Chit段经文记载犹大王亚玛谢决定beh趁他国势渐渐强壮起来ê时，对北国以色列采取军事行动，chit件事真可能kah第13节所发生ê事件有关。M̄-koh chit pái ê军事行动是失败了，伊iáu被北国以色列王约华施所俘掳。这说明一个重要原因：是上帝teh决定胜负（第8节），m̄是军事装备á是兵丁ê武力chē少。

第17到19节，当犹大王亚玛谢向北国以色列王约华施挑衅ê时，约华施用侮辱ê话对亚玛谢派去ê特使讲，ài伊别骄傲，siōng好m̄-thang出来，若无，一定会亲像tī树林内ê刺phè仝款，野兽用脚一下就踩扁à。表示北国以色列并无惊南国犹大ê意思，m̄-nā án-ne，而且iáu ē-tàng真轻易就kā南国犹大phah倒。

第20到24节，亚玛谢听真受气，果然出兵去攻打北国以色列，结果上帝不帮助伊，而帮助北国以色列，hō͘犹大ê军队失败à。历代志作者讲，这是上帝用chit种方式来惩罚亚玛谢，因为伊弃sak上帝，供奉以东人ê偶像神明。亚玛谢被以色列俘掳，m̄-nā án-ne，连圣殿kah王宫ê贵重物件、财宝lóng被以色列带走。

第25到28节，ná亲像in老父约阿施仝款，亚玛谢mā是hō͘仇敌杀害ê，并m̄是死tī战场上。Chiah-ê仇敌真可能就是kah杀害in老父相关ê人。