撒母耳记上 27章1节 到 28章2节   背景资料  上一笔  下一笔
Tùi第廿七章开始,直到最后第三十一章结束,chit段经文ê重点khǹg tī大卫tú-tio̍h ê困境,一是伊一直感觉tī犹大地区真无安全,扫罗真可能随时会来杀害伊。Tī长到五章ê篇幅中,主要mā teh说明一件重要ê历史:扫罗已经行到穷途末路。伊弃sak了上帝,去走chhōe巫师chhōe tńg来已经往生ê先知撒母耳ê亡魂,想beh了解家己ê困境,并且设法beh脱离chit种困境,m̄-koh iáu是无法度逃避上帝对伊ê惩罚。就tī kah非利士人ê战争中,m̄-nā家己丧失性命,连伊三个kiáⁿ mā lóng战死沙场。

Chit章提起大卫逃到非利士人迦特城亚吉王处走chhōe庇护,kah第廿一章10到15节ê记载内容并无相仝;tī第廿一章ê记事,认为大卫逃到chit所在ê时,原本并无想beh hō͘人认出来,m̄-koh结果iáu是hō͘发见,并且被带到亚吉王hia,大卫为tio̍h惊被杀害,故意在亚吉王面前装疯卖戆,结果被亚吉王当做是一个疯子,责备伊ê臣仆带个疯子来骚扰伊,ài in kā chit疯子赶走。M̄-koh tī chit所在,则讲亚吉王m̄-nā接纳大卫,而且对伊非常信任,并kā一个城市—洗革拉,交hō͘大卫管理统治。

因为大卫对扫罗已经失写phoe去任。因为án-ne,虽然扫罗ài大卫tńg来到伊身边(参考廿六:21),大卫并无跟tòe tńg去,却是继续留tī哈基拉山隐藏tio̍h。大卫已经遭遇两pái西弗人去向扫罗通报伊所隐藏ê所在(参考廿三:19—20)。因为án-ne,伊总感觉有真大ê无安全感,m̄-nā对西弗人án-ne,mā m̄信任扫罗所讲ê「我m̄-tio̍h去」chit种话(参考廿六:21)。因为án-ne,伊决定去投靠非利士人。

第1到4节,大卫一直bih起来tī西弗ê哈基拉山顶ê荒野中。M̄-koh西弗人一直对扫罗忠心,chit点一直hō͘大卫感觉非常不安。因为án-ne,伊认为iáu是到非利士人ê所在比较安全。因为非利士人一直是以色列人ê仇敌,扫罗若想beh缉拿伊,就一定tio̍h派出正式部队去攻打非利士人chiah有办法掠tio̍h大卫。就án-ne,大卫「带伊ê部下六百人」,去投靠迦特城ê非利士人。Hit-ê城ê亚吉王接纳大卫,hō͘大卫kah伊部下,以及所有ê家眷lóng tī迦特城tòa落来。Á扫罗一听tio̍h大卫逃到非利士人ê迦特城去bih起来,就「无koh搜chhōe伊」,因为扫罗知影beh对付迦特人是真pháiⁿ纺ê事。Koh讲,扫罗会放弃继续chhōe索大卫ê计划,mā可能是认为大卫既然已经离开以色列人ê土地,对伊ê王位就无威胁了,伊ê kiáⁿ约拿单便thang顺利继任王位。

第5到7节,大卫确实得tio̍h迦特城亚吉王ê信任,而且lóng受礼遇,因为án-ne,伊向亚吉王提出一个建议,就是请求亚吉王赐hō͘伊一个小城。Chit点mā tú好说明大卫聪明ê所在,因为伊带去ê人数庞大,可能小khóa无小心,伊ê部属便会kah非利士人发生冲突,若是án-ne,真容易hō͘伊陷入困境,甚至造成koh khah大伤害,纵然伊无死tī扫罗手中,却可能hō͘伊丧生tī非利士人之手。若是ē-tàng hō͘伊一个小城管理,这对伊来讲,tú好thang保障安全。一则伊ê人数ē-tàng压过小城人口,即使无法度,mā ē-tàng自保。二则由伊来管理,等于hō͘伊当hit-ê城ê郡主仝款。亚吉王听tio̍h大卫ê建议了后,mā认为he是一个好意见,就决定kā洗革拉城hō͘大卫负责管理。这「洗革拉」ê详细地址已经无清楚。该处原属tī西缅支派所有(参考约书亚记十九:5)。后来koh归属tī犹大支族管辖ê区域(参考约书亚记十五:31)。M̄-koh可能犹大支族ê人,一直无进入此区域去管理,而被非利士人占领,若无,亚吉王无可能有权柄kā此小城分配给大卫管理。就án-ne,大卫tòa tī洗革拉城「十六个月」,意思是teh指大卫tī洗革拉城khiā起ê时间,直到扫罗往生后,大卫chiah迁徙到希伯仑去(参考撒母耳记下一:1、二:2—3)。

第8到9节,亚吉王会kā洗革拉城hō͘大卫去管理,mā是kah hit-ê城附近ê族群,包括「基述人、基色人,kah亚玛力人」等,不时来洗劫洗革拉城有关。因为án-ne,大卫得tio̍h此城ê管理权了后,随时整顿军备,并且对附近chiah-ê族群进行扫荡维安ê工作。大卫m̄-nā是攻击chiah-ê城镇,而且掠夺了in所有ê一切。就án-ne,大卫势力jú来jú强。Á tī第12节解释了大卫会án-ne做ê原因,就是beh得tio̍h亚吉王对伊ê信任,m̄-koh伊并无hō͘亚吉王知影,伊所攻击ê对象是toh一kóa族群、城镇。

第10到12节,每pái大卫kā所得tio̍h ê战利品带tńg来送去hō͘亚吉王ê时,亚吉王lóng会询问伊去tó位出征,á是「掠夺」,而大卫所回答ê,lóng以「犹大南部」,若无,就是讲「耶拉篾部落境内」。大卫本身就是属tī犹大支族ê人,因为án-ne,当伊笼统ê讲「犹大南部」kah「耶拉篾部落境内」ê时,听tī亚吉王ê耳中,是非常常tio̍h意ê,因为he表示大卫tńg去攻击家己ê同胞。其实,若是根据撒母耳记上第三十章29节ê记载,大卫m̄-nā无攻击chiah-ê族群ê人,却是kā攻击其他族群所得tio̍h ê战利品赠送hō͘ chiah-ê族群ê人。Án-ne,thang看出,大卫会án-ne以攻击「犹大南部」kah「耶拉篾部落境内」,á是基尼人等án-ne来回答,是因为chiah-ê族群乃是亚吉王ê仇敌,伊beh hō͘亚吉王感觉大卫thang信任,替伊phah败仇敌减少后患。讲穿了,伊提供洗革拉城hō͘大卫,mā是beh利用大卫ê实力而已。Tùi chia ē-tàng看出大卫会án-nekā所侵犯过,掠夺过ê顶面所讲几个城镇,lóng赶尽刣绝,就是为tio̍h beh防止有人去向亚吉王通风报信,hō͘亚吉王知影大卫所做ê lóng是背叛伊ê行动。因为亚玛力、基述、基色等城镇,以及一kóa小部落等,lóng是亚吉王ê盟友。

值得注意ê一点,是tī大卫ê部下中,竟然无任何一个人kā chit种消息吐露出去,这表示大卫深获部下ê疼戴kah信任。若无,就是大卫用强力高压ê手段带领伊ê部下。Á亚吉王mā因为大卫chit种作法,认为大卫kā永远成做伊ê部下之一,而且忠实ê臣仆为伊所用。Tùi第廿九章9节亚吉王teh o-ló大卫ê时所讲ê话,伊认为大卫明明是就是「亲像上帝ê天使仝款忠心」chit句话,咱就thang看出伊对大卫非常信任。

第廿八章1到2节,chit两节讲出大卫面对一个重要ê选择,he就是非利士人准备ài攻打以色列人民,亚吉王需要大卫ê支持。大卫是归顺非利士人ê以色列军人,taⁿ亚吉王ài大卫kah伊并肩作战,chit-má就是一个重要时刻。当大卫听tio̍h亚吉王chit项要求ê时,伊真清楚表示一切lóng是听从亚吉王ê指挥。Chit句「你知影我ē-tàng做甚么」,其实mā是说明大卫心内既无奈,mā无法度抵抗。Chit句话就是teh kā亚吉王讲,只要伊下命令ài伊做甚么,大卫就做甚么。亚吉王听大卫ê回答了后,真欣赏伊ê态度,表示ài大卫永远(久长)留tī伊ê身边,当伊ê「侍卫」。大卫mā确实做到hō͘亚吉王信任ê程度,hō͘亚吉王lóng chhōe bē-tio̍h大卫对伊无忠实ê把柄(参考廿九:6)。

Chit章插入chit段有关扫罗chhōe巫师,kā已死ê先知撒母耳tùi阴间里chhōe出来,问tio̍h有关伊可能tú-tio̍h ê事,确实引起真chē争论。争论ê焦点是:基督教信仰接受chit种牵引亡魂ê事mah?á是讨论先知撒母耳死后,一直lóng tī阴间里mah?久长以来讨论真chē,m̄-koh都无明确答案。基本上thang先án-ne了解:扫罗发见家己确实已经行到穷途末路,m̄知该怎样办chiah好。因为迦南人流行chit种信仰,因为án-ne,摩西律法中非常明确订定禁止令(参考利未记十九:31,申命记十八:10—11),甚至讲「召鬼问卜ê男女lóng一定tio̍h处死」,而且thang用「石头phah死」(参考利未记二十:27),可见chit条禁止令是非常严格ê。M̄-koh tī以色列历代君王mā有人招魂问卜,其中,用犹大王玛拿西siōng-kài严重,伊m̄-nā带领人民拜巴力神明,建造巴力神庙,koh khah严重ê是「Kā家己ê kiáⁿ烧献了,koh行占卜、巫术,求问算命ê、通灵ê」(参考列王记下廿一:3—6)。列王记ê作者甚至讲犹大国会灭亡,就是因为玛拿西chit种行为,大大引起上帝ê愤怒而且无法度原谅ê缘故(参考列王记下廿四:1—4)。taⁿ,扫罗会án-ne做,mā teh说明,伊ê心中已经会失去上帝ê灵ê同在,tī伊ê性命中,早已经离开了上帝。撒母耳记ê作者其实想beh表达一个信息:扫罗kah伊ê三个kiáⁿ后来lóng战死沙场,kah这事件有关。


重新查询 专卷研经 撒母耳记上系列
错误回报,请联系comm[@]fhl.net