Chit段经文为甚么会编排插入tī-chia？确实有点á bē了解。因为若是kā第廿二章续落去tī第9节后面，应该是真容易明白，因为第廿二章讲述tio̍h祭司亚希米勒因为协助大卫，结果全家族惨遭扫罗杀害。M̄-koh为甚么会kā chit段大卫逃到非利士人迦特城ê记事，编排tī-chia？á是，为甚么大卫会想beh逃到chit-ê城来bih起来？确实真oh理解。

Koh讲，第廿七章1到7节mā有记载大卫逃到非利士人迦特城亚吉王hia去走chhōe庇护，m̄-nā án-ne，亚吉王iáu赏赐hō͘伊一个洗革拉城。因为án-ne，若是beh kā大卫走chhōe庇护ê事件比较有系统ê编辑做伙，应该是kā第廿一章10到15节chit段经文kah第廿七章1到7节ê经文编辑做伙，án-ne会比较有系统些。Mā有可能chit段经文kah第廿七章ê记事，是仝款ê资料mā无一定。

第10到11节，「迦特」，这是非利士人ê城，大卫逃到chia，thang来确定扫罗m̄敢进入hit-ê城缉拿伊。M̄-koh伊一入城，就hō͘人发见而通报hō͘ hit-ê城ê王亚吉知影。

第12到13节，为tio̍h beh躲避亚吉王发见是伊而遇tio̍h报复，大卫就故意装疯、「乱写乱画」，而且故意「hō͘唾沫流到胡子上」等，chiah-ê动作hō͘伊避开了被掠ê危险。圣经时代留长胡子是一种荣誉kah尊贵ê象徵。这mā是摩西律法会要求「离俗人」（拿细耳人）一定tio̍h留长发kah胡子ê原因（参考民数记六：6—9）。chit-má大卫「hō͘唾沫流到胡子」，这已经teh说明大卫玷污了家己。Chit种人，是lah-sap、无清气ê人。甚么人接触tio̍h chit种人，mā会跟tòe倒楣。其实，古代人有一个观念，认为精神失常ê人，是受tio̍h神ê诅咒、折磨。因为án-ne， tio̍h远离chit种人，会比较khah安全，免得连带受罚。

第14到15节，亚吉发见大卫ê款，马上就认定大卫是发起siáu。kā chit种人带到国王面前是跟tòe tī侮辱国王仝款ê严重。因为án-ne，伊真无欢喜伊ê臣仆带大卫去伊面前。亚吉王ê chiah-ê话，显示伊并m̄知大卫是tī家己ê城内被发见ê。Á tùi亚吉王ê话中thang推测当时迦特城内可能有bē少疯子。