彼得前书 2章1节 到 2章25节   背景资料  上一笔  下一笔
Kui本圣经hō͘咱一个真清楚ê观念,信仰是kah生活相连结ê,任何宗教信仰lóng是án-ne,无kah生活相连结做伙ê宗教信仰,hit种宗教是不实在ê,á是虚无ê,对人ê性命并无甚么意义thang讲。

Koh讲,宗教信仰应该有真大ê气力thang导正人往善ê方向前进。人本来就应该有行善ê能力,ē-sái讲是人非常软弱,受tio̍h罪ê控制,hō͘人会失去自我,跟tòe罪ê诱惑脚步行。使徒保罗就有chit种亲身体验,伊讲:

「我知我ê本性内面无良善,我有做好ê 意愿,m̄ -koh,无做好ê 气力。我无去做我所意爱ê 好,颠倒tńg 去做我无意爱ê pháiⁿ。 我若做我无意爱ê pháiⁿ,m̄ 是我本身teh 做,是tiàm-tī 我内面ê 罪teh做。(全民版)」(罗马书七:18—20)

伊tī chia真清楚讲tio̍h人有行善ê意愿,ē-sái讲是却常常做出kah家己意愿相违背ê事。这thang tùi真chē犯罪了后,懊悔ê人身上看会出来。因为án-ne,宗教信仰就tī chit方面ē-tàng发挥真大ê作用,hō͘人藉tio̍h宗教信仰来抵抗深藏tī人心内面ê诱惑力量,hō͘人thang拒绝罪ê诱惑。这ná亲像使徒保罗信了耶稣基督了后所讲ê:

「感谢上帝,通过主耶稣基督来救我!Án-ne,我ê 内心是顺服上帝ê 律法,m̄ -koh,我ê 肉体是顺服罪ê 法则。(全民版)」(罗马书七:25)

确实是án-ne,tio̍h感谢上帝,藉tio̍h认bat耶稣基督,hō͘咱ê性命出现一股坚强ê气力,当人遇tio̍h试探ê时,thang透过耶稣基督ê名向上帝祈求,抵挡诱惑ê气力就会自然tek tùi心内深处产生。

彼得前书作者一再提醒信徒tio̍h过圣洁ê信仰生活,tio̍h信徒会记得耶稣基督ê死,对每一个人ê性命付出了非常高ê赎罪之价。chit-má作者则进一步beh kā所有ê信徒讲,本身是一个基督徒,就应该知影珍惜chit种用耶稣基督ê性命赎罪换来ê恩典。

第1到3节,信仰kah一个人性命ê成长是仝款ê,就是beh成长,而bē-tàng kan-taⁿ停留tī婴á期ê中间。Á tī成长ê过程中,必定会tú-tio̍h真chē痛苦,而chiah-ê痛苦mā是成长ê一种代价。

Chia作者用「排除」chit-ê字,tī希腊文ê意思是「thǹg掉衫裤」。作者用chit-ê字,有一个真重要ê背景,就是早期教会ê洗礼lóng是用浸礼,做一个人决志beh受洗ê时,就是beh thǹg掉原来ê衫裤,换上一件洁净ê白袍浸入水中。象徵tio̍h kā过去hiah-ê罪恶lóng弃sak,然后用洁净ê心灵接受主耶稣赎罪恩典ê洗礼。作者真明确指出tio̍h排除ê「pháiⁿ事、讲白贼,伪善,嫉妒,á是讲人pháiⁿ话」等等chiah-ê无好ê事。

作者对信徒ê期待,就是tī信仰上ài有「渴慕」成长ê意念。「渴慕」chit-ê字,这是有含强烈ê欲望ê意思,就是beh有一种出tī性命饥渴ê需要,是一种tī性命中强烈要求ê心境,ná亲像「新生ê婴á,时时渴慕hit-ê纯净ê灵奶」仝款。

Chia所用「灵奶」ê希腊文是「logikos」,kah「logos」chit-ê字是同字根,意思就是teh指上帝ê话语。作者讲一个真正ē-tàng帮助人ê信仰性命成长ê,就是真实上帝ê话语。

第4节,「tio̍h亲近主—活ê石头」,作者kā耶稣基督譬喻成做「活ê石头」,这iáu是新约圣经中第一pái用chit种方式做譬喻。会用石头来譬喻耶稣基督,kah引用诗篇第一一八篇22到23节ê诗歌讲:「师傅所弃sak ê 石头,已经成做厝角头ê 基石。这是上主ê 作为,咱ê 目睭kā 它看做奇怪!(全民版)」原本上帝ê子民hō͘人看轻、藐视,m̄-koh却tī上帝ê带领保护之下而得tio̍h全面ê胜利,因chit首诗人用chit种句话歌颂上帝。chit-má彼得前书作者引用chit-ê诗歌来说明耶稣基督tī世间传福音ê时,mā是án-ne被犹太当局藐视,甚至迫害,最后kā耶稣基督hō͘钉死tī十字架上,taⁿ耶稣基督因为上帝siōng伟大奇妙ê神迹,hō͘伊tùi死亡中koh活起来,成做人类性命ê ǹg望。

