列王纪上 14章21节 到 14章31节   背景资料  上一笔  下一笔
Chit段经文是记载南国犹大罗波安ê事迹。Chit段经文记事mā同时记载tī历代志下第十一章5到12节、15节等等。

第21节,chit节补充了第十二章有关罗波安继承所罗门王位了后,所欠缺ê资料。Mā是tùi chia开始,记载南国犹大ê事迹,lóng是用「犹大」chit-ê名称,而chit-ê名称所代表ê,只是犹大支族kah便雅悯支族而已,版图范围小,人口mā少了真chē。Chia真清楚讲罗波安担任犹大王统治耶路撒冷,hit年伊是四十一岁,统治时间有「十七年」。值得注意ê是,伊ê母亲是亚扪人叫「拿玛」,这表示所罗门娶外族人做bó͘。Á这简单ê一句讲罗波安ê「母亲是亚扪人」,mā讲出所罗门透过婚姻关系所建立ê王国霸业,并m̄是成功ê例,如果无上帝ê赐福,无上帝ê话语做基础,即使用koh khah巧妙ê外交、政治手段,lóng无法度久长存在,所有ê努力mā会是枉然ê。

第22到24节,短短三节ê经文,就thang看出南国犹大ê问题并无比北国以色列轻。In mā是仝款敬拜偶像,而且iáu tī各地敬拜地点设有男娼,这是非常严重ê事,已经说明以色列人tī迦南地差不多完全被当地同化了,特别是tī宗教信仰上koh-khah是án-ne。已经分bē清楚耶和华宗教信仰kah偶像神明之间ê差别。

第25到28节,这是真重要ê一段经文,讲tio̍h埃及王示撒带兵攻打耶路撒冷,并且是进入圣殿夺取所罗门时代所铸造ê金盾牌(参考列王记上十:16—17),而且mā进入所罗门建造起来ná奢华ê王宫搜刮所有ê宝物。有关埃及王示撒带兵攻打耶路撒冷城以及夺取圣殿、王宫中ê财宝ê tāi-chì,thang参考历代志下第十二章1到12节。作者讲因为罗波安知影悔改认罪,上帝特别赦免伊,无kā受气倾倒tī耶路撒冷城。换句话讲,如果m̄是因为国王认罪,恐惊所讲ê「圣城」、「圣殿」lóng会毁灭tī敌人ê手。当埃及kā chiah-ê金盾牌夺行了后,罗波安改用「铜盾牌」,每pái伊去耶路撒冷圣殿献祭ê时,守卫王宫ê卫兵就the̍h-tio̍h chiah-ê铜盾牌护卫tio̍h,这已经teh暗示南国犹大ê国势已经衰弱真chēà。无koh像所罗门王时代hit种à。

第29到31节,统治犹大十七年了后,罗波安mā往生à。然后由伊ê kiáⁿ亚比雅继承伊做王统治耶路撒冷。Chia第30节真重要,讲「罗波安kah耶罗波安之间不断发生战争」,chit句话已经真清楚讲出分裂后ê南北二国,彼此之间不时有战争ê事发生,而这mā是造成国力衰退ê主要因素之一。

重新查询 专卷研经 列王纪上系列
错误回报,请联系comm[@]fhl.net