Chit段经文是来自无仝ê资料，tùi连续两pái提起扫罗根本就m̄-bat大卫ê记事thang看会出来，因为tī第十六章18到23节已经清楚说明，大卫是扫罗ê 随身侍卫à。Chit段经文同时mā说明扫罗留落来大卫tī家己ê身边，伊ê kiáⁿ约拿单因为án-ne成做大卫ê知己朋友。

第55到58节，扫罗问以色列ê元帅押尼珥，想beh知影大卫ê身分，这是扫罗连续两pái查询大卫ê身分背景。这kah伊答应beh kā phah赢歌利亚ê人当做kiáⁿ婿（参考十七：25）有关。因为án-ne beh认bat到底chit位「准kiáⁿ婿」是甚么人。

第十八章1到5节，chit段经文lóng teh描述扫罗ê kiáⁿ约拿单成做大卫ê知心朋友，两人建立了「生死之交」ê关系。这「生死之交」ê意思，是teh指「结盟」。Tī希腊文ê译本用「立盐约」。根据利未记第二章13节ê记载，盐代表kah上帝立约。因为tī古代，盐是做保存食物kah消毒、洁净ê用途。因为án-ne，用「生死之交」，意思是teh指扫罗ê kiáⁿ约拿单kah大卫之间ê关系，是非常纯洁ê，bē败坏ê。约拿单用家己ê衫裤kah身上ê配备，当做kah大卫立约ê凭据。Chit种方式mā teh说明大卫tī约拿单ê心目中，甚至是ē-tàng取代伊继承老父扫罗ê王位。Tùi chit pái战役了后，大卫tī以色列人中间m̄-nā拥有权柄，而且深获人民kah官员ê疼戴。