真清楚，使徒保罗对伊得意ê门徒提摩太确实有坚决ê信任，并且对伊有真chē期待。

Tī chit章经文中，thang分做两段落，一是第1到11节，伊劝勉提摩太一定会严厉谴责hiah-ê tī教会中虚假ê教导。二是第12到20节，使徒保罗一贯ê思想，就是tńg来到耶稣基督ê救恩里，只有án-ne，人chiah ē-tàng看见上帝怜悯ê疼。伊同时指责悖逆真理ê舒米乃（许米乃Hu-mé-nái） kah亚历山大两人。

Tī chit段经文中，使徒保罗用第1到2节讲chit张phoe ê信徒就是伊所欢喜ê门徒提摩太。然后tùi第3节开始，伊提起tī教会中有人传讲hiah-ê无正确ê信息，而chit种现象m̄是只有一间教会，却是真chē教会lóng有仝款ê问题。

第1到2节，使徒保罗就以「使徒」自称。为甚么伊会án-ne？就是因为早期教会内，lóng是有人欢喜讲权威，认为「使徒」siōng重要，地位siōng koân，而使徒保罗并m̄是in认定ê使徒。M̄-koh使徒保罗自认伊之所以当「耶稣基督ê使徒」，是因为「上帝」kah所「ǹg望基督耶稣ê命令」下而拥有「使徒」ê身分。然后伊讲提摩太是伊tī「信仰上ê真kiáⁿ」，chit句话已经表明伊kah提摩太之间有ná老父和kiáⁿ一般ê亲密关系（参考腓立比书二：22）。使徒保罗一向kā听tio̍h伊所传ê福音而信主耶稣基督ê人，看做是伊tī信仰上所生ê「kiáⁿ」，连伊所建立ê教会mā是用chit种看法（参考哥林多前书四：14—15）。

	续落来，使徒保罗用「主耶稣基督赐恩典、怜悯、平安」做祝福提摩太ê话语。这通常mā是当时罗马人书写信函ê一种方式，会tī phoe ê起头先请安对方，并祝福收phoe者。

第3节，tī chit段经文中，使徒保罗提起伊写chit张phoe ê主要原因之一，就是希望提摩太继续留tī以弗所城，主要原因是该教会有人teh传「无正确ê教义」。Chia并无提起甚么是「无正确ê教义」？m̄-koh tùi提多册第一章10节thang发见所谓传「无正确ê教义」ê人，就是「主张受割礼ê犹太基督徒」，in认为：无论甚么人，若无按照摩西律法ê规定接受割礼，就无法度得救（参考使徒行传十五：1），chit-ê问题m̄-nā发生tī以弗所教会，mā发生tī安提阿、加拉太等地ê教会。使徒保罗为tio̍h án-ne非常受气，严厉谴责传chit种信息ê人，就是teh传「另外一种福音」，伊甚至严肃地警告讲，传chit种信息ê人应该受tio̍h诅咒（参考加拉太书一：6—9）。

另外一点，所谓「无正确ê教义」，真可能kah早期教会内非常流行ê观念有关，就是「诺斯底主义ê思想」，chit种思想强调人ê性命thang分做两个主要部分，其一是肉体ê，另外一个是灵魂ê。Chit种思想认为肉体是败坏ê，因肉体是hō͘邪恶ê气力控制，灵魂chiah是属tī上帝ê。因为灵魂是圣洁ê，而上帝是圣洁ê上帝。如果是án-ne，就会延伸出一个koh khah严肃ê问题出来，耶稣基督并无真正地生存在chit-ê世界，伊只是「暂时借tòa」tī邪恶ê肉体中，因为án-ne，当伊往生ê时，神圣ê灵魂就离开了chit-ê邪恶ê肉体。若án-ne推演落去，耶稣基督就无真正koh活。

第4节，chit节hō͘咱看tio̍h使徒保罗提醒提摩太到以弗所教会去ê时chūn，beh指导该教会ê信徒，「放弃hiah-ê荒唐ê传说kah冗长ê族谱」。Tùi chit句话中，ē-tàng看出，这并m̄是来自外邦人ê问题，却是一阵犹太基督徒对信仰ê看法产生ê错谬。使徒保罗是强调，siuⁿ chē chiah-ê「传说」对信仰并无真实ê意义，因为信心mā一定tio̍h建立tī理智、知识ê范围内，chiah bē hō͘信仰变成迷信。Á族谱代表血缘ê传承，hō͘人会因为án-ne想独占上帝ê救恩，而kā耶稣基督救恩限制了，对上帝拯救ê恩典一点帮助mā无。

第5节，ē-sái讲是使徒保罗「命令」提摩太前往以弗所教会ê主要用意，伊希望提摩太带hō͘以弗所教会ê，就是beh hō͘ in知影怎样彼此互相激励tī疼心ê事顶面多下功夫。伊特别提起三点有关疼心ê认bat：一是纯洁ê心。意思是teh指无不良ê动机，是真实ê心内意念。二是洁白ê良知。这是teh指心内反省ê能力，对道德行为有良善ê准则。三是纯真正信心。表示一个人对上帝绝对忠实，无虚假ê态度。另外一个重要ê意思，是teh指真诚。亲像发见有错误ê行为，就beh指证出来，m̄是惊得罪人，koh感觉pháiⁿ势。

第6到7节，使徒保罗提醒提摩太注意，教会内部会发生ê问题，就是有kóa人kā前述三种tī信仰团契中真重要ê要件hō͘疏忽了，in去听hiah-ê「无正确ê教义」、「荒唐ê传说kah冗长ê族谱」。换句话讲，已经有信徒离开了教会，去追逐chiah-ê荒谬ê邪讲。Chit种行踏m̄-nā hō͘家己陷入迷信，mā会造成教会ê伤害。

第8到10节，tùi chia thang看出使徒保罗并m̄是反对摩西律法，伊甚至tī chia真清楚讲「ē-tàng合宜地使用律法，律法原是好ê」。Tī chia伊提起一个基本观念：一个基督徒ê得救，是因为伊清楚知影并m̄是因为遵行律法ê规定，却是因为耶稣基督ê救恩，chit点mā是伊所有书信中所siōng重视ê信仰观念。使徒保罗tī chit两节中，提出一kóa tī伊看起来行为已经背离了社会生活规范ê事。其实，chiah-ê列举出来ê共计有十四项，其中前六项，ē-sái讲是kah对上帝ê忠实有关，后八项则kah社会生活相连接。Mā tùi chia ē-tàng看出，chiah-ê所列举出来ê事项，有十诫ê内涵。

第11节，chia提起「健全ê教义」，意思是teh指帮助人领受福音了后，所带来丰富ê性命。Mā就是kui个性命kah上帝相连结。Á ē-tàng hō͘人kā全部性命连结tī上帝ê，就是透过耶稣基督ê福音。