提摩太前书 2章1节 到 2章15节   背景资料  上一笔  下一笔
第二到三章,使徒保罗讲tio̍h有关教会生活ê规律,特别是tī第二章伊提起应该有ê信仰态度之外,就是对教会团契生活中,应该有ê基本行为。教会就是一个信仰团契á是大家庭,因为án-ne,教会有mài-koh tī一般社会团体。Tùi chia thang看tio̍h使徒保罗所努力ê,就是beh建立一个以信仰为基础ê团契。

	第1到2节,使徒保罗beh为所有ê人向上帝「祈祷」,这就是所讲ê「代祷」,而代祷ê对象包括「君王kah所有在位ê人」。因为教会ê存在是为tio̍h所有ê人,并m̄是为tio̍h某一个人,mā m̄是为tio̍h某一kóa特定对象。另外,教会若是属tī耶稣基督ê身躯,是为tio̍h所有自认有罪ê人而存在。因为án-ne,只要是属tī基督ê教会,就是beh关心所有ê人,并且beh为所有ê人向上帝祈求,这是基督教会应该有ê信仰责任。祈祷,是teh表明教会是用上帝做中心,上帝做敬拜ê对象,他是教会ê主,mā是性命ê主宰。因为án-ne,有真诚之心teh祈祷ê教会,bē kā某一个人当做siōng重要,却是会以上帝为siōng重要。

第3到4节,使徒保罗认为ē-tàng为所有人向上帝代祷,这是一件好事,是上帝所欢喜ê事。因为上帝并无希望有人沉沦。上帝是疼,他希望所有ê人lóng ē-tàng「得救,lóng认bat真理」。

第5节,chit节thang参考哥林多前书第八章6节。使徒保罗特别解释了「真理」ê意义,就是:「只有一位上帝,tī上帝kah人之间有一位中间人,就是成做人ê基督耶稣。」chit-ê句话mā ē-sái讲是基督教会ê基础,mā是使徒保罗提醒提摩太治理教会一定tio̍h谨记在心ê一件事。这mā提醒提摩太知影,tī以弗所教会中必定有人kā耶稣基督拯救ê恩典hō͘疏忽à。

当使徒保罗讲出「只有一位上帝」,并且强调讲这就是「真理」ê时,chit种讲法tī当时ê环境下,差不多就是teh拚命仝款,因为tī当时若否定罗马皇帝是神,等于否定皇帝ê权威,这会带来性命ê危险。M̄-koh使徒保罗对提摩太劝勉,tī牧养教会ê工作上,一定教导信徒知影「只有一位上帝」,chit-ê真理是无thang取代ê。

二是耶稣基督就是上帝kah人之间ê中间人。这是新约圣经ê主题,ná亲像希伯来书ê作者一再强调ê,耶稣基督「成做新约ê中间人,为tio̍h beh hō͘上帝所呼召ê人ē-tàng领受伊所应允永恒ê福泽」(参考希伯来书九:15a)。

第6节,chit节是进一步teh解释第5节所提起ê「中间人」chit-ê名词ê意义。使徒保罗讲这「中间人」是用牺牲家己ê性命,就是为tio̍h beh hō͘人tùi罪ê中间tháu放出来,因为罪ê代价就是「死亡」(参考罗马书六:23),耶稣基督成做「中间人」,就是用伊ê死为代价hō͘所有世人ê罪得tio̍h赦免,因为上帝「ài人人得救」。

第7节,使徒保罗hō͘提摩太知影伊ê使命,就是beh帮助「外邦人」知影耶稣基督ê救恩。Chit点kah伊tī传福音ê经历有特别关系(参考使徒行传十八:5—7),其实,伊心内非常期待所有犹太人lóng ē-tàng听信福音,伊甚至讲若犹太同胞ē-tàng听信福音,而伊为tio̍h án-ne而受诅咒mā愿意(参考罗马书九:3)。Tī这节使徒保罗自认担任三个角色:一是传道者、二是使徒、三是教师。其实,三者名称无仝,实质ê意思是仝款ê。

	Tùi第8节开始,直到第15节,lóng是讲tio̍h针对信徒tī教会信仰生活中应该有ê规律。伊事(tāi)先提起对「cha-po͘人」ê期待。事(tāi)先伊讲起「cha-po͘人」tī教会ê时祈祷应该「虔诚地举起手来祈祷」,chit种方式大概就是早期犹太人siōng普遍祈祷ê姿态—khiā立、举手、掌心朝上,而且tio̍h仰望天空。Chit-ê意思就是用无犯罪ê手。如果人ê手一面犯罪,一面祈祷,这是对上帝极大ê污辱,等于是teh亵渎上帝ê神圣仝款。Koh讲,祈祷iáu koh khah「bē受气」,就是无记tiâu别人ê错误。换句话讲,祈祷不是beh控告别人ê状。Á「不争论」,意思是teh指「giâu疑」。Án-ne就真清楚了,当beh向上帝祈祷ê时chūn,m̄-thang心存怀疑。如果对上帝有怀疑ê心,祈祷就无意义à。

