历代志下 13章1节 到 13章22节   背景资料  上一笔  下一笔
Chit章记载罗波安ê kiáⁿ亚比雅ê事迹。伊登基做王ê年代大约是tī主前913到910年。历代志ê作者用比列王记作者koh khah长ê篇幅绍介亚比雅ê事迹(参考列王记上十五:1—8),而且认为伊是一个好ê王,chit点kah列王记作者ê看法无仝,后者用「伊犯kah in老父仝款ê罪,无亲像伊a祖大卫hit种一心一意忠于上主――伊ê上帝」(参考列王记上十五:3),而tī历代志chia,作者却讲亚比雅带领伊ê人民「犹原事奉主――咱ê上帝,无弃sak伊」,kah以色列ê王耶罗波安完全无相仝。

    Ná亲像头前已经叙述过ê,历代志ê作者kā重点khǹg tī南国,除非北国有特殊ê事件是kah南国犹大有关ê,chiah会记录落来,而chit章就是tī chit种编撰要件之下记录落来,为tio̍h是beh表明耶罗波安统治下kah南国犹大tī亚比雅统治下,虽然耶罗波安有八十万大军,而南国国势khah弱,只有北国以色列ê一半――四十万军队,m̄-koh,因为南国亚比雅忠于耶和华上帝,因为án-ne,也ē-tàng phah败拥有大军ê北国以色列,甚至消灭了in chē kah五十万ê精兵。

    另外一方面,历代志ê作者对tī历史ê诠释角度mā kah列王记无仝,作者不提耶罗波安带北部族人离开犹大统治ê原因,是kah所罗门加重税tī人民身上ê事有关。颠倒,却是讲耶罗波安背叛所罗门,并且「招集一阵流氓无赖,拗蛮强烈地对敌所罗门ê kiáⁿ罗波安」,这真明显lóng是出tī南国ê观点。

    第1到3节,chìn前tī罗波安继位后chiah第四年,埃及就来进攻,而且攻入了耶路撒冷。对南国犹大造成重创。chit-má,是罗波安ê kiáⁿ亚比雅chiah继位无久,换北国以色列耶罗波安率领chē kah八十万大军来攻打南国犹大,而犹大chiah只有北国以色列军队ê一半兵力而已。这真清楚teh表示,两国若是án-ne开战落去,南国犹大必定会惨败。另外一方面,chit种记载mā tī说明,分裂后ê北国以色列,实力确实比南国犹大iáu koh khah强。

	第4到9节,chit段描述南北两军对峙,犹大王亚比雅就先对北国以色列统治者耶罗波安kah以色列军队讲话,这真亲像先来一场心理战。Chit段经文就是亚比雅所讲ê第一段话。Tī chit段话里,伊强调大卫ê kiáⁿ孙,chiah是上帝立约传承ê对象。意思是teh指耶罗波安根本就m̄是上帝拣选来领导以色列民族ê王。因为án-ne,伊形容耶罗波安是「背叛」所罗门,并且围tī伊身边ê,是一阵无赖,拗蛮强烈地对敌所罗门kiáⁿ罗波安。Koh khah严重ê,是teh指出耶罗波安带领人民去拜金牛,koh kā祭司亚伦ê后代kah利未人赶走,只要有钱,就ē-tàng买祭司ê职位来当。

	Tùi chit段经文thang看出亚比雅对耶罗波安kah北国以色列军人,提出非常严重ê警告。

    第10到12节,chit三节真真明显是相对tī前一段,亚比雅tī chia表明南国犹大拥有耶路撒冷圣殿,chiah是正统ê传承者,而犹大kiáⁿ孙担任统治者ê角色。作者用「亚伦ê后代执行祭司ê任务;利未人协助in」chit种句话teh代表正统,强化上帝kan-taⁿ会kah「正统传承」者同在。这「正统」包括由祭司kah利未人担纲ê敬拜礼仪(这mā teh暗示:tī耶路撒冷圣殿ê敬拜chiah是对ê)。Koh讲,这mā teh表明南国犹大ê人民对上帝忠心,因为这teh表明in严守摩西律法ê规定。

    第13到18节,chit段经文thang看出耶罗波安tī军事上是真有能力ê,知影怎样对犹大军队前后夹攻。M̄-koh犹大军队因为有祭司陪伴出兵,知影tī siōng危急ê时chūn,走chhōe上帝ê带领kah帮助。果然,上帝伸手救助犹大军队,虽然in chiah只有四十万兵力,却phah败拥有八十万大军ê北国以色列,m̄-nā án-ne,iáu消灭了北国以色列五十万精兵。这lóng teh表明一个基本信念:真正hō͘军队获胜ê,m̄是军事武力,却是上帝ê旨意。

第19到20节,chit pái犹大phah了胜仗,而且占领了北国几个重要城市,包括有伯特利、耶沙拿、以弗伦,kah chiah-ê大城附近ê庄头。北国以色列因为chit pái ê重创,tī耶罗波安统治期间,lóng无法度koh一pái出兵攻打犹大。

第21到22节,亚比雅mā因为chit pái phah败犹大,国势渐渐强大起来。伊kah老父罗波安仝款,拥有真chē bó͘ kah细姨kah kiáⁿ。

重新查询 专卷研经 历代志下系列
错误回报,请联系comm[@]fhl.net