历代志下 17章1节 到 17章19节   背景资料  上一笔  下一笔
Tùi第十七章到廿一章1节止,chit段经文是记载犹大王约沙法ê事迹。伊是继承老父亚撒ê王位,时间大约tī主前872到848年,前后统治犹大有廿五年。作者kā伊kah希西家、约阿施两个王并列,主要teh歌颂in对上帝ê忠实。特别是tī第十七章9节讲约沙法派人行遍犹大各乡镇去教导人民认bat上帝ê律法,chit点chiah是伊被作者看重ê要点。值得注意ê是,作者强调教导人民认bat摩西律法是利未人ê工作,mā就是祭司ê职责,就亲像上帝差遣先知耶利米beh去完成ê工作仝款(参考耶利米书十一:6—8)。

第十七章讲约沙法m̄-nā tī宗教教育上认真推行,而且tī国防工作上mā不怠慢,伊「奋发图强」,并且tī各城镇设立国防要塞。单单军力就高达一百一十六万之多,大卫时代ê犹大军力mā不过是五十万(参考撒母耳记下廿四:9)。

第1到3节,短短ê三节经文,就是用chit句「伊效法in老父早年ê模样,无拜巴力」来形容约沙法是一个上帝所欢喜ê君王。约沙法为tio̍h防范北国以色列koh一pái侵犯,伊积极tī各重要城市进行防卫工程。

第4到6节,约沙法对上帝忠实,伊不作弃sak上帝ê事,只遵行上帝ê命令,mā因为án-ne,上帝巩固了约沙法tī犹大国ê统治,hō͘伊kah犹大国渐渐强盛起来,koh khah重要ê,伊继续扫除国内所有ê偶像神明kah祭坛、神庙等等。

第7到9节,chit段经文真重要,讲约沙法为tio̍h beh帮助人民明白上帝ê律法诫命,特别派出使者,尤其是祭司、利未人到全国各地去教导人民认bat上帝ê律法,chit点mā说明一个重要信息:m̄-nā是国王会晓遵守上帝ê命令、诫命,所有人民lóng tio̍h遵守。因为人民若lóng知影遵守,国王就会知影bē-tàng违背上帝ê命令。

第10到13节a句,因为有上帝赐福、看顾,真自然tek,附近各国lóng m̄敢来侵犯犹大,颠倒地,iáu会来进贡,chia讲有阿拉伯人送hō͘约沙法「七千七百只绵羊kah七千七百只山羊」,这说明约沙法确实成做附近部落眼中ê一个强者。Chiah-ê进贡mā teh表示走chhōe犹大ê庇护。

第13节b句到19节,chit段经文讲犹大一个小小国家,就拥有chē kah一百一十六万大军,beh养chiah-ni̍h chē ê军队,除了需要有充沛ê经济能力外,mā tī说明犹大国势ê坚强,已经m̄是北国以色列ē-tàng忽视ê。其实,这lóng tī说明一件事:有上帝带领,国家就会强盛。相对ê,就会虚弱落来。


重新查询 专卷研经 历代志下系列
错误回报,请联系comm[@]fhl.net