Chit段经文thang看tio̍h早期先知通常lóng会以讲故事ê方式，á是用身躯语言来表达上帝ê旨意。亲像先知以西结就是用身躯语言传达上帝信息ê高手（参考以西结书第四到五章），而先知耶利米mā有过chit种方式（参考耶利米书第十三章）。chit-má chit段经文mā是，先知用身躯语言ê方式向以色列王亚哈讲出上帝ê信息，hō͘以色列王亚哈知影，伊kā叙利亚王便・哈达tháu放是一件严重ê错误。

第35到36节，chit两节讲出上帝ê奴仆先知，若是拒绝上帝ê命令，只有死路一条。因为in lóng是先知，而且同齐学习传达上帝ê信息，听tio̍h「奉上主ê命令」，这应该就tio̍h注意听，而且去实践，án-ne chiah是先知该有ê态度。

第37到40节，这是一段先知用身躯作语言，传达上帝ê信息之方式。故事题材真亲像先知拿单对大卫王犯罪了后，用讲故事ê方式，hō͘大卫家己做出判决。Chia是以色列王亚哈看tio̍h chit段身躯语言了后，mā随时做出判决，讲chit-ê故事主角「非受惩罚bē-tàng」。这表示亚哈王并无清楚这是一出先知ê「行动剧」。

第41到43节，当亚哈王讲完判决后，先知真清楚指出亚哈王kā叙利亚王便・哈达tháu放 tńg去，伊teh-beh付出代价，因为伊违背上帝ê旨意。亚哈王听了后，心内「闷闷不乐地tńg来撒马利亚ê王宫去」。

头前ê两pái叙利亚王挑衅以色列，结果lóng hō͘ 上帝phah了tńg去。M̄是以色列王á是人民本身有甚么能力，因为in ê国势kah国防力量lóng远不如叙利亚，若m̄是上帝亲自带领，根本就无法度赢过叙利亚。因为án-ne，对以色列国来讲，siōng重要ê就是国王kah全民lóng tio̍h忠实tī上帝，听从上帝ê话，却m̄是家己决定ài怎样做就怎样做。有关亚哈王违背上帝ê旨意ê tāi-chì，是tī tháu放叙利亚王便・哈达ê事件上，无先询问上帝ê旨意án怎。因为ē-tàng掠叙利亚王，是有上帝亲自出征。虽然后来亚哈王得tio̍h外交上ê利益，包括设立贸易中心，m̄-koh伊无遵行上帝ê旨意，所得tio̍h ê一切lóng会成做泡影。