第9到15节,chit段经文是关系教会妇女ê期待。类似ê经文mā出现tī哥林多前书第十四章33节到35节。

Thang理解使徒保罗是一个观念真传统ê犹太人,至少伊是属tī法利赛派教育长大ê犹太人。使徒保罗mā会hō͘家己传统ê文化思想所左右,m̄-koh真正teh beh了解使徒保罗对当时基督徒之社会生活ê用心,thang理解是非常认真,而且要求比一般社会ê伦理道德之标准iáu koh khah koân。Á tùi第五章就会发见当时以弗所教会内部,必定发生真chē kah妇女相关ê问题,包括有妇女打扮得「花枝招展」,看起来ná亲像以弗所城女神亚底米(参考使徒行传十九:24)庙内ê庙妓仝款;有ê妇女真爱「串门子」,四界乱讲话,「in讲长道短,专管闲事,讲kóa无应该讲ê话」(参考提摩太前书五:13);可能有kóa寡妇tī日常行为上,hō͘人认为伊欢喜chhōe cha-po͘人同房,因为án-ne hō͘人议论等等,因为án-ne,使徒保罗chiah会讲出chit段经文所记载ê教示。Án-ne,咱thang看tio̍h一件重要ê事,就是使徒保罗每写一封书信,lóng有伊特定ê对象kah目的,伊写hō͘提摩太ê chit封书信,就是beh伊去教导以弗所教会信徒,一定tio̍h遵守ê教会生活规矩,免得因为m̄知节制,致使耶稣基督ê名声受tio̍h影响,chit点chiah是伊所关心ê。

伊强调基督徒应该ài有「好行为」thang kah信仰告白来相称。所谓「好行为」thang参考提摩太前书第一章5节所提起ê三项内涵。伊koh提起cha-bó͘人需要「恬恬学习,事事谦卑」。Tī早期社会,妇女真少有机会受正规教育,koh khah少有机会参与家庭以外ê社交活动。M̄-koh因为信耶稣基督了后,大家thang tī聚会ê所在彼此分享tùi圣经中学习tio̍h ê信息kah生活经验。因为án-ne,这是一个真难得ê机会,hō͘妇女thang tī教会中得tio̍h新ê知识,开启被掩盖ê心智。

第12节是一再被真chē人提出质疑地ê,有可能当时以弗所教会内已经有类似今á日教会ê「姊妹团契」(á是妇女团契)之类ê组织,m̄-koh却m̄是用心在学习认bat圣经ê教示,反tńg是teh讲长道短,致使教会内部是非真chē,影响tio̍h教会规矩。Chia所提起ê「管辖」,原本ê意思是teh指「僭jú」,意思是讲超过了家己ê职权范围。这是teh指tī教会内有妇女想beh kah cha-po͘人争夺权位。Tio̍h注意:福音ê事工是彼此同工,却m̄是争地位高低。信徒彼此相争,就会造成教会ê分裂。

第13到15节,tī chit三节经文内底,使徒保罗采用创世记第二到三章经文ê背景,说明男女之间互动ê关系。Ná亲像我tī头前已经提过ê,使徒保罗是生活tī犹太文化之下,而且tī两千年前时代ê希腊文化思想教育下成长ê人,当伊teh处理人ê问题ê时,mā是仝款脱离不了当时环境ê限制。因为án-ne,看chit段经文ê时,thang了解使徒保罗写chit张phoe,是为tio̍h beh应付发生tī以弗所教会ê问题,并m̄是一封thang用tī每一个地方ê书信。

Tī使徒保罗ê观念中,伊所强调ê是tī耶稣基督内面,大家lóng是仝款ê,lóng是属tī耶稣基督身躯中ê一个小肢体(参考哥林多前书十二:12—13)。伊teh写hō͘加拉太教会ê书信中mā提起chit种话讲:「无分犹太人á 是外邦人,奴隶á 是自由ê 人,cha-po͘ 人 á 是 cha-bó͘ 人,tī 基督耶稣内面lóng 成做一体。(全民版)」(加拉太书三:28)Án-ne chiah是使徒保罗真正想beh表达ê通则观念。

重新查询 专卷研经 提摩太前书系列
错误回报,请联系comm[@]fhl.net