Koh讲,chia用「活石」mā thang代表上帝。以赛亚书第八章14节记载讲上帝是神圣thang惊畏,像一块石头,ē-sái真chē人绊倒。然后上帝koh讲「ài tī锡安建立坚强稳固ê基础,tī hia安放贵重ê基石(参考赛亚册廿八:16)。这thang明白所讲ê「活石」,就是teh指以上帝当做性命ê基础。Chit种性命就会ná亲像建造厝tī石磐顶一般,永远bē摇动。

	第5节,作者讲beh用chit种ná亲像kah上帝之间bē-tàng分离ê关系,用来「建造属灵ê圣殿」。Chia提起「属灵ê圣殿」,主要目的就是beh kā它kah用人ê手所建造起来ê耶路撒冷圣殿区隔出来,因为耶路撒冷圣殿就bat被耶稣基督责备是「贼窝」、「市场」,并m̄是真正用纯净ê心teh敬拜上帝ê所在。耶稣基督mā bat公开讲beh用伊ê死kah koh活来重建圣殿(参考约翰福音二:19)。Á使徒保罗mā bat讲信耶稣基督ê人lóng tio̍h kā家己身躯看做是上帝ê「殿」(参考哥林多前书三:16—17)。

	第6节,chit节ê诗歌是引用以赛亚书第廿八章16节,主要teh说明有上帝同在ê所在,就是神圣ê所在,mā是性命所仰望之地。彼得前书ê作者引用chit句话,就是beh所有ê信徒明白,耶稣基督就亲像上帝以前安置tī耶路撒冷圣殿ê基石仝款,hō͘进入圣殿敬拜ê民众看tio̍h上帝ê拯救,得tio̍h上帝ê祝福。

第7节,chit节引用诗篇第一一八篇22节ê诗歌,主要teh说明上帝奇妙ê作为,就是hō͘人所弃sak ê成做siōng珍贵ê宝贝。作者tī chia mā真清楚kā信ê kah m̄信ê人做个区分;信ê人当然知影耶稣基督救赎ê疼ê珍贵,相对ê,m̄信ê人会拒绝上帝tī耶稣基督内面ê疼,因为in bē感觉耶稣基督kah伊ê性命有甚么关系,mā bē想beh得tio̍h耶稣基督tī十字架上ê救恩。

第8节,这是引用自以赛亚书第八章14节ê经文。Chit节mā thang为「活石」做一个注解,因为是「活石」,所以thang成做óa靠ê安全基石,mā因为是「活石」,因为án-ne也ē-tàng成做审判之工具。Chia讲「绊倒」,mā thang做「排斥」、「拒绝」解释。早期教会时代真清楚一个观念:接纳耶稣基督ê人,就会得tio̍h永恒ê性命,相对ê,拒绝耶稣基督ê人,mā会hō͘上帝所拒绝,因为上帝已经kā耶稣基督差遣到世间来,就是beh hō͘人ē-tàng信靠伊而得tio̍h性命(参考约翰福音三:36)。

第9节,chia真清楚提起所有ê基督徒就是仝款ê族群,lóng是属tī上帝所拣选ê子民。「王家ê祭司」,chit句话kah以色列人出埃及进入旷野了后,就tī西奈山盟约中,上帝透过摩西对以色列人传出ê信息,讲以色列人民是上帝ê选民,是神圣ê国民,是事奉上帝ê祭司(参考出埃及记十九:4—6)。chit-má作者用chit段话ê背景来看所有ê基督徒,就kah当年以色列人仝款。
「圣洁ê国度」,这是teh指分别出来ê一个团契。因为上帝是圣洁ê,所以,所有ê基督徒聚集做伙,应该就是一个分别为圣ê团体,kah一般ê社会团体无仝款。耶稣基督就bat án-ne kā他ê门徒讲in kah一般社会团体无相仝(参考马可福音十:42—44)。

第10节,chit节讲出基督徒应该有无仝款ê所在,就是身分ê认同有差别;以前iáu未认bat耶稣基督ê时,m̄是属tī上帝ê子民,chit-má因为耶稣基督而成做上帝ê子民。

第11到12节,作者就koh一pái提起ài人kā家己当做kah一个「旅客」、「寄居」者仝款。Mā因为án-ne,作者ài基督徒保有良好ê信仰生活之行为,hō͘人因为án-ne看tio̍h基督徒虽然暂时移居外国之地,mā会知影透过生活见证信仰,因为一个基督徒siōng重要ê,就是时刻知影为福音作见证。

「M̄-thang放纵肉体ê情欲」,chit句话真紧to̍h会hō͘人联想tio̍h kah「性」有关ê方面。其实,圣经ê作者并m̄是指chiah-ni̍h狭ê范围,却是真宽阔ê,指ê内容差不多就是涵盖了真阔ê道德、伦理方面等lóng包含在内à。

Tī彼得前书ê作者看起来,一个人若是tī肉体上放纵,he等于是teh污染灵魂仝款。Chia ê「灵魂」,mā thang做「心」解释。Mā就是讲,一个人ê肉体kah心灵是相连接ê,m̄是分开ê,mā无法度是分开ê。早期教会因为不被统治者认同,因为án-ne,迫害ê事件chia起hia落,这mā是头前讲过,信徒为tio̍h án-ne逃到外国去避开迫害ê苦难。M̄-koh án-ne并无表示就bē有问题发生,因为hiah-ê人会用真chē不实ê传闻来亵渎基督徒kah in ê信仰。因为án-ne,作者认为siōng好ê方法,就是用koh khah好、koh khah实在、koh khah圣洁ê生活方式来,hō͘人看见基督徒ê好模样而tī「主koh来ê日子」,mā就是审判ê时chūn,成做荣耀上帝ê记号。

第13到14节,chit两节thang参考罗马书第十三章1到2节,lóng有仝款ê意思。Á tī使徒行传第四章18到20节,当彼得kah约翰被犹太人siōng koân议会掠去去关,并tī审问in两人ê时,in两人就真清楚表示:「tī上帝面前,听从lín chiah-tio̍h,á是听从上帝chiah-tio̍h?lín家己判断!咱所看见所听tio̍h ê,无法度不讲出来。」彼得书信ê作者倾向ài基督徒对国家ê制度采取尊重ê态度,因为án-ne,强调tio̍h服从ê是制度。Á tī chit制度之下,一定tio̍h有人去执行。因为án-ne,执行者ài kā制度确实执行出来。当国家ê领导者(执政者)若是无确实遵行chit-ê制度ê规矩,甚至乱使用伊ê权势ê时,人民ê好行为就等于是teh侮辱chiah-ê领导者仝款。Ná亲像tī第14节chia所提起ê,chiah-ê制度之下ê掌权者,主要是为tio̍h「执行奖善罚恶」ê工作。

第15节,chit节thang看tio̍h无论是彼得前书á是使徒保罗ê时代,背景lóng是tī罗马帝国统治之下,tī he强权统治之下ê环境中,若当面kah之发生冲突,必定损伤惨重,而且bē赢过hit种邪恶ê势力。因为án-ne,包括耶稣基督ê教示中lóng有chit种看法:用疼赢过恶。彼得前书作者认为基督徒应该有够额ê智慧对付「hiah-ê糊涂无知ê人」,方法并m̄是用强猛ê态度,mā m̄是用足以伤害人命ê武器,koh khah m̄是正面冲突ê举动,却是用「好行为」来hō͘ chiah-ê一再想beh压迫基督徒ê人,就算beh chhōe孔缝lóng会感觉手软,á是感觉见笑、心虚。

	第16节,「m̄-thang用自由来掩盖任何邪恶,beh做上帝ê奴仆」,这是非常重要ê信仰认知。有人kā chit句话当做基督徒受洗ê时一定tio̍h宣告ê一句话,因为真正信耶稣基督ê人,乃是自由ê人,是性命无受罪束缚ê人。真正自由,就是疼。因为有爱,性命chiah有自由thang讲。相对ê,若是kā邪恶隐瞒起来,这m̄是爱,却是错误而且乱使用上帝ê疼。Chit种举止kan-taⁿ会带来koh khah chē ê伤害,甚至成做邪恶ê罪ê奴仆而已。Chia提起「beh做上帝ê奴仆」,chit句话thang参考耶稣基督tī马太福音第六章24节所教导ê,beh tī钱财kah上帝之间作一个明确ê选择,伊劝勉所有跟tòe伊ê人lóng「beh做上帝ê奴仆」。

第17节,chit节ē-sái讲是作者想为信徒过圣洁生活做一个简单ê结语,chit句结语就是疼所有ê人。作者讲beh用「敬重」,是teh指诚实ê态度。换句话讲,一个基督徒,若是hō͘非信徒感觉无够诚实,就无法度见证信仰。因为基督教信仰就是tùi诚实做基础开始ê。

Chia讲beh用「爱」对待每一个信徒,这「爱」字ê希腊文「agape」,就是不计较、不怀疑、无保留、无条件ê疼,而且是完全、无私、牺牲、奉献ê疼。

「敬畏上帝」,这「敬畏」一词,意思就是m̄-thang随便,tio̍h像脚踩tī薄薄冰层顶面仝款ê心情,小khóa无小心就会陷落去hit种ê惊惶、担忧。

第18到20节,chia谈及有关奴仆kah主人之间ê关系。咱thang án-ne了解,早期教会大多数信徒lóng是奴仆,这mā是为甚么使徒保罗ê书信中mā一再提起有关奴仆kah主人之间ê关系(参考以弗所书六:5—9,歌罗西书三:22—四:1,提摩太前书六:1—2,提多书二:9—10,腓利门书8—20节)。奴隶ê背景是kah早期罗马帝国四界去相战胜利掳获上千万人tńg来国有关,siōng高峰ê时期就chē kah六千万奴隶,chiah-ê奴隶所做ê工作包括音乐、舞蹈、教师、仆役,甚至有kóa医师mā是奴隶ê身分。M̄-koh大多数iáu是tī劳役ê工作。而且tī he时代,奴隶就是主人ê「财产」,即使有ê主人对待奴隶就ná亲像家己厝内人一般来好款待in,m̄-koh这并无表示奴隶就是自由ê,in时常会跟tòe主人ê境遇而改变。而且tī罗马ê律法下,奴隶并m̄是属tī「人」ê阶级,却是kah「货物」仝款。

Kā chit种了解来看chit三节经文ê时,就会明白为甚么作者会写出chit种奴隶一定tio̍h以绝对顺服ê态度回应主人ê观点。Tī作者ê看法里,tú-tio̍h hiah-ê不讲理,而且态度恶质ê主人,mā tio̍h忍受,án-ne做是顺服上帝ê旨意,而上帝chiah是人真正主人。

Koh讲,早期教会因为耶稣基督扮演「受难ê奴仆」ê角色,mā有一种强烈ê看法,认为基督徒应该是学习耶稣基督ê精神,忍受一切ê苦难,因为相信tī苦难中,上帝进行他奇妙ê拯救工作。特别面对hit-ê强势有力ê压迫者ê时,ài kā性命ê希望寄托tī上帝,而不期望有权势ê人会改变,因为he是真困难ê。只有上帝进行审判、改造ê时,chiah有可能挽回人心堕落ê趋势。

第21到22节,chia讲「基督为lín受苦,hō͘ lín留落来模样」,是因为耶稣基督并无犯罪,m̄-koh伊却tī十字架上受难。使徒保罗所讲ê:「上帝 hō͘ 无罪 ê基督来担咱 ê 罪,是 beh hō͘ 咱 kah 他结联,来kah 上帝建立合宜ê 关系。(全民版)」(哥林多后书五:21)。早期教会信徒就有chit种信仰观念,认为每一件事lóng有上帝ê旨意在内面,即使tī siōng无理ê境遇中,mā会有上帝美妙ê旨意在其中。因为án-ne,基督徒若是因为是一个尽责任ê奴仆,却mā仝款tú-tio̍h到主人严酷ê对待,就kā它看做是为tio̍h上帝ê缘故受苦难仝款,án-ne反tńg会得tio̍h上帝ê祝福,就ná亲像耶稣基督虽然无罪却死tī十字架上,是为tio̍h beh完成上帝ê旨意,hō͘人kah上帝之间重建合宜ê关系。

第23节,chia提起「仰望公义ê审判」,这mā是基督教信仰一个真重要ê告白,相信上帝就是公义ê上帝,他一定会替受tio̍h冤屈者伸冤。如果人间无公理存在,上帝必定会伸张公义,审判hiah-ê不疼惜上帝子民ê统治者。使徒保罗就án-ne讲:「亲爱ê 兄弟姊妹,m̄ -thang 为tio̍h 家己报冤仇,tio̍ h hō͘ 上帝去受气来替你申冤,因为经典有记载:『主讲:申冤在tī 我,我会报应』」(全民版)(罗马书十二:19)

    第24到25节,chit两节koh一pái强调耶稣基督死tī十字架上ê救赎恩典,hō͘所有信耶稣基督ê人ê罪已经得tio̍h赦免,chit种人,就是属tī耶稣基督ê人,伊就是牧者,信徒就是伊ê羊。耶稣基督就是好牧者,伊会为tio̍h羊舍命(参考约翰福音十:11)。

重新查询 专卷研经 彼得前书系列
错误回报,请联系comm[@]fhl.net