Chit段经文真清楚说明，先知撒母耳tī上帝ê指示下，知影扫罗就是上帝为以色列人拣选ài做君王ê人，而扫罗本人是根本lóng m̄知chit件事。

第15到16节，上帝拣选，上帝会启示hō͘相关ê人知影。Chit两节是kui个拣选扫罗为王ê中心经文，表明拣选乃是出tī上帝ê旨意，m̄是出tī人民ê意思。用油膏立一个人为王，有he用油膏立一个人为祭司（参考出埃及记廿九：7），表明chit-ê人身上负有上帝所交托ê使命，伊非常重要ê工作，就是听从上帝ê旨意做tāi-chì。

第17到18节，上帝hō͘先知撒母耳知影扫罗就是上帝beh拣选出来当以色列人民ê王。

第19到21节，扫罗因为m̄-bat先知撒母耳，iáu teh询问怎样chiah ē-tàng chhōe-tio̍h「先见」（kah「先知」仝款意思）ê时，先知撒母耳回答扫罗，并且hō͘ in知影in老父失去ê驴á会chhōe tńg来，同时hō͘伊知影上帝beh拣选ê对象就是伊，这hō͘扫罗感觉惊kah gāng去kah不安。因为伊是属tī便雅悯支族，而便雅悯支族是以色列十二支派中siōng微小ê，taⁿ，若ài伊出来带领以色列十二支派，恐惊是一件非常严重ê负担，所以伊chiah-tio̍h撒母耳讲「你为甚么对我讲chit种话」。