Chit段经文主要teh说明设立君王一定tio̍h负担ê税赋要件，比chit-má in无君王ê时，tio̍h加出一倍ê负担，就是十分之一。Á chiah-ê十分之一包括了人口、土地、农产、cheng-seⁿ等，甚至全体以色列人民lóng tio̍h承担chiah-ê税赋，无人ē-tàng避免。M̄-koh以色列人民却表示in是宁可付出chit种代价，mā无愿意继续由先知撒母耳ê kiáⁿ当士师来带领in。

第10到17节，chit段经文回应第9节所记载，上帝ài先知撒母耳hō͘以色列人民知影，设立君王可能会带hō͘ in ê结果，尤其是chia所讲ê君王，已经teh暗示in可能面对ê是「暴君」，是残酷koh贪婪ê统治者，并m̄是善良ê君王。

先知撒母耳提醒以色列人民，若chiâⁿ实tio̍h设立君王来带领in，in一定tio̍h为tio̍h án-ne事付出非常大ê代价。Chit种代价就是国防税赋ê加重，相对ê会hō͘ in生活ê收入减少；人民一定tio̍h因为án-ne而被徵兵服役；官员会利用各种名目徵收siōng好ê良田、土地、有生产力ê cheng-seⁿ等，koh khah严重到人民成做君王ê「奴仆」（tú好kah民主制度颠倒）。甚至讲出女性被徵召入宫ê情形，如所罗门王ê宫殿中有上千ê妃嫔，而伊ê kiáⁿ罗波安mā有「十八个bó͘，六十个妃嫔」（参考历代志下十一：21），chiah-ê lóng会成做另外一种形式ê「奴隶」仝款。

其实chit段经文mā teh说明以后以色列君王会享受特殊ê权利，第17节非常清楚提起，有君王制度，人民会变成君王ê奴隶。因为君王kah宫殿ê开销，会hō͘人民无法度拥有家己ê财富。以色列人民原本想beh拥有koh khah chē ê财富，结果是付出koh khah chē。

第18节，chit节指出koh khah严重ê结果，就是以色列人民设立君王制度了后，一定会后悔，m̄-koh hit时上帝bē koh再垂听in呼求改变ê声音。

第19到22节，「人民m̄听撒母耳ê话」，chit句话已经清楚讲出以色列人民ê心已经弃sak了上帝。In坚持beh先知撒母耳为in设立一个王来统治in。这mā讲出先知撒母耳过去所努力ê，带领以色列人民「lóng向上主求助」、只有「事奉上主」ê信仰告白（参考撒母耳记上七：4），渐渐因为以色列人民ê生活稳定而消失（参考撒母耳记上七：13—14）。In想beh学习迦南地ê人有君王统治，in感觉án-ne比先知上帝ê奴仆带领koh khah好。其实，这mā teh表示：tī平顺安定ê生活中，会带来另外一个现象：经济发展。Chit时，而chit时chūn mā是人siōng容易bē记得上帝tī人苦难中所hō͘ in ê恩典。

第21到22节，既然以色列人坚持beh án-ne，上帝就「chhut-chāi」in所beh ê。他ài先知撒母耳照in所求ê答应in。M̄-koh圣经告作者bat讲，祈求上帝赏赐chìn前，需要深切三思，免得将来懊悔（参考箴言二十：25）。

摩西bat kā家己出tī埃及王宫ê亲身经历，用诚恳ê态度提醒以色列人，ài in teh进入迦南地了后，若是选择君王ê时，就一定tio̍h非常小心，而且需要严格规范君王ê生活规矩。可惜，后来以色列人并无想起摩西hō͘ in ê警语（参考申命记十七：14—20），in iáu是坚持beh设立君王，boài上帝ê先知来带领in。