历代志下 15章1节 到 15章19节   背景资料  上一笔  下一笔
Chit章经文主要tī说明犹大王亚撒án怎进行宗教改革ê工作。Chit章叙述上帝透过先知亚撒利雅去对亚撒讲出上帝ê信息,beh hō͘亚撒知影,只要坚持óa靠上帝,上帝一定会庇护in。虽然mā会tú-tio̍h困境,m̄-koh一定ài会记得,上帝必定会带领in行出苦难ê阴霾。因为án-ne,亚撒就决定听从先知亚撒利雅ê信息,积极撒除tī国家境内所有ê偶像神明kah祭坛,照列王记上第十五章12节ê记载,伊hit时chūn ê犹大人民,mā有人tī偶像神明ê庙里当男娼,伊kā chiah-ê人lóng驱逐离开国境。M̄-nā án-ne,并且iáu真勇敢地kā伊祖母玛迦太后ê后位mā kā它废除,只因为为伊造偶像神明。唯一可惜ê,是伊无kā全国所有ê偶像lóng去除掉。M̄-koh已经算是bē-bái ê一位君王à。

    第1到2节,chit两节讲先知亚撒利雅得tio̍h上帝ê启示,去对亚撒kah犹大、便雅悯两支族ê人民讲出上帝ê信息。Tī chia真清楚讲出上帝ê应允,只要犹大人民顺服上帝,in就会发觉上帝一直teh带领 in。

    第3到7节,「以色列已经真久无真神,无祭司ê教导,无律法。」chit句话真清楚讲出士师时代ê情景就是án-ne。M̄-koh chit-má ê北国以色列竟然koh kah士师时代仝款,无人拜真正神上帝,连祭司lóng m̄是上帝所拣选ê奴仆,却是国王家己设立,而且为tio̍h beh拜偶像神明之需。Mā因为chit-ê缘故,上帝hō͘灾难chiap-chiap出现tī北国以色列,chit种灾难就是动荡不安,除了外患多,而且内乱无停。M̄-koh先知亚撒利雅ài亚撒kah南国人民一定tio̍h坚忍守tiâu对上帝ê忠实。

    第8到9节,亚撒听完先知亚撒利雅ê信息后,受tio̍h真大ê鼓舞,决定推动宗教改革,m̄-nā去除犹大境内ê偶像神明,mā进行修筑圣殿院内ê祭坛,表示洁净敬拜上帝ê心灵ê意思。因为án-ne,真chē tùi北国以色列ê支族人民,包括有以法莲、玛拿西、西缅等支族ê人,lóng纷纷来归顺亚撒ê统治之下,mā亲身体验到上帝同在ê气力。

	第10到15节,亚撒就呼召chiah-ê tùi北国来归顺ê以色列人民,kah南国犹大人民,大家聚集做伙tī耶路撒冷,用献祭ê方式重新kah上帝立约,表明beh全心全意敬拜上帝,并且立愿若是有人弃sak上帝,就一定tio̍h处死,免得别人因为拜偶像神明而受害。就án-ne,上帝ê应允果然应验tī犹大国境之内,m̄-nā人民生活快乐,mā无外患出现,因为上帝就是in ê保护者,hō͘ in享受太平。

    第16到19节,chit段经文记载亚撒koh khah进一步kā家己ê祖母玛迦太后ê官阶hō͘废掉,原因是伊贵为太后,却带头铸造偶像,这m̄-nā hō͘家己败坏,mā会连带ê影响tio̍h人民ê信心。因为án-ne,当亚撒kā玛迦ê太后后位废除,mā tī说明若继续发见伊无停止偶像崇拜,真可能会亲像一般人民hit种被处死。而且,亚撒积极kā全国各地所有偶像kah祭坛lóng hō͘摧毁。伊一生对上帝忠实,并kā所有老父beh献hō͘上帝ê器物lóng khǹg tī圣殿里,表明真实归属tī上帝所有。Án-ne,直到伊治国ê第三十五年,国家都无出现过战争。唯一可惜ê是,伊无kā山丘上ê神庙hō͘全部摧毁,chit点真可能就是kah伊ê祖母玛迦太后有关,hō͘改革ê工作发生困难。

重新查询 专卷研经 历代志下系列
错误回报,请联系comm[@]fhl.net