Tī头前有讲过，「教会」是一阵被拣选出来ê人组成ê信仰团契。应该是用建立信仰为主要活动ê目标。M̄-koh，因为chit种团契比一般社团koh khah单纯，信徒容易体贴别人ê软弱kah需要，因为án-ne，早期就有一kóa人设法混入教会，加入chit-ê信仰团契中，进行欺骗ê事。使徒保罗写hō͘哥林多教会ê书信中，mā提起有kóa人自称是「使徒」，其实就是teh欺骗信徒ê钱财，而为tio̍h beh达tio̍h欺骗ê目的，chiah-ê自称是「使徒」ê人，甚至会kā信徒讲，使徒保罗并m̄是真正「使徒」。使徒保罗因为án-ne非常受气，kui气讲chiah-ê专门teh欺骗人ê是「超等使徒」（参考哥林多后书十一：5、12、十二：11）。

Chit-má，chia mā提起tī以弗所教会出现所讲ê「假教师」欺骗信徒。使徒保罗写这信，就是提醒提摩太注意chit种人tī教会内进行破坏信徒对信仰ê认知，一定tio̍h kā它防范。

第1到2节，开始就提起有kóa人是专门teh教会内欺骗信徒ê人，in ê「良心ná亲像hō͘烧热铁烙死去」仝款。使徒保罗用chit句话来形容chiah-ê专门tī教会内欺骗信徒ê人，ná亲像「欺骗ê灵kah邪魔ê」奴隶仝款，性命被控制à。Chit种人tī教会内，kan-taⁿ会听从了魔鬼ê命令，却m̄是服从上帝ê旨意。

第3到4节，chiah-ê被魔鬼控制ê人，in欺骗信徒ê内容主要有两种：
一是禁止嫁娶。为甚么m̄-thang嫁娶？原因mā是kah早期教会bat兴起一股烧热潮有关，认为世界末日teh beh来临，结婚kah「性」有关系，而「性」是属tī肉体ê，会败坏人ê心灵。为tio̍h迎接teh beh来临ê末日kah上帝严酷ê审判，保持洁净ê身心siōng重要。因为án-ne，采取禁婚成做当时非常流行ê「禁欲主义」者ê不二法则。

二是tī生活上不时禁食。这mā是kah禁欲主义有密切关系，认为大食大lim，会败坏心灵ê洁净。洁净ê心是tùi目睭看tio̍h ê「物」开始，如果tī lim食方面用siuⁿ chē ê心思，会hō͘人ê心灵受tio̍h污染。

这thang了解早期基督徒采取禁欲主义，特别是tī婚姻kah lim食ê方面，确实有受tio̍h来自犹太人ê影响。Á另外一个影响早期基督徒比较大ê，就是「重智派」（所讲ê「诺斯底主义」）ê影响，chit-ê派系主张：人ê身躯kah灵魂是分开ê；灵魂是神圣而且洁净ê，身躯是无清气ê。灵魂只是暂时借tòa tī肉体上。因为án-ne，若是无洁净ê生活，就会污染了灵魂ê洁净，对死后ê灵魂影响非常大。

第5节，使徒保罗提出两种看法：
一是上帝ê话。用siōng简单ê一句话代表上帝ê话，就是「圣经」。因为有圣经ê记载，chiah ē-tàng明白上帝ê旨意是甚么。耶稣基督ê譬喻中，记载tī路加福音第十六章十九到三十一节ê财主kah乞丐拉撒路，最后强调ê就是：一个人若是不读圣经，bē明白圣经上帝ê话语，即使有死人koh活ê神迹出现tī目睭前，mā是无法度明白。

二是祈祷。祈祷是kah上帝对话。一个会祈祷ê人，就是心中有上帝ê人。M̄-koh祈祷一定tio̍h具备两个基本ê认bat：谦卑kah真诚ê心。无谦卑ê心，祈祷就真虚假；无真诚ê心，祈祷反tńg会污秽上帝ê神圣。心中有上帝而知影谦卑ê人，就会知影节制ê重要性。因为án-ne会明白怎样tī lim食顶面知影有所节制，mā会知影怎样tī婚姻生活上见证信仰ê内涵。

第6节，tùi chit节开始直到第六章19节，lóng是讲tio̍h一个好koh忠实ê上帝奴仆，应该有ê牧养态度。使徒保罗hō͘提摩太知影，一个好ê福音工作者，就是beh真清楚教导信徒认清真正圣经ê教示。Á正确教导信徒，mā会hō͘家己tī「灵性上长进」。

第7到8节，tùi chit节thang看tio̍h tī以弗所教会内有kóa人确实欢喜胡乱解说圣经，无好好á研究经文ê背景，不时the̍h-tio̍h圣经就开始解说，而且解说ê方式lóng是停留tī字面上ê。使徒保罗劝勉提摩太tī信仰上避免一kóa怪诞、邪讲，chiah ē-tàng hō͘人得tio̍h洁净ê心灵。Mā只有án-ne，chiah ē-tàng帮助信徒过敬虔、洁净ê生活。使徒保罗强调，一个信徒若知怎样过敬虔生活，就是teh训练家己，帮助家己日益进步。Án-ne，tī灵性上自然会提升。Mā因为chit-ê缘故，就会有「今生kah来生ê ǹg望」。

甚么是「今生kah来生ê ǹg望」？「今生」指ê就是chit-má。「来生」指ê是koh活ê性命。换句话讲，一个基督徒必定清楚现今ê世界有真chē苦难，m̄-koh基督徒真清楚，正确ê信仰并m̄是hō͘咱脱离、闪避chiah-ê苦难，却是hō͘信耶稣基督ê人得tio̍h够额ê气力赢过chiah-ê苦难（参考约翰福音十六：33）。基督教信仰就是hō͘信徒学会晓勇敢面对性命ê苦难。

第9到10节，chia所讲ê「辛勤努力」mā有另外一种讲法，是teh指「tú-tio̍h谴责」。其实两种lóng适合tī使徒保罗kah伊ê福音同工，因为in tī传福音ê事工上，确实真辛勤努力，m̄-koh mā不时tú-tio̍h别人ê辱骂、迫害。Tùi哥林多后书第十一章23到27节，就会发见使徒保罗遇tio̍h ê迫害非常严重。为tio̍h传福音，而tú-tio̍h性命中siōng痛苦ê经历，m̄-koh并无因为án-ne而馁志，原因就是伊并m̄是kā性命ê希望寄托tī人ê身上，却是寄托tī永生ê上帝。

Tī chia，使徒保罗讲传道者是beh kā「ǹg望寄托tī永生ê上帝」。伊讲这永生ê上帝是：
一是万人ê救主。意思是teh指chit位创造宇宙万物ê上帝，希望所有ê人lóng ē-tàng因为信靠耶稣基督而得tio̍h永恒ê性命。Chit位「永生ê上帝」，并m̄是只拯救某一kóa特定ê对象，而是beh拯救所有ê人，因为他爱所有ê人。

二是信他ê人ê救主。上帝对hiah-ê已经信靠他ê救恩ê人，mā就是所讲ê基督徒来讲，救赎ê恩典绝对bē失落。因为án-ne，伊讲「chit-ê话是可靠、值得完全接受ê」。

第11到12节，所谓「chiah-ê事」，指ê就是头前所提起过ê有关真实ê真理，kah虚假ê邪讲谬论。使徒保罗特别提醒提摩太不beh hō͘人看轻伊「少年」，当犹太人讲一个人「少年」ê时，意思是teh指iáu未年满四十岁。提摩太tī使徒保罗ê心目中，是看做「信仰上ê真kiáⁿ」（参考提摩太前书一：2），因为án-ne，伊ài提摩太m̄-thang hō͘人感觉家己kah-ná无长大ê人仝款。Tī chia提醒提摩太几点thang成做信徒模样ê事：

一是言语。这是传达一个人ê理念重要ê媒介。因为án-ne，一个人是m̄是有内涵，就是透过语言传达出来。

二是行为。单单靠言语并m̄是siōng好ê方式，言语往往是ē-tàng装饰ê，却无一定实在。设若无实际ê行动表明出来，听ê人mā bē相信。

三是疼心。使徒保罗tī chia所用ê「爱」字，是真实ê疼，真诚无虚假ê态度。其实，这是kah头前两项lóng有关连。言语一定tio̍h真实，行动mā tio̍h切实。若无，lóng会成做不诚实ê记号。疼心mā是beh tùi真实开始做起，使徒保罗讲「爱是联系一切德行ê关键」（参考歌罗西书三：14）。

四是信心。Chia所讲ê信心有两个层面，一是teh指对上帝有信心。二是teh指对所认bat ê信仰有坚定不疑的确信。这就需要不时训练家己，hō͘家己tī信仰ê内涵上提升、进步。

五是纯洁。这是teh指心中无邪念，无存 pháiⁿ念头ê意思。
第13节，这是真重要ê一节经文，使徒保罗ài提摩太tī圣经研究、讲道，以及教导信徒认bat圣经ê工作上多下功夫，因为基督ê教会就是用圣经ê话语为基础。

第14到15节，使徒保罗tī罗马书第十二章6节án-ne讲：「咱tio̍h按照上帝hō͘咱ê恩惠，好好á运用无仝ê恩赐，做应该做ê事。」然后，伊提起上帝赐hō͘每一个人ê恩赐虽然lóng无lóng仝款，m̄-koh lóng thang成就传福音ê目标。换句话讲，每一个人身上所有ê恩赐，lóng是tùi上帝来赏赐，如果无好好á运用tī传福音ê事工，chiah-ê tùi上帝来ê恩赐，就浪费à。使徒保罗koh一pái提醒提摩太tio̍h注意家己tī chit方面ê恩赐，虽然chia无说明提摩太有甚么特殊ê恩赐，m̄-koh知影提摩太tī以哥念、路司得等地，lóng lóng受当地信徒ê o-ló，必定是tī服事ê工作上有真好ê见证。使徒保罗希望伊继续kā chit种chiah ē-tàng发挥出来。

第16节，chit节提起本身是一个传道者应该有ê传福音态度，就是知影反省，hō͘家己tī言行举止上谨慎，因为传道者若beh成做信徒ê模样，就一定tio̍h注意家己时刻成做信徒ê镜子。使徒保罗mā提起一个重要ê观念，就是传福音m̄-nā thang帮助别人得tio̍h上帝ê救恩，mā是teh帮助家己koh khah接近上帝ê救恩。