列王纪上 6章1节 到 6章14节   背景资料  上一笔  下一笔
Chit章是teh描写圣殿建造ê过程。Tī了解chìn前,先有一个概念是必要ê,就是tī大卫kah所罗门时代,in lóng想beh建造圣殿,主要原因是:圣殿kah一般神明ê殿宇仝款,主要lóng m̄是用来礼拜ê,而是beh hō͘所敬拜ê神有一个「家」thang tòa,这就是希伯来文ê「殿」字,就是「家」ê意思。Ná亲像国王有王宫,王所崇拜ê神,koh khah需要有「神宫」,观念上是án-ne ê。这mā是后来先知以赛亚传出上帝ê信息,做矫正以色列人民ê观念ê时所讲ê:「天是我ê 座位,地是我ê 脚踏椅。Lín beh kā 我起甚么款ê 厝?甚么款ê 所在是beh 做我安息ê 所在? Chiah-ê lóng 是我ê 手所创造ê,所以,chiah-ê 就lóng 有。总是,我所看顾ê,就是hiah-ê 谦卑、痛悔,kah 因为我ê 话来phi̍h-phi̍h-chhoah ê 人。(全民版)」(以赛亚书六十六:1—2)而先知以赛亚传ê chit-ê信息,已经是回乡重建圣殿完成了后,伊koh一pái警告以色列人民m̄-thang陷入迷信,认为重建圣殿完成,就ē-tàng安然无恙,若m̄是遵守上帝ê教导,照他ê旨意做tāi-chì,chit种圣殿iáu是仝款,有一工会koh再像主前586年仝款被巴比伦帝国hō͘摧毁。

Chit段经文说明整座圣殿ê基本结构,包括有三层楼高,以及整座圣殿ê寸尺大细。
第1节,chit节真重要,讲出所罗门建造圣殿ê开工日期,是tī伊登基ê第四年二月,mā是「以色列人离开埃及后ê四百八十年」。若kā chit-ê「四百八十年」ê数字,koh加上所罗门登基ê年代是tī主前966年,共计是1446年,这就kah一般学者考据以色列人出埃及大约是tī埃及第十九王朝兰塞二世ê时chūn,mā就是主前1290年左右(参考创世记四十七:11),相差真chē。因为án-ne,有kóa圣经学者认为chit-ê年代无一定是正确ê时间,只是讲出一个整数ê年代,á是「象徵」性ê数字,mā就是「 12」乘以「40」,chit两个数字lóng真有特殊意义,因为「12」表示以色列民族十二支派,「40」表示一段「tú好」ê时间,ná亲像摩西tī埃及「40」年,tī丈人叶特罗ê厝「40」年,然后受命带领以色列人民tī旷野漂流「40」年,摩西tī西奈山顶领受上帝ê诫命tio̍h「40天」等等,lóng teh表示以色列人民离开埃及kah「40」有关ê特殊意义。

因为án-ne,chia ê「四百八十年」并m̄是beh说明确实时间,这是一个「整数」,kā建造圣殿kah出埃及ê时间连结起来,主要用意teh说明建造圣殿,beh表明ê是kah上帝拯救有关。Mā用来表明:有上帝ê拯救,in chiah ē-tàng脱离奴隶ê锁枷,而成做有性命尊严kah自由ê人。因为án-ne,重要ê,不是beh去推算距离到chit-má tī toh一年。

第2到10节,chit段经文描述圣殿建筑体ê结构,大部分起来讲,圣殿是仿照会幕ê样式建造ê,是长方形,分做三个主要部分,一是至圣所、二是圣所、三是外院。包括有内部长「二十七公尺,宽九公尺,高十三公尺半」,共有三层楼高。第7节特别说明建造圣殿ê过程中,无大锤子ê声音,mā无斧头kah其他铁器ê响声,原因是所有ê「石料是tī石矿场里开凿ê」。Mā thang án-ne讲,建造圣殿ē-tàng听tio̍h ê,是只有锯木材ê声音,kah工人搬运建材ê声音。 

第11到13节,chit段经文koh一pái说明kui个以色列民族迈向自由ê一个基本信念:就是beh以色列人民一定会遵守上帝ê律法诫命。只有án-ne,chiah ē-tàng hō͘上帝kah以色列民族连结做伙。相对ê,若是弃sak上帝,无遵守上帝ê律法诫命,就算有koh再坚固ê圣殿,mā是枉然。因为ná亲像先知以赛亚所讲ê,上帝并不住tī人ê手所建造ê厝里。上帝是kah遵守他ê教导ê人同在。

第14节,「所罗门起殿已经完成。(全民版)」chit句话是一种概略ê讲法,表示头前讲述ê圣殿外型结构体,就是照ná方式建造起来ê。

重新查询 专卷研经 列王纪上系列
错误回报,请联系comm[@]fhl.net