撒母耳记上 10章1节 到 10章16节   背景资料  上一笔  下一笔
Chit章说明先知撒母耳膏立扫罗为王ê经过。Thang分做两个部分,其一是继续延伸第九章ê记载,先知撒母耳kā上帝ài扫罗做王ê事kā伊讲了后,并且实现了chìn前先知撒母耳应允扫罗ê事,就是hō͘伊知影老父phah-m̄见ê驴á tī tó位。第二部分是kah第八章ê资料仝款,lóng是对设立君王制度表示反对ê意见。M̄-koh先知撒母耳照上帝ê指示,选出扫罗做国王。而且chit种「推选」是tī全民chìn前一步公开选ê,并m̄是随时由上帝直接拣选。

Chit段经文主要teh说明先知撒母耳先「私下膏立」扫罗当以色列人ê王。然后为tio̍h beh hō͘扫罗确信伊所领受ê权柄是真实ê,先知撒母耳hō͘伊三个记号:一是会tú-tio̍h两个人kā伊讲beh chhōe ê驴á已经chhōe着à。二是会tú-tio̍h三个人,chit三个人lóng带无仝ê礼物beh去献祭。三是扫罗会因为圣神感动,而跟tòe其他被圣神充满ê先知同齐「忘形讲话」。Á众亲友lóng惊kah gāng去伊ê改变,m̄-koh无人知影伊已经被先知撒母耳膏立为王,而扫罗mā无讲出伊被膏立为王ê经过。

第1节,chia讲先知撒母耳用橄榄油倒tī扫罗头壳顶,表示确定扫罗是hō͘膏立ê以色列王,并且kah伊chim嘴表示尊敬ê意思。先知撒母耳hō͘扫罗知影伊当以色列人民ê王,就是beh带领以色列人民抵挡来侵犯ê敌人。

第2到5节,这是先知撒母耳beh hō͘扫罗相信,上帝真正已经拣选伊来带领以色列民族,因为án-ne,beh hō͘伊三个兆头,第一是「驴á已经chhōe-tio̍h了」,扫罗原本就是奉老父基士之命,带奴仆去chhōe行失ê驴á,chit-má先知撒母耳hō͘ in知影驴á已经chhōe tio̍h。第二个记号是tī「伊泊ê圣树」会tú-tio̍h三个准备去伯特利献祭ê人。In真有可能是beh去朝圣ê旅客。因为in lóng有带beh献祭ê礼物,包括有「三只小山羊」、「三个面包」、「一皮袋酒」等。先知撒母耳kā扫罗讲,当in中间有人the̍h两个面包hō͘伊ê时,伊一定tio̍h收下。第三个记号是tī扫罗ê故乡基比亚会tú-tio̍h一阵先知,扫罗会同时kah chiah-ê先知充满tio̍h圣神ê感动。

第6到8节,先知撒母耳提出chit-ê预警hō͘扫罗,讲伊会kah chiah-ê tùi献祭ê山丘上落来ê先知仝款,忘形跳舞、弹琴等。先知撒母耳真尽职ê提醒扫罗,一定tio̍h会记得「照上帝引chhōa」ê去做,chit点mā是圣经ê中心信息。先知撒母耳约好扫罗,ài扫罗tī「七工」了后,到吉甲kah伊去相会。Hit时候,伊会koh一pái kā扫罗讲真chē以后该做ê事。

第9节,chit节mā是第十三章ê一个伏笔,扫罗并m̄是chit-má就成做以色列人ê君王,却是需要听从先知撒母耳ê指示做tāi-chì,而这mā是teh暗示:先知是君王ê指导者,为tio̍h beh hō͘君王听从上帝ê话语。

「上帝赐hō͘扫罗一粒新ê心」,chit句话真重要,teh说明扫罗已经hō͘ 上帝膏立为王,伊是上帝亲自拣选ê王,上帝亲自改造伊,hō͘伊成做一个「新人」。Chit种「新ê心」,thang tùi伊加入先知「忘我」ê举止看出来。伊甚至ē-tàng领受tùi上帝来ê启示,mā因为án-ne有人传说扫罗mā是「先知」中ê一位(参考第11节)。

第10到13节,先知撒母耳tī第4到6节所讲ê预言tī chia实现了,mā因为án-ne,hō͘当时ê人掠做是扫罗mā是一个先知。因为有上帝ê灵tī扫罗身上,因为án-ne,扫罗mā有「受感忘形讲话」ê经历。

第14到16节,扫罗tńg到厝里,in-tau里ê亲人一定听tio̍h众乡亲lóng tī讨论着扫罗「kám是先知?」这问题,因为这mā牵涉tio̍h in家族ê事,因为án-ne,chiah-ê父执辈ê人lóng真关心并询问扫罗到底发生甚么事。M̄-koh扫罗只有讲伊去见先知撒母耳,并无讲伊受膏立为王ê事。

重新查询 专卷研经 撒母耳记上系列
错误回报,请联系comm[@]fhl.net