亚玛谢可能无想tio̍h,就tī伊攻打以东ê时,hō͘伊遣tńg去ê hiah-ê北国以色列十万佣兵,却去攻打属tī犹大占领ê城镇,而且刣死三千人,iáu抢去真chē财物。

第14到16节,亚玛谢真正ê问题就Tī chit段经文中显露出来。Chit段经文mā回应了第2节所讲ê,伊做「上主认为对ê事,m̄-koh m̄是全心」。当伊phah败以东了后,却tùi以东人hia kā in ê偶像mā带tńg来供奉。Chit件事惹起上帝极大ê愤怒,而且派先知去见亚玛谢,警告伊所犯ê chit项错误,m̄-koh亚玛谢却严词tńg来拒,讲伊无聘请先知当顾问。意思真清楚,亚玛谢表示chit位上帝ê先知多嘴、管siuⁿ chē。而且iáu警告伊,若koh-khah chē讲,会遇tio̍h刣身之祸。M̄-koh chit位先知无惊惶,因为伊一定tio̍h忠实地传达上帝ê信息,伊kā亚玛谢讲,上帝决定beh消灭伊,因为伊m̄听上帝奴仆传达ê信息。

重新查询 专卷研经 历代志下系列
错误回报,请联系comm[@]fhl.net