撒母耳记上 19章1节 到 19章10节   背景资料  上一笔  下一笔
Chit章开始绍介扫罗ê kiáⁿ kah大卫之间深厚而且真诚恳ê情感,in为tio̍h beh保护大卫,故意冒tio̍h性命ê危险,想出所有ê办法beh保护大卫,hō͘伊免tī受家己ê老父扫罗杀害ê危险。

Chit章kah第二十章ê资料来源显然无仝;chit章一开始就讲扫罗kā想beh杀害大卫ê事kā约拿单kah其他臣仆讲,m̄-koh第二十章2节却讲约拿单并m̄知扫罗有想beh杀害大卫ê计划。第十九章讲约拿单为大卫向伊ê老父扫罗参详拜托,得tio̍h圆满ê结果。M̄-koh第二十章却讲约拿单m̄-nā无说服in老父扫罗成功,甚至家己mā差一点á被老父扫罗所刣。M̄-koh mā有另外一种看法,认为这是两个无仝ê事件,发生ê时间可能并无相仝。M̄-koh lóng强调一点:扫罗确实是真积极想beh除掉大卫。原因就是第二十章31节扫罗所讲ê,只要大卫活teh一工,约拿单就别想beh做国家ê王。M̄-koh扫罗bē记得,伊ê王位并m̄是传承ê,却是上帝拣选ê。

Chit段经文主要teh强调约拿单kah大卫之间ê「约」,有ná「性命ê约」仝款,因为in两人立誓结为「性命之交」(参考十八:3)。Á扫罗koh一pái想出所有ê办法beh杀害大卫。显然地,前段所描述约拿单化解扫罗kah大卫之间ê紧张,只不过是Kā chit种危机延后而已。Tī扫罗ê心目中,大卫iáu-koh是伊siōng痛恨ê「仇敌」,非kā伊除掉bē-tàng。

第1到3节,这是第一pái记载扫罗公开表示「beh设法除掉大卫」,chit种写法已经真清楚说明过去大卫tī扫罗宫廷中受欢迎ê tāi-chì(参考十八:16),已经有真大ê变化。可能是kah第十八章30节所讲ê大卫ê名声已经赢过其他重要将军,这mā可能威胁tio̍h其他众将军tī国王扫罗面前ê地位。M̄-koh约拿单kah大卫之间带有「生死之交」ê chiok厚友谊,伊深teh疼大卫。因为án-ne真明白kā大卫讲伊ê老父扫罗想beh刣伊。然后伊对大卫提出一个保全ê意见,就是chhōe一个thang hō͘大卫藏匿ê「秘密」之地。Á hit所在只有拿单知影而已。然后,约拿单表示beh去kah家己ê老父恳谈chit件事。

第4到5节,chit两节记载约拿单确实照对大卫ê应允去做;伊tī扫罗面前o-ló大卫美好ê事迹,包括了:(1)大卫所做ê事,对扫罗只有帮助,无伤害。(2)大卫确实是击退非利士人ê主要功臣,因为伊刣死了以色列人siōng惊惶ê巨人歌利亚。(3)大卫是无辜ê。杀害无辜ê人,绝m̄是上帝所欢喜kah赐福ê事。约拿单chit种讲法是teh提醒家己ê老父扫罗杀害大卫,会为家己带来上帝koh khah大ê惩罚。

第6到7节,扫罗虽然是chiù-chōa不刣大卫,m̄-koh续落来就发生伊the̍h手上ê矛beh凿死大卫,这表示伊chiù-chōa ê话并无会算数。

第8节,简单ê一节经文,表示大卫继续兴旺起来。相对ê,就是扫罗渐渐teh没落中。大卫ē-sái讲是非利士人ê克星,只要有大卫出征,就ē-tàng phah败非利士人。Á以色列军队siōng惊ê就是非利士人,因为án-ne,强化大卫tī以色列军队中ê声望。Á以色列人民一定会亲像妇女所歌颂ê,街头巷尾四界lóng会teh唱「扫罗刣死千千;大卫刣死万万」ê诗歌。这就koh khah hō͘扫罗感觉m̄是滋味,jú想beh杀害大卫。

第9到10节,chit两节随时反应出第8节所提起ê,大家jú o-ló大卫,扫罗就jú想beh杀害伊。Chit pái是tī lóng无预警之下,扫罗忽然向大卫抛tàn伊手上ê矛,佳哉大卫躲开了,chiah幸免tī难。

重新查询 专卷研经 撒母耳记上系列
错误回报,请联系comm[@]fhl.net