撒母耳记上 22章1节 到 22章10节   背景资料  上一笔  下一笔
撒母耳记作者teh描述第廿二章有关扫罗去挪伯处分祭司亚希米勒chìn前,先插入几段大卫逃往迦特王亚吉(参考廿一:10—15)、亚杜兰城(参考廿二:1—2),以及摩押ê米斯巴(参考廿二:3—4),了后,大卫接受先知迦得ê预警,伊逃往哈列ê树林(参考廿二:5)。会编入chit三段记事,并m̄是时间上前后ê问题,却是想说明tī chiah-ê过程中,大卫渐渐累积伊ê人脉kah势力。

Tùi kui个逃亡ê过程中,thang看tio̍h大卫到亚杜兰城走chhōe庇护,是一个重要ê转捩点。因为tùi chia开始,大卫无koh是孤独一个人,却是有一阵人跟tòe伊,而chit群人中间,除了厝内人以外,iáu包括了祭司在内(参考廿二:20),chit点对伊来讲非常重要。为tio̍h án-ne后,伊身边lóng有thang协助伊ê气力,m̄-nā退thang守,进mā thang攻。Koh khah重要ê,伊thang随时透过祭司询问上帝ê旨意(参考廿三:6)。相对ê,扫罗却残刣死上帝ê祭司,换句话讲,作者已经teh表示扫罗m̄-nā会失去上帝ê灵保守,伊koh khah弃绝了上帝ê旨意。这tú好说明大卫虽然是teh过逃亡ê生活,m̄-koh有上帝ê话语一直伴tòe tī伊身边,而扫罗则因为无上帝ê话,而不时感觉「失落」,伊一直无法度如心所愿ê追缉到大卫就是一个siōng明显ê例。

扫罗杀害上帝ê祭司亚希米勒kah伊ê家族,chit件杀害上帝ê奴仆祭司ê事件,hō͘上帝非常受气。圣经作者表达一个观念:任何统治ê气力,若是欠缺宗教信仰ê支撑(辅导、协助),真紧to̍h会衰微。扫罗残害祭司,以及亚比亚他投靠大卫,tú好说明一个政权ê衰微,另外一个政权ê兴起ê原因。

Chit段经文thang分做两个段落,一是讲述大卫得tio̍h摩押王ê帮助,替伊照顾父母,并且得tio̍h先知迦得hō͘ in ê信息。二是描述扫罗埋怨伊ê臣仆不支持伊,就tī he ê时多益提供扫罗情报讲大卫bat逃难到挪伯祭司亚希米勒hia去。

第1到2节,短短两节记载大卫离开迦特城,到亚杜兰去避难,m̄-koh却mā说明大卫tùi án-ne了后,有新ê转机,伊无koh是单独一个人,却是有群众kah跟tòe伊,chiah-ê跟随者中间,有真chē是不满扫罗政权ê民众。Án-ne,大卫一下á身边就增加四百个跟随者,而伊mā成了chiah-ê投靠者ê首领。

第3到4节,大卫koh逃到摩押人ê地区,这说明tī扫罗统治ê以色列地区,已经真oh hō͘大卫有藏身ê所在。伊tī chia请求摩押王允准伊ê父母khiā落来,hō͘伊lóng无后顾之忧。Á摩押王愿意庇护大卫ê厝内人,可能kah扫罗bat攻打摩押有关系(参考十四:47)。

第5节,先知迦得会án-ne来帮忙大卫,必定是kah上帝hō͘伊ê启示有关。因为大卫是上帝所拣选准备ài替接扫罗成做以色列人ê新王。前有先知撒母耳膏立大卫并且协助伊ê逃亡,chit-má koh有先知迦得加入大卫ê阵营,这说明tī大卫身边,有上帝ê奴仆先知,以及后来koh有祭司亚希米勒参与帮忙大卫,kah祭司亚比亚他加入大卫阵营中等等,这致使大卫实力koh khah强大。Chit位先知迦得,mā是后来参与编撰大卫一生事迹ê作者之一(参考历代志上廿九:29—30)。Á先知迦得会建议大卫tńg来到犹大去,mā teh表示大卫ê势力已经够额hō͘伊安全tńg去。M̄-koh是m̄是就是chit-má?Chit节经文可能是比较晚期ê资料。为tio̍h án-ne ê时ê大卫iáu未够额ê能力。M̄-koh有另外一种讲法是:大卫此后lóng tī南部犹大地区活动。扫罗lóng tī犹大北面、便雅悯支派ê基比亚地区。因为án-ne,mā有一种讲法,讲大卫kah扫罗之争,就是南kah北两方势力ê对抗,也kah此逃亡ê事有关。

第6到8节,chia讲扫罗可能tùi其他人ê报告中,知影有便雅悯支派ê人去投靠大卫(参考历代志上十二:16—18),因为án-ne chiah会讲第7节chiah-ê话,认为大卫就是用「田地kah葡萄园」来o͘-se便雅悯支族ê勇士。扫罗ài大家清楚知影chit时ê大卫根本就无chit种能力,而会传出chit种谣言ê人,是故意ê,主要目的是想beh对抗、谋害扫罗而已。伊mā埋怨家己ê kiáⁿ约拿单竟然kah大卫结盟,而伊ê臣仆却无人向伊报告。M̄-koh伊讲「大卫正teh chhōe机会刣我」,chit种话tú好kah事实颠倒。

第9到10节,chia讲扫罗ê畜牧长以东人多益,tī发见大卫藏身tī挪伯ê亚希米勒处ê时,已经有想向扫罗报告à。Tī扫罗ê认知中,chit种帮助大卫,而且借刀hō͘大卫,lóng是teh协助大卫谋害伊(参考第13节)。多益是以东人,伊可能是hō͘掳来当看管扫罗家畜ê奴工。Taⁿ ē-tàng kah其他臣仆khiā tī扫罗身边,真可能就是因为伊向扫罗报告有关祭司亚希米勒资助大卫逃亡ê事而升官。多益举发亚希米勒替大卫求问上帝旨意,并且提供食物kah歌利亚ê刀hō͘大卫。值得注意ê是:多益指控祭司亚希米勒ê罪状中有两项,一是为大卫「求问上主」,m̄-koh这是属tī祭司ê职责,伊无法度拒绝。二是hō͘ in大卫「食物」kah「歌利亚ê刀」,chit项指控致使亚希米勒全家族kah hit-ê城ê人惨遭扫罗屠刣。


重新查询 专卷研经 撒母耳记上系列
错误回报,请联系comm[@]fhl.net