撒母耳记上 10章17节 到 10章27节   背景资料  上一笔  下一笔
Chit段经文描述先知撒母耳用抽签ê方式,为以色列人选出第一位君王,结果就ná亲像上帝所预定beh拣选ê人,chit种人就是扫罗。Tī这chìn前,只有先知撒母耳kah扫罗in二人知影,m̄-koh in都无对外讲出先知撒母耳已经用油膏立扫罗ê事。民众mā kan-taⁿ只知影由先知撒母耳为in chhōe一位君王,in mā一直teh期待chit件事早日有消息。因为án-ne,chit段经文mā ē-sái讲是续接第八章,说明撒母耳照以色列人ê要求,chhōe一位君王来统治带领in。

第17到19节,先知撒母耳传达上帝beh hō͘以色列人民ê信息,主要teh说明下列几件事:

一是:他是用大能ê手,带领以色列人出埃及ê神。Chit句话ē-sái讲是圣经中非常重要ê提醒话语,tio̍h以色列人注意,in ē-tàng存活到chit-má,lóng是因为上帝用大能ê手带领in出埃及ê结果。Chit句话mā是用来警告以色列人,若是bē记得上帝拯救ê恩典,in无论chit-má拥有甚么,lóng会化做乌有。

二是:「伊是lín ê上帝」,这是一句立约ê用语。完整ê句型是:「我beh做in(指以色列人)ê上帝,in beh做我ê子民。」(参考耶利米书十一:4、廿四:7、三十:21、三十一:33、三十二:38,以西结书十一:20、十四:11、三十七:23、27,撒迦利亚书八:8)。

三是:以色列人「厌弃」上帝。会有chit种讲法,是认为君王制度会破坏in kah上帝之间立约ê关系。

四是:tio̍h以色列人民选出家己ê君王。先知撒母耳采取ê方式是「按支族kah宗族ê秩序集合」。Chia ê「支族」,是teh指「大支派」,ná亲像吕便、西缅、犹大等秩序排列。Á「宗族」mā thang讲「一千人」ê意思。

第20到22节,chit段经文描写kui个拣选ê经过,就是用「抽签」ê方式进行。Chia ê「拣选」,原文就是「抽签」。先知撒母耳会用chit种「抽签」方式,真有可能是伊并无支持chit种君王制度,因为án-ne,以此方式来表示责任并无tī伊。先是抽中便雅悯支族,续落来tùi便雅悯支族中抽签选出「玛特利家族」ê人。Koh再tùi chit-ê家族选出「基士」ê kiáⁿ扫罗。比较奇怪ê是,就tī chit时,扫罗竟然bih起来。这可能kah第九章21节所讲ê话有关,伊自认不配当以色列民族ê领导者。Ná亲像chit章27节所讲ê,有kóa人非常怀疑扫罗是m̄是有能力「救」in,in甚至有点á看bē起扫罗。

第23到24节,虽然扫罗bih起来,m̄-koh上帝既然拣选伊,就指示大家伊bih起来ê所在。先知撒母耳就tī众人面前宣布扫罗就是以色列人民所祈求beh设立ê君王。「吾王万岁」,chit句话并无表示in lóng是诚心实意地支持,却是因为这是in抽签选出来ê王,就一定tio̍h接受。

第25节,thang参考第八章11到18节,先知撒母耳bat警告过以色列人ê事,tī chia koh一pái说明一pái。另外根据申命记第十七章18节摩西律法ê规定,beh抄写一份摩西ê律法规章hō͘新任ê国王扫罗,thang hō͘伊知影遵行上帝透过摩西所颁布hō͘以色列人ê典章律例。「存khǹg tī上帝面前」,这表示chit份抄写落来ê摩西律法,以及警告国王ê话语,lóng以上帝做见证人。用chit种方式来表示chiah-ê记录抄本ê内容,就是以色列国王治国ê基准。

第26到27节,有一阵支持扫罗ê人,跟tòe扫罗去,chiah-ê人可能有意思beh保护扫罗ê安全。M̄-koh mā有看bē起扫罗ê人,真可能是kah扫罗是出身便雅悯支派有关系,因为chit-ê支派tī以色列十二支派中,是siōng弱小ê一族。因为án-ne,即使in看bē起扫loh,mā只有ē-tàng接受。M̄-koh「扫罗却无讲甚么」,因为伊真清楚家己ê处境。

重新查询 专卷研经 撒母耳记上系列
错误回报,请联系comm[@]fhl.net