列王纪上 21章1节 到 21章16节   背景资料  上一笔  下一笔
Chit章是有关亚哈王想beh占有拿伯葡萄园ê事件。Chit章mā是旧约圣经中非常有名ê一篇故事,说明国王kah人民之间仝款lóng是上帝ê子民,国王无法度因为家己有权力,就想beh占有á是贪图人民ê土地、财产,反tńg koh khah beh知影保护人民ê财产chiah-tio̍h。何况,为tio̍h占有人民ê土地,iáu做出用假见证谋害人民性命ê恶质ê行为,上帝绝对bē允准chit种事发生。

Chit段经文描述亚哈王看见拿伯ê葡萄园靠近王宫,真想beh得tio̍h该园。伊想beh用换地ê方式,á是用购买ê方法得tio̍h拿伯ê葡萄园,m̄-koh lóng被拒绝,结果hō͘伊真oh过。伊ê bó͘耶洗碧认为既然身为国王,ài the̍h人民ê土地有甚么bē-tàng。就án-ne就设法用假见证陷害拿伯,讲伊亵渎上帝,而hō͘拿伯活活被phah死,然后kā伊ê葡萄园侵占起来。这ê事件说明王后耶洗碧用残酷ê手段夺取人民ê财产。这是上帝所无法度容忍ê事。

第1到3节,亚哈王希望拿伯kā伊靠近王宫附近ê葡萄园卖hō͘伊,á是用其它ê土地kah拿伯交换hit-ê葡萄园,m̄-koh拿伯拒绝亚哈王讲:「上主不准我kā祖产让hō͘你。」拿伯án-ne回答是根据摩西律法ê规定:「地m̄-thang 永远卖断,因为地是我ê;lín tī 我ê 面前是出外人,是寄脚ê (全民版)」(利未记廿五:23)这mā teh表示亚哈王已经bē记得上帝透过摩西设定律法ê命令à。

第4到6节,身为国王ê亚哈,因为无法度如心所愿ê得tio̍h人民土地,chit件事hō͘伊「闷闷不乐」,甚至不食饭。伊ê bó͘耶洗碧因为án-ne问伊tāi-chì ê缘由,伊kā chit件事讲hō͘ bó͘听。

第7到10节,chit段经文讲王后耶洗碧决定替丈夫亚哈王得tio̍h拿伯ê葡萄园。王后耶洗碧用假见证,m̄-nā买通了城里ê「显贵kah民间长老」,然后koh用「禁食」chit种有含认罪、哀伤意义ê宗教礼仪方式,koh进一步ài chiah-ê显贵kah长老去「叫两个流氓当面控告」拿伯,「讲伊辱骂了上帝kah王」。因为照摩西律法,辱骂上帝beh用石头phah死(参考利未记廿四:16)。这等于讲,耶斯列城里ê chiah-ê达官显若是听从王后耶洗碧ê话,却m̄是遵行上帝ê命令。Koh tī谋害人民ê性命ê tāi-chì上,竟然thang án-ne做。

Tī第9节、12节lóng有提起耶洗碧ài众长老宣告全国「禁食」,这是kan-taⁿ有tī国家tú-tio̍h危机,á是tú-tio̍h大灾难ê时chūn chiah会通告全国人民遵行ê事。而且「禁食」通常是kah「祈祷忏悔」连结做伙,恳求上帝ê怜悯。M̄-koh耶洗碧án-ne做,却是因为想beh图谋得tio̍h拿伯ê葡萄园。Chit种图谋私利ê事,却挂tio̍h神圣ê宗教名义,就是乱使用上帝ê名(第三诫)仝款。因为án-ne,上帝无法度容忍chit种事发生。

第11到14节,果然,chiah-ê达官显要并m̄是遵从上帝ê话,却是听从王后耶洗碧ê话。Kā用来忏悔、痛苦ê禁食the̍h来当做欺骗ê方式,包括用假见证诬告无辜ê人,án-ne chiah是真正亵渎上帝ê名。In陷害拒绝出hō͘葡萄园ê拿伯,活活kā伊「用石头phah死」,然后派人去kā chit件事报告hō͘亚哈王知影。

第15到16节,亚哈王m̄-nā无阻止王后耶洗碧做chit件绝对bē-tàng做ê事,反tńg是放手hō͘伊去做,koh tī伊做完后,iáu听从伊ê话去「霸占」拿伯ê葡萄园,身为国王ê亚哈竟然犯下án-ne谋财害命ê罪行!

重新查询 专卷研经 列王纪上系列
错误回报,请联系comm[@]fhl.net