Chit段经文说明tī大祭司耶何耶大活teh ê时代，犹大人民lóng遵从伊ê教导，m̄-koh伊往生后，kui个国家kah人民就变了样，以前拜偶像ê恶质ê行为koh重现，甚至连约阿施mā bē记得对伊照顾、扶持有恩ê耶何耶大，kā伊kiáⁿ撒迦利亚ê劝言当做侮辱，而杀害伊，而且杀害ê地点竟然是tī圣殿ê庭园里。

Chit段mā ē-sái讲是历代志作者siōng想beh说明ê一个信息：背叛上帝ê旨意ê君王，siōng常做ê事，就是kā上帝忠实ê奴仆刣死。因为in ê存在就是君王恶行恶状ê证据。Á上帝对tī杀害他忠实奴仆ê君王kah人民，绝对bē袖手旁观。上帝一定会惩罚，而且惩罚一定是严厉ê。

第14节b句到16节，耶何耶大真重视信仰生活，因为án-ne，tī伊活teh ê日子里，犹大人民对敬拜ê事非常重视。当伊往生ê时，犹大人民为tio̍h记念伊，特别是tī宗教信仰上ê坚持，特别kā伊埋葬tī「大卫城王室ê坟墓内」，表示伊ná亲像王族ê人仝款有地位、份量。伊ē-sái讲是以色列民族建国以来siōng受tio̍h礼遇ê一位大祭司。

第17到18节，chia无指明chiah-ê犹大ê领袖是甚么人，m̄-koh却thang看出tī大祭司耶何耶大往生后，犹大tùi国王约阿施开始，tī信仰上堕落ê速度非常紧。有可能是因为大祭司耶何耶大是用非常强猛ê手段执行宗教改革，m̄-koh无改变人累积tī心中ê偶像崇拜思维。

第19到20节，chia无说明上帝差派toh位先知去警告约阿施kah犹大人民，只有讲in m̄听。因为án-ne，上帝ê灵感动耶何耶大ê kiáⁿ撒迦利亚，ài伊去对犹大人民讲警告ê话，讲in既然弃sak上帝，上帝必定会弃sak in。这是真严重ê警语，因为上帝若弃sak犹大，in必定会遭遇灾难。

第21到22节，因撒迦利亚ê话语hō͘犹大领袖kah国王约阿施无法度忍受，因为án-ne，国王约阿施参与陷害撒迦利亚，并下令tī圣殿ê庭园里kā伊用石头phah死。作者tī chia特别强调约阿施已经bē记得大祭司一间对伊ê帮助kah对犹大ê贡献。M̄-koh撒迦利亚tī临终chìn前大声hoah：「愿上主看tio̍h你所做ê，惩罚你！」

第23到27节，上帝ê惩罚非常紧，就tī in杀害撒迦利亚ê仝一个年秋天，叙利亚ê军队就来攻打耶路撒冷，m̄-nā kā所有犹大领袖杀害，mā掠夺了真chē战利品。Chia特别强调叙利亚会得胜并m̄是因为有强大ê军队，犹大ê军事武力比in koh khah强大，m̄-koh上帝帮助叙利亚，用它来惩罚犹大。这mā说明圣经一贯ê立场：军队无tī装备ê武器，á是人数chē少，而tī上帝帮助敬畏他ê人（参考诗篇三十三：16—18）。

第24节说明历代志作者ê观点：有上帝赐福看顾，国家就无tī国防力量强弱，兵马无tī chē少，当犹大国tī约沙法王ê时代，bat有亚扪人、摩押人等联军逼近侵犯，m̄-koh in却无耗费任何兵力便得胜，因为上帝已经kā in ê敌人phah得落花流水。Tī亚撒ê时代，伊ē-tàng tī只有古实军队ê一半力量，phah溃in，chiah-ê lóng tī说明in óa靠上帝ê气力，就m̄免惊惶敌人来犯。颠倒，如果弃sak上帝，即使有强大ê军事国防力量，mā是枉然。Chit节讲攻打犹大kah耶路撒冷ê叙利亚军队，只不过是「一小队」ê兵力，「m̄-koh上主hō͘ in击败比in强大ê犹大军队，因为人民弃sak了上主――in祖先ê上帝。上主用这方法惩罚约阿施王。」约阿施既然会杀害上帝忠实奴仆撒迦利亚，上帝ê回应是hō͘伊tī chit pái战役中受tio̍h重伤。M̄-nā án-ne，伊手下ê两名军官，mā就是第26节所提起ê「撒拔」kah「约萨拔」，in利用军队teh撤退ê时，kā伊谋刣，替撒迦利亚报仇，这表示撒迦利亚被杀害ê事，tī犹大军队中有人不满。约阿施死后虽然葬tī大卫城，m̄-koh并无hō͘伊埋葬tī王室ê坟墓内。