列王纪上 15章9节 到 15章24节   背景资料  上一笔  下一笔
续接亚比雅继任为犹大王ê亚撒,ē-sái讲是分裂后犹大王国中siōng被o-ló ê一位国王,mā因为án-ne,伊执政ê时间长到四十一年之久(主前910到869年)。这mā表示伊治理之下南国犹大,虽然iáu是亲像伊ê阿公罗波安仝款,不时kah北国以色列ê王巴沙之间常相战,m̄-koh因为伊像祖先大卫hit种做上帝看做对ê事,上帝赏赐hō͘伊有非常稳定ê政情,chit种稳定ê政情,就是透过外交手路,促成hō͘叙利亚kah以色列交恶,解除以色列侵犯in ê危机。Chit段经文thang参考历代志下第十五章16节到第十六章6节,mā tùi历代志作者ê资料中,看tio̍h亚撒án怎进行宗教改革,hō͘犹大人民全部lóng对上帝忠实。亚撒ê成功,siōng主要就是进行宗教改革,hō͘ hiah-ê混淆纯洁信仰ê偶像神明,kah污秽上帝祭坛ê异端信仰无立足之地。

第9到15节,tùi chit段经文thang看tio̍h当时拜巴力偶像ê宗教信仰行为中,已经出现「男娼」,而chit种行业一定会影响tio̍h以色列人民对上帝忠实ê圣洁态度。为tio̍h beh进行宗教改革,伊大力铲除了祖母玛迦时代所引进ê巴力偶像神明崇拜ê行为,拆毁神像、祭坛等。列王记作者认为亚撒ê老父亚比雅失败ê原因,就是因为伊ê祖母玛迦引chhōa in父亲弃sak上帝。因为án-ne,tī伊执政ê时chūn,就kā祖母ê「太后」地位hō͘废掉。

第11节thang用来对照第3节,作者非常清楚说明一个国王是m̄是得tio̍h上帝ê喜爱kah祝福,就看hit-ê国王是m̄是有像in ê祖先大卫hit种地敬奉上帝,独独以耶和华上帝做中心。

第16到19节,chit段经文说明以色列王巴沙已经入侵犹大,而且切断了犹大ê对外交通,chit对犹大来讲是真严重ê威胁。因为án-ne,亚撒用财物去建立kah叙利亚王便・哈达ê外交关系,虽然chia讲亚撒用chit种方式,确实得tio̍h了叙利亚王便・哈达ê善意回应,其实mā是teh说明亚撒虽然进行宗教改革,却同时mā有心理上ê矛盾――对上帝ê信心无够。

第20到21节,便・哈达知影犹大亚撒王ê意思,kah犹大结盟了后,随时派出伊ê bē落去攻打以色列ê城镇,逼kah原本tī拉玛筑垒设防ê巴沙不得不赶紧将军队退tńg来到得撒去。

第22到24节,亚撒王chit pái ê外交是成功ê,而且伊mā趁犹大撤tńg来军队而留落来无完成ê拉玛防线,kā所有建材全部运tńg来犹大,tī米斯巴kah迦巴做筑垒设防ê建材。

晚年ê亚撒kah-ná有离开上帝jú来jú远ê现象,根据历代志作者tī第十六章ê记载,讲伊晚年连先知哈拿尼kā上帝ê信息传达hō͘伊听,伊听了后m̄是谦卑悔改认罪,却是「非常气愤」,然后就kā先知关起来,而且开始「虐待一kóa人民」,家己已经病重跛脚mā boài向上帝祈求帮助,kan-taⁿ求问医生,结果两年后就死去à。

重新查询 专卷研经 列王纪上系列
错误回报,请联系comm[@]fhl.net