列王纪上 12章1节 到 12章24节   背景资料  上一笔  下一笔
Tùi chit章开始直到列王记下第十七章,chit段经文lóng是记载以色列分裂做南北二国ê经过,以及chit两个兄弟国家各自发展ê情形。

第十二章主要teh说明北部十支派会脱离分裂伊去ê原因,以及罗波安原本准备大军beh去攻打脱离ê北部十支派,m̄-koh因为上帝派先知示玛雅去kā犹大kah便雅悯讲,m̄-thang去攻打北部十支族,in听从了先知传达上帝ê话而撤兵,续落来就是耶罗波安当第一位北国以色列ê王。

Tī第十一章提供三个对所罗门政权有威胁ê人ê记事ê时,就已经teh暗示晚期ê所罗门时代,是一个不安定、纷乱ê时代。像利逊就是专门以phah游击ê方式teh制造社会纷乱,作者用「伊加增以色列ê祸患」来形容所罗门为tio̍h chit-ê tāi-chì而烦恼不安。

Chit段经文主要teh说明北部十支派会脱离ê主要原因,是因为所罗门过奢华ê生活,虽然收入真chē,mā是入不敷出,因为án-ne一定tio̍h óa靠重税来增加收入,致使北部ê民众生活koh khah困苦。因为án-ne请求罗波安减轻税赋,m̄-koh被拒绝后,决定脱离分裂伊去。

第1到4节,罗波安算是有意走chhōe北部十支派ê支持,á是好感。因为án-ne,伊继任为王后,就去北部ê宗教中心示剑kah十支派ê代表聚集会面。Á chit时,耶罗波安因为听tio̍h罗波安做王(所罗门王往生),mā tùi流亡ê埃及地赶tńg来。就án-ne北部支派ê人mā派人去请伊代表出席,同齐去见罗波安,并向伊提出一个重要ê议题:若是减轻税赋,in就顺服罗波安ê领导。

第5到8节,罗波安回应北部代表,hō͘伊「三工」时间考虑。伊先去请问几个元老,lóng bat是所罗门王ê顾问,in建议罗波安用服务人民ê精神,好款待人民,必定会得tio̍h人民ê支持。

第9到11节,罗波安显然听不进chiah-ê元老ê建言,伊koh去询问tio̍h kah伊同齐长大ê少年人ê意见,chiah-ê人lóng是伊聘请进入王宫当顾问ê官员,结果in hō͘罗波安ê建议,m̄-nā不减轻税赋,反tńg iáu koh khah加重税赋。其实,罗波安teh回答ê时,已经吐露了in父亲所罗门ê时,hō͘ in以色列人民ê税赋就真重了,chia用「鞭子」来形容所罗门ê税赋政策,ná亲像the̍h鞭子phah人民仝款ê沉重kah疼痛。

第12到15节,结果罗波安不采取元老ê意见,而采取少年顾问ê意见,讲beh加重税赋,「m̄-chhap人民ê要求」。

第16到17节,北国十支派ê以色列人民就án-ne决定脱离伊去,罗波安就只有统治犹大kah便雅悯。

第18到19节,罗波安为tio̍h beh挽回北部支派ê分离,特别派「劳工总管亚多兰到以色列人hia去」,有意想beh kah in洽商。Chit位亚多兰应该就是第四章6节所讲ê「亚多尼兰」,伊bat管理三万名劳工参与建造耶路撒冷圣殿ê工程。原本认为伊去,可能有安抚作用。M̄-koh无想tio̍h亚多兰去了后,就被北部愤怒ê以色列人民hō͘用石头phah死,罗波安因为án-ne慌乱了,伊赶紧逃tńg来耶路撒冷,就án-ne,北部正式脱离了耶路撒冷做中心ê大卫王朝之统治。

第20节,北部十支派ê代表共同聚集,in邀请耶罗波安出席大会,并且立伊做北部十支族成立ê以色列国为王。Á南部ê只chhun犹大kah便雅悯,m̄-koh因为便雅悯非常弱小。因为án-ne,就用犹大国来称呼南部两支派ê国家。

第21到24节,罗波安想用武力惩罚北部十支派,因为án-ne号召了犹大kah便雅悯支族派出siōng精锐ê兵丁共计十八万人,beh去攻打北国以色列。M̄-koh上帝差遣他ê奴仆先知示玛雅去阻止in,hō͘ in知影这有上帝ê旨意在其中,ài in tńg去。In听从了先知示玛雅ê苦劝,免除了一场兄弟残杀ê悲剧。

重新查询 专卷研经 列王纪上系列
错误回报,请联系comm[@]fhl.net