Chit章主要tī说明两件事，第一是约沙法因为kah亚哈联合出兵，tú好表示伊mā支持一再藐视上帝神圣ê君王，chit件事hō͘上帝真受气。第二是约沙法继续非常积极进行宗教改革，伊同时任命真chē忠实ê宗教领袖当人民诉讼ê审判官，mā勉励in一定tio̍h遵守上帝ê规定，以公义审判人民ê案件。

    第1到3节，chit段经文是约沙法kah亚哈去攻打叙利亚ê战事后，tńg来到了耶路撒冷。先知哈拿尼得tio̍h上帝ê信息去对约沙法讲话，kā伊谴责无应该kah亚哈联合出兵。因为亚哈是「pháiⁿ人」，是「憎恨上主ê人」，约沙法无应该kah chit种君王做伙。因为chit pái ê事件，若m̄是上帝出手救助，约沙法就会死tī战场上。为tio̍h chit件事，上帝真受气约沙法，m̄-koh因为约沙法对改革人民ê信仰有贡献，上帝犹原会继续引chhōa伊。

    第4到7节，chit段经文讲约沙法lóng会定期出巡去看南国人民是m̄是lóng有归向上帝，伊巡视ê范围是全国各地lóng去。M̄-nā án-ne，为tio̍h beh彻底执行引chhōa人民归向上帝，伊tī各地设立审判所，任命审判官员，并且一定会敬畏上帝，beh按照公义审判人民ê案件。

	第8到12节，chit段经文说明约沙法任命利未人、祭司，kah其他领袖作审判官，审理人民ê诉讼案件。Tùi chit段经文thang真明确看出约沙法确实是一个真好ê君王，tī伊设置审判官员之职责siōng大ê特色，就是由政教分别审判无仝ê案件；大祭司审判宗教案件，一般领袖审判民事案件。这tī早期ê社会会án-ne分开，确实是件真无简单ê事，mā说明约沙法确实是一个聪明有智慧ê君王。伊ài所有审判官员，一定tio̍h心存敬畏上帝ê心，tio̍h忠实地办事，chiah bē致使得罪上帝。