列王纪上 19章1节 到 19章18节   背景资料  上一笔  下一笔
Chit章讲出上帝奴仆ê孤独、无奈。因为以色列人民ê心已经刚硬,听bē落去上帝奴仆先知以利亚所传出上帝ê信息。伊bat表示宁可死去,因为非常痛苦。Mā同时向上帝控诉以色列人民ê悖逆行为。M̄-koh上帝iáu是照顾先知以利亚,并且为伊准备一位门徒以利沙。

这是一段难解ê经文,因为先知以利亚既然ē-tàng勇敢地「斗」倒耶洗碧总共八百五十名御用ê先知,怎样koh惊耶洗碧一个人?当伊恐吓讲beh刣伊ê时chūn,先知以利亚却惊惶了起来,真奇怪。为甚么会án-ne?mā可能kah耶洗碧是外邦cha-bó͘-gín-á有关,tī伊ê观念中,根本to̍h无上帝,mā m̄惊上帝ê审判kah惩罚,因为án-ne,伊chiah敢恐吓上帝ê奴仆先知。Á先知以利亚则暴露了人性siōng大ê弱点,当耶洗碧威胁beh杀害伊ê时chūn,伊认为性命已经有危险,因为án-ne,用死来向上帝控诉。Chit种用死表明当先知ê「孤独心境」,伊讲所有ê先知lóng已经被刣死,只chhun家己一个人,iáu被恐吓kā遇tio̍h杀害。若是比较第十八章4节,俄巴底bat救出一百个先知,因为án-ne,m̄是lóng死去,至少iáu有一百个先知活teh。不过chit种用死来向上帝控诉,表明家己心内孤独ê心境,先知耶利米(参考耶利米书二十:14-18)、约拿(约拿书四:3)lóng有共同ê经验。

第1到4节,以色列王亚哈因为迦密山顶ê失败,伊就kā先知以利亚tī迦密山顶所做ê每一件事lóng详细kā bó͘耶洗碧讲。一个真tú好ê王后,一定会帮助国王带领人民赶紧tńg来到真实ê上帝身边,悔改认罪。M̄-koh王后耶洗碧m̄是án-ne,却是差遣使者去恐吓先知以利亚,讲「明á载」beh杀害先知以利亚。Chia ê「明á载」,表示真紧、马上ê意思。因为án-ne先知以利亚惊惶,带奴仆逃到南国犹大去避难。M̄-koh chit种逃亡ê生活,hō͘伊感觉真oh受,chìn前已经有为tio̍h避开亚哈ê追缉杀害,伊四界bih起来。chit-má是王后耶洗碧下令tio̍h杀害伊。因为王后耶洗碧已经刣死真chē先知,hō͘先知以利亚胆战心惊。伊留落来奴仆,行到距离奴仆约有一工ê路程ê一个杜松树下求死。伊向上帝表示家己已经「受不了了」,伊宁可死去。

第5到8节,真可能因为太thiám ê关系,先知以利亚就tī chit棵杜松树下困去à。上帝差派天使来服侍伊,有食物kah水。伊lóng食过、lim过,m̄-koh却继续躺落去,kah-ná表明死ê意愿真强ê款。

天使第二pái出现,ài伊起来继续食物件,就án-ne,hō͘先知以利亚有体力,ē-tàng继续行长到「四十暝日」来到「何烈山」。Chia mā是摩西hō͘ 上帝呼召ê所在(参考出埃及记三:1)。
第9到10节,上帝亲自对先知以利亚讲话,问伊tī何烈山chia做甚么?第10节是先知以利亚向上帝控诉以色列人民弃sak kah上帝所立ê约,m̄-nā拆毁上帝ê祭坛,而且iáu杀害上帝ê先知,chit-má只chhun伊一人。其实,俄巴底就bat救出一百位先知。因为án-ne,先知以利亚讲只chhun伊一人,只是teh表示伊ê孤独。

第11到12节,chit两节描述上帝tùi以利亚面前经过ê情景,m̄-koh,无论是出现强烈ê大风、地动、火,都无看tio̍h上帝,只听tio̍h上帝对伊讲话ê声音。换句话讲,人无法度看见上帝ê面,ná亲像摩西虽然上了上帝ê山,ē-sái讲是就是无法度看见上帝ê面。人只有ē-tàng看tio̍h chiah-ê hō͘人性命感觉懔neh、惊惶ê景象。Á chiah-ê景象mā不过是因上帝ê命令出现。

第13到14节,这是先知以利亚第二pái听tio̍h上帝ê声音teh问伊。伊回答上帝ê话,lóng是teh控诉以色列人民悖逆上帝命令,无koh遵守kah上帝所立ê约。In刣死先知,只chhun伊一人。

第15到17节,chit段经文讲述上帝赋予先知以利亚ê三项使命:一、ài伊膏立哈薛当叙利亚ê王;二、ài伊膏立耶户当以色列ê王,这teh暗示亚哈王ê死期已经到à。三、膏立以利沙续接伊ê工作。这teh表明上帝准备ài接先知以利亚tńg去。

第18节,这是真重要ê一节经文,tī先知运动中一再出现chit种所谓「上帝余民」ê观念。这七千个人就是「上帝ê余民」。M̄-koh,「七千」却有含「神圣」、「够额」ê含意。意思是讲:上帝赐福hō͘忠心ê子民m̄免多,即使是「七千」人mā是真大ê气力。另外一方面,「七千」mā thang当做庞大ê数目的意思。

重新查询 专卷研经 列王纪上系列
错误回报,请联系comm[@]fhl